Jerusalem (dpa/SN). Zwjazkowa wonkowna ministerka Annalena Baerbock je so na swojim mjeztym sedmym wopyće w Israelu po terorowym nadpadźe islamistiskeje Hamas na Israel ze statnym prezidentom Izchakom Herzogom zetkała. Při rozmołwje dźensa rano w Jerusalemje bě po informacijach wonkowneho ministerstwa tež jeje britiski kolega w zastojnstwje Dawid Cameron přitomny. W běhu dnja wočakowaše Baerbock israelski wonkowny minister Israel Katz. Hłowna tema rozmołwow bě přiběracy strach před hrožacej eskalaciju połoženja, by-li Israel na kónctydźenski iranski nadpad z raznej wojerskej naprawu přećiwo Iranej reagował. Tole steješe tež na dnjowym porjedźe zetkanja z ministerskim prezidentom Benjaminom Netanjahuwom w běhu dnja.
Politikarka Zelenych chcyše tež napjate humanitarne połoženje w Gazaskim pasmje narěčeć. Minjene tydźenje bě wona Israel wospjet namołwjała, wjace pomocnych transportow do Gazaskeho pasma zmóžnić.
Blešu wina za šmóratko! Z tutej akciju chce hosćencar w sewjernej italskej Veronje swojich hosći pohnuć, so znajmjeńša wěsty čas mobilneho telefona wzdać. „Njeje žaneje přičiny, stajnje po pjeć sekundach na telefon wudźěrać. Někotrym je to mjeztym kaž droga. Njech sej w tym času radšo dobru kapku wina popřeja.“ Za blešu wina dyrbja hosćo handy při zachodźe do kamora zamknyć dać. Pječa 90 procentow hosći poskitk wužiwa.
Wjace hac 1 100 přizjewjenjow za dohladowarja swětłownje dóšło je na kupje Wangerooge w Sewjernym morju. Zamołwići běchu městno w februaru wupisali. Swětłownju wužiwaja jako wuhladnu wěžu za turistow. Zamołwity ma zastupne lisćiki a suweněry předawać a so wo porjad starać. Najwjetši problem gmejnskeho zarjada nětko je, ze wšěmi požadarjemi personalne rozmołwy wjesć.
Rowno. Domowinska skupina w Rownom bě sej minjenu sobotu prawje luby wopyt na Njepilic statok přeprosyła – dr. Ruth Mroskowu, Trjebinjanku, kotraž nětko w Budyšinje bydli. Chcyše nam jara wjele wo swojim dźěćatstwje a wo situaciji burow w swojej holanskej wsy po wójnje a wo załoženju prodrustwa powědać. Wona je wo tym hižo w Rozhledźe publikowała, ale bu tola hinak. Cyłkownje 18 wosobow słuchaše wuwjedźenjam, při kofeju, tykancu a z wjele lubosću pokładźenymi Njepilic pomazkami. Sprěnja, dokelž je jich jara mało, kotřiž w Slepjanskej kónčinje Rozhlad čitaja – móžeš jich na rukomaj wotličić. A zdruha je lěpje, to słyšeć, wot wosoby, kotraž je to sama dožiwiła.
Washington (dpa/SN). Hladajo na pjenježnu pomoc USA za Ukrainu so po měsacy trajacej blokadźe w parlamenće kraja wočiwidnje něšto hiba. Předsyda Domu reprezentantow Mike Johnson zdźěli, zo přihotuje wothłosowanje wo wupłaćenju pomocnych srědkow. Při tym pak njepóńdźe wo 60 miliardow dolarow za Ukrainu a 14 miliardow za Israel. Johnson město toho planuje, pomocny paket do wjacorych wotrězkow dźělić.
Nadpad terorowy akt był
Sydney (dpa/SN). Nadpad na duchownych křesćanskeje wosady w Sydneyju za čas Božeje słužby su zamołwići jako terorowy akt zastopnjowali. Motiw pozdatneho něhdźe 16lětneho skućićela leži wočiwidnje we wobłuku „nabožnje motiwowaneho ekstremizma“, rjekny Karen Webb, nawodnica policije awstralskeho zwjazkoweho stata New South Wales. K zranjenym słušataj biskop asyriskeje wosady a dalši duchowny. Wobaj staj dźakowano hnydomnej operaciji přežiwiłoj.
Pieper zastojnstwo njenastupi