Andrea Pawlikowa so praša: Što budźe ze słowjanskim hrodźišćom w Radušu?
Zašły tydźeń wotewzach ze zawrjeneho muzeja pod hołym njebjom pola Wětošowa pućowacu wustajeńcu Serbskeho muzeja wo Serbskich cyrkwjach. Smjerć zrudny napohlad pomału rozpadowaceho słowjanskeho hrodźišća, kotrež bě wothladajo wot zbywacych šerjenjow poslednjeho halloweenspektakla dospołnje prózdne, zesylni njewjedro, kotrež runje cychnowaše. Jako bychu njebjesa z cyłeje duše sobu płakali. Mamy tola hišće 25 km zdaleny muzej pod hołym njebjom „Stary lud“ w Dešnje, snano něchtóžkuli praji. Ale Raduš hraješe pod dohladom Braniborskeho krajneho zarjada za pomnikoškit a Archeologiskeho krajneho muzeja w prěnjej lize sobu. Po wurywanjach spočatk 1990ych lět w zwisku z brunicowej jamu Bzež-zapad bu wobhrodźenje hrodźišća znowa natwarjene a w lěće 2003 w nim zarjadowany moderny muzej zjawnosći spřistupnjeny.
