Šulerske wolejbulowe mustwo starobneje klasy 4 (13 lět) Serbskeje wyšeje šule „Michał Hórnik“ Worklecy je wčera w Kamjencu regionalne finale w šulerskim wubědźowanju „Młodźina trenuje za olympiju“ dobyło. Z tym je so za krajne finale, kotrež budźe srjedź apryla w Grimmje, kwalifikowało. Cyłk wokoło sportoweho wučerja Křesćana Bejmaka (stejo zady nalěwo) z Pěskec a kapitana Kiliana Cyža z Njebjelčic bě jenički zastupjer wjesneje šule. Šulerski cyłk holcow samsneje starobneje klasy Serbskeho gymnazija Budyšin wudoby sej bronzowu medalju. Foto: Křesćan Bejmak

Łužiske lodohokejowe liški –

Krefeldske pinguiny 0:4

(0:1, 0:3, 0:0)

Tež na pjatku běchu Łužiske liški w lisćej jamje zaso za pukom honili, tola woni njedocpěchu žane wrota přećiwo Krefeldskim pinguinam a poćerpichu poražku 0:4. Do wuslědka hodźi so interpretować, zo wotběža partija chětro jednostronsce, štož pak cyle tak njetrjechi. Wšako mějachu Běłowodźenjo jara wjele dobrych wokomikow a swój podźěl na přewšo zabawnej mišterstwowej hrě. Dwě wěcy na kóncu wo rozdźělenju dypkow rozsudźištej. Mjeztym, zo so domjacy, we wuwostajenju najlěpšich móžnosćow za docpěće wrotow, jónu bóle pře­trjechichu, dowolichu woni hosćom, pře wjele třělwow z módreje linije, bjeztoho zo bychu swójski slot pod kontrolu měli. Wotfalšowana tarč a tři reeboundy rozsudźichu wo jasnym dobyćerju. Wrota za hosći docpěchu Marcel Müller, Victor Knaub a dwoje Dennis Miller. Kilian Hrjehor

Tabulka, lodohokej, DEL 2

1. EC Kassel Huskies  41104

2. ESV Kaufbeuren  4178

3. Ravensburg Towerstars 4274

4. Krefeldske pinguiny  4269

5. EC Bad Nauheim  4268

6. Lodowe lawy Drježdźany 4266

Cyłkownje 14 hrajerjow Chróšćanskeho prěnjeho mustwa běchu minjeny kónc tydźenja zhromadnje z trenarjom Pavelom Runtom swoje zymske treningowe lěhwo w Čěskej přewjedli.

Po tym zo běchu koparjo štwórtk w Jablonecu přenocowali, podachu so nazajtra z ćahom do Pólskich Jakuszyc (Jakuszyce). Wot tamnišeho Delnjošleskeho sportoweho centra „Polana Jakuszycka“ wočakowaše jich něhdźe 35 kilometrow dołha čara do Bedřichova, hdźež běše zdobom kwartěr Chróšćanow za přichodnej dwaj dnjej. W minjenym času bě so w Jizerskich horinach mnoho sněžiło, tak zo běchu wuměnjenja za sněhakowanje na dołhich čarach powšitkownje dobre. Jenož jedyn mały wotrězk čary běše chětro zalodźeny, tak zo dyrbjachu koparjo tu swoje sněhaki do rukow wzać.

Tomaš Henčl je wot dźensnišeho nowy šeftrenar prěnjeho koparskeho mustwa Sokoła Ralbicy/Hórki. 58lětny Łušćan přewozmje delanski cyłk wot dotalneho trenarja Krystofa Gloxyna. Gloxyn bě napo­sledk w dwójnej funkciji – wrotar a nazwučowar wokrjesneho wyšeho ligista.

Tomašej Henčlej, kotryž bě z Ralbičanskimi Sokołami w sezonje 2016/2017 wokrjesny pokal dobył, budźetaj jako kotrenarjej Róžeńčan Matijas Šnajder a jako mustwowy nawoda Ralbičan Maik Brězan poboku. Jörg Stephan