Pomnik zaso steji
Choćebuz (SN/ch). Zašłu sobotu su so čłonojo Zeleneje ligi wobswětoweje skupiny Choćebuz we Łakomje na dźěłowe zasadźenje zetkali, zo bychu pomnik za wotbagrowane wjeski we Łužicy zaso natwarili. Zhromadnje z wobydlerjemi Choćebuza-Rogozna a bywšimi wobydlerjemi Łakomy su woni dwanaće drjewjanych běłych křižow znowa nastajili. Wot 1994 dopominaja na tymle městnje na zwjazkowej dróze mjez Choćebuzom a Picnjom drjewjane křiže na łužiske wjeski, kotrež běchu so brunicowych wuhlowych jamow dla zhubili. Dwanaće křižow steja symbolisce za cyłkownje 136 dospołnje abo zdźěla zhubjenych wjeskow.
Diskutuja wo reformje
Budyšin (SN/MiR). W Budyšinje přihotuja po wutworjenju Hornjołužiskich klinikow kaž tež Powołanskeho šulskeho centruma dalšu wulku inwesticiju. Tudyša wotnožka Rothenburgskeje wyšeje policajskeje šule za wu- a dalekubłanje na Budyskej Kantowej hasy ma dóstać wyšu hódnotu. Na tamnišej ležownosći ma nastać nowotwar, treningowy centrum ze zwučowanišćemi za zwěsćenje njezbožow a za wobknježenje połoženja. Nimo toho maja so wobstejace twarjenja wobnowić. Polěpšić maja so tež bydlenske wuměnjenja za šulerjow.
Bagdad (dpa/SN/K) Po tym zo běchu bojownicy teroristiskeje milicy Islamskeho stata (IS) njedźelu město Ramadi na zapadźe Iraka zdobyli, je po wudawanju UNO něhdźe 25 000 ludźi na ćěkańcy. Najwjetši dźěl z nich je po puću do stolicy Bagdada. Irakske instancy běchu do toho wo 7 000 ludźoch rěčeli, kiž su před namocu w regionje swoju domiznu wopušćili. Organizacije UNO kaž na přikład Program za zežiwjenje swěta (WFP) a dalše prócuja so wo to, zastarać ćěkancow ze wšěm najnuznišim, kaž z cyrobiznami, pitnej wodu a medikamentami.