Čitarka Regina Šołćina je komentar k podawkam kołowokoło zawrjenja porodoweje stacije Kamjenskeje chorownje zapósłała:
Pod nadpismom „Čas kupili – trajne rozrisanje pak widźomne njeje“ rozprawješe dnja 6. junija nowina Oberlausitzer Kurier wo nječłowjeskim a zrudnym jednanju zamołwitych Kamjenskeje chorownje, kotřiž běchu zawrjenje porodoweje a gynekologiskeje stacije wobzamknyli a kiž njejsu z tym jenož maćerje znjeměrnili a njewěste sčinili.
Před krótkim widźach bilancu z hoberskej ličbu wotehnaćow, a to samo maćerjow z prěnim dźěsćom! Tute maćerje su cyle jednorje w dušinej nuzy, dokelž nimaja snano sobučućiweje podpěry a njewidźa w swojej ćežkej hodźinje hižo swětło nadźije na wobzorje.
Prašam so: Su Kamjenscy zamołwići jenički raz na to pomyslili, kak by jich mać na tajki rozsud zhladowała, prjedy hač je jich porodźiła. Dźěše jim traš jenož wo swójske dźěłowe městno a zaručenje mamona w swójskej móšni?
