Cyril Pjech z Berlina je swoje mysle w zwisku z interviewom Milenki Rječcyneje z něhdyšim Kamjenskim wyšim měšćanostu Rolandom Dantzom, kotryž su Serbske Nowiny 6. meje wozjewili, napisał.
W rozmołwje Milenki Rječcyneje z bywšim Kamjenskim měšćanostu dźěše wo jara chutnu wěc, zběhnjenje porodneje kliniki a gynekologije, štož ja jara wobžaruju. Za mnje pak běše tež kónc rozmołwy jara zajimawy, hdźež so knjeni Rječcyna Dantza wopraša, hač je Lessing Serb był. Wón jej wotmołwi, zo z toho njewuchadźa, ale zo měło so to w Kamjencu hišće wuslědźić.
Runje to běch tež jónu spytał. Na Serbskej rozšěrjenej wyšej šuli – njewěm hižo, hač w předmjeće serbšćina abo němčina – storčich ze sobušulerku Jadwigu Rachelic (pozdźišo Mudrinej w Slepom) na tute prašenje. Ja běch so dopomnił, zo sym w knize Michała Nawki „Kwětki“ raz čitał, zo pochadźa swójbne mjeno Lessing najskerje wot serbskeho słowa lěsnik. Podachmoj so tuž do Kamjenca a woprašachmoj so tamnišeho ewangelskeho fararja za tym. Tón wězo praji, zo bě Lessing Němc. Nažel tehdy dale za tym slědźiłoj njejsmoj.
