Do sezony startowali
Wótšowaš (SN/ch). Dźensa zahajichu w Braniborskej kupansku sezonu. Wot lěta 2008 tam wodźizny wotpowědnje braniborskemu postajenju za kupanske wodźizny kontroluja. We wokrjesu Sprjewja-Nysa so lětsa Dulocojski (Deulowitzer) jězor we wokrjesnym dźělu Wótšowaš (Atterwasch) a wulkojězor w gmejnje Turjej jako kupanskej wodźiznje wupokazujetej. Po mikrologiskich přepytowanjach je kwalita wody we woběmaj wuběrna. Za čas kupanskeje sezony jězoraj znajmjeńša jónu wob měsac přepytuja. Wuslědki přepytowanja so na internetnej stronje www.brandenburg.de/badestellen wozjewja.
Twarja nowy zawod
Južnoschleswigski wolerski zwjazk (SSW) je z čłonom Federalistiskeje unije europskich narodnych mjeńšin (FUEN) runje tak kaž Europskeje swobodneje aliancy (EFA). W přestawce njedawneje hłowneje zhromadźizny EFA w Budyšinje je so Axel Arlt z předsydu SSW Flemmingom Meyerom wo poziciji jeho strony w europskej mjeńšinowej politice rozmołwjał.
Smy runje wizije młodych přisłušnikow mjeńšin wo přichodźe jich ludow słyšeli. Kak je to na Was skutkowało?
F. Meyer: To bě njesměrnje zajimawe z mnohimi pozitiwnymi aspektami. Tójšto z mjenowanych dypkow njejsym jeno znowa spóznał, ale my so hižo dlěši čas z nimi zaběramy. Sćěhujo jedyn přinošk sej myslach, zo je referentka naše koaliciske zrěčenje čitała. Mnohe tam zwuraznjene žadanja widźimy runje tak, wosebje, dźe-li wo wobswět, doraznosć kaž tež nastupajo rěčne kompetency a wuwiće rěče. Na tychle nadawkach dźě wšitcy dźěłamy.
Soči (dpa/SN/K). Prěni wopyt ameriskeho wonkowneho ministra Johna Kerryja po dwěmaj lětomaj w Ruskej maja powšitkownje za spomóžnu diplomatisku kročel. Rěčnik ruskeho prezidenta Wladimira Putina hódnoći rozmołwy w Sočiju jako „konstruktiwne a přećelske“.
Putin je ze šefom ameriskeje diplomatije Kerryjom štyri hodźiny rěčał, praji poradźowar prezidenta Jurij Ušakow. Při tym dźěše hłownje wo rozrisanje ukrainskeje krizy přez wuše zhromadne dźěło. Konkretne wuslědki njebuchu drje docpěte, přiwšěm budźi zetkanje nadźiju, zo so poćahi mjez USA a Ruskej zaso polěpša. Kaž němska kanclerka Angela Merkel (CDU) bě tež Kerry Rusku k tomu napominał, bóle so zasadźeć za měr na wuchodnej Ukrainje. Prezident Putin dyrbjał naležnišo wliw na proruskich separatistow wukonjeć.
Valtice/Riga (dpa/SN). We wjacorych čłonskich statach Europskeje unije so dźeń a bóle planowanemu rozdźělowanju ćěkancow po wšej Europje spjećuja. Nimo Čěskeje a Słowakskeje wotpokazuja předewšěm baltiske staty planowany kwotowy system, z kotrymž chcedźa južnoeuropskim krajam hladajo na hobersku ličbu ćěkancow tam pomhać. Wotpowědne plany chcychu dźensa w Brüsselu předstajić.
„Jednotliwe knježerstwa wědźa same najlěpje, što móža we wobłuku zhromadneje solidarity zdokonjeć“, rjekny čěski ministerski prezident Bohuslav Sobotka wčera po zetkanju ze swojim słowakskim kolegu Robertom Ficom we Valticach. Sobotka w tym zwisku komisiji EU wumjetowaše, zo z najnowšimi namjetami za kwotowy system debatu wo ćěkancach „njetrjebawšo“ pospěša. „To debaće wo migraciji w Europje skerje škodźi hač pomha.“ Čěske knježerstwo bě dobrowólnje připrajiło, 70 ćěkancow ze Syriskeje přiwzać. Kraj bě naposledk hižo tójšto ćěkancam z Ukrainy wućek skićił. „Nic jeno w juhu Europy je połoženje ćežke, tež na wuchodźe“, Sobotka zwurazni.