Čitar Jan Wjenk z Wotrowa je so w zwisku z jubilejnej Božej mšu w awtodróhowej cyrkwi w Hornim Wujězdźe dnja 8. meje, na kotruž běše SN skedźbniła, słowa jimał:
W starym serbskim přisłowje rěka: Njechodź nihdy nimo cyrkwje a korčmy, jeli njejsy nutřka pobył. Přeprošenje w SN je mje pozbudźiło, sej do Hornjeho Wujězda na jubilejnu swjatočnosć składnostnje 30lětneho wobstaća awtodróhoweje cyrkwje dojěć. Běch jara hnuty hladajo na nimale połnu cyrkej. Mały kwartet dujerjow wulkotnje piskaše. Farar prědowaše. „Knjez je mój pastyr, na ničim nuzu njezměju“ z přewodom pišćelow wšitcy zhromadnje spěwachmy. Wohnjowy wobornik porěča wo byću cyrkwje a jeje potrjebje tež w dźensnišim času. Wón naspomni tež dźakownosć ludźi za dobrowólne dźěło wobornikow a tež za dźěło druhich dobrowólnych słužbow.
