Madźarsku z EU ćisnyć?
„Knježi jenož demokratija, hdyž so mi derje dźe?“
Za kuchinskim blidom nastawaja najlěpše rozmołwy – rozmołwy na samsnej runinje. Z wosebitym zarjadowanjom chce sakski hospodarski minister Martin Dulig (SPD) dowěru na bazy skrućić.
Budyšin (SN/BŠe). „Sydńće so ze mnu za blido a powědajće mi wo swojich starosćach.“ Takle namołwi Martin Dulig (SPD) ludźi wčera na Budyskich Žitnych wikach so k njemu za kuchinske blido sydnyć. Přeprosył bě sej wón tohorunja statnu ministerku za integraciju Petru Köpping (SPD) a tudyšeho měšćanostu Alexandera Ahrensa (njestronjan). Zarjadowanje přewjedźechu we wobłuku tuchwilnych Budyskich tydźenjow demokratije.
Wosebje tema ćěkancy je rozmołwu za kuchinskim blidom postajała. „Wo problemach njesměmy mjelčeć“, rjekny Ahrens. Ludźo rozprawjachu wo socialnej njerunosći. „Na tym měli dźěłać. Z wobydlerjemi Sakskeje a ćěkancami ma so jenak wobchadźeć“, wujasni Petra Köpping. Přiwšěm spytachu zastupjerjo strony AfD zarjadowanje za swoje zaměry znjewužiwać.
To a tamne (13.09.16)
Njezwučene zasadźenje mějachu pomocnicy ADAC. Jako dyrbješe mała nopawa do Nürnbergskeje zwěrjatownje, zalěze wona do karoserije awta. Dlěje hač dwě hodźinje spytachu ju hladarjo zwěrjatownje z awta wabić. A wona wutra tam cyłe štyri dny. Hakle přiwołani pomocnicy ADAC wotšrubowachu nutřkowne wukładźenje awta, hdźež nopawu skónčnje nańdźechu. Žona bě ju do kófroweho ruma zamknyła a do zwěrjatownje dowjezć chcyła.
Nowy rekord nošerjow narodneje drasty docpě njedźelu w Hornjej Bayerskej ležace město Beilngries. Tam je 3 414 ludźi w narodnej drasće na ludowy swjedźeń přišło. Na notarielnje kontrolowanym zarjadowanju zličichu jenož korektnje woblečenych nošerjow drasty. Hakle w awgusće nastajeny rekord města Kempten – 3 134 – bu tak přetrjecheny.
MIDAS chce wjetše čłonstwo
W Barcelonje wo boju nastupajo samostatnu Katalonsku so wobhonili
Barcelona (SN/JaW). Zjednoćenstwo dźenikow w mjeńšinowych a regionalnych rěčach Europy MIDAS, kotremuž tež Serbske Nowiny přisłušeja, chce so sylnišo w socialnych syćach prezentować. Tole wobzamkny jeho předsydstwo kónc tydźenja w katalanskej stolicy Barcelonje. Hač do hłowneje zhromadźizny MIDAS w aprylu ma sobudźěłaćer jeho sekretariata Marc Röggla naćisk za nowy wustup zhotowić. „Wažna je profesionalnosć, njejsmy amaterojo. Tak dyrbjeli z wotpowědnymi wotkazami na čłonske dźeniki skedźbnjeć a jich aktualne wozjewjenja šěrić“, rjekny čłon předsydstwa Bojan Brezigar ze słowjenskeho dźenika Primorski dnevnik w Italskej.
Wólby znowa přestorčene
Wien (dpa/SN). Wospjetowanje wólbow wo zastojnstwo zwjazkoweho prezidenta w Awstriskej je znowa přestorčene. Tak njehodźi so planowany termin 2. oktobra njedospołnych wólbnych kartkow dla dodźeržeć. Zaměr přiwšěm je wólby hišće lětsa přewjesć, a to wokoło 4. decembra. W njepłaćiwych wólbach w meji bě 880 000 wobydlerjow z wólbnej kartku swój hłós wotedało.
Wulka nuza w Sewjernej Koreji
Seoul (dpa/SN). Powodźenjow w Sewjernej Koreji dla je wulka nuza wudyriła. Kaž tamniše knježerstwo zdźěli, je na sewjerowuchodźe kraja 133 ludźi zahinyło, za 395 wosobami hišće pytaja. Znajmjeńša 140 000 ludźi trjeba nuznje pomoc. Powodźenja su wuslědk zliwkow. Taifun Lionrock bě kónc awgusta tež w Japanskej zachadźał, hdźež je 19 ludźi žiwjenje přisadźiło. W Sewjernej Koreji su nimo domow mjez druhim wobchadne puće a fabriki wobškodźene abo zničene.
W městach su dźěći najchudše
