„Štož je so njedawno w Berlinje stało, je w Brüsselu dawno prawidłownje na dnjowym porjedźe.“ To praješe hladajo na zwadne wothłosowanje wo migraciskej politice w zwjazkowym sejmje zapósłanc CDU w europskim parlamenće Oliver Schenk ­zašły pjatk w rozmołwje z našim wječornikom. W europskej demokratiji je normalita, „zo kóždy swoje namjety do parlamenta zapodawa a potom hlada, štó přihłosuje.“ Sakska je w europskim parlamenće poli­tisce jara mnohostronsce prezentna – nimo Schenka je šěsć dalšich zapósłancow: ­Matthias Ecke (SPD), Anna Cavazzini (Zwjazk 90/Zeleni), Carola Rackete (Lěwica), Jan-Peter Warnke (BSW), Siegbert Droese a dr. Maximalian Krah (wobaj AfD), byrnjež wšitcy w Sakskej (hižo) njebydlili. Kaž Ecke bydli Schenk w Drježdźanach a je samo politisku wotnožku we Łužicy załožił. To je dobre znamjo za naš region wosrjedź Europy, wosebje tohodla, dokelž je woči­widnje přichilnosć k Serbam k tutomu rozsudej přinošowała. Marcel Brauman

Chětro zadźiwani běchu ludźo, jako wuhladachu před dobrym lětom prěnje płoty w Rogeńskim parku na južnej kromje Choćebuza. Hnydom so prašachu, hač chcedźa sej zamołwići wotnětka snano zastup za park žadać. Mjeztym su sobudźěłaćerjo ­dalše płoty nastajili. Kaž direktor Załožby Rogeńskeho parka Stefan Körner rozłoži, maja płoty sadźenki před sornami škitać. Hermannowa hora z wosebje wjele dubowymi sadźenkami je tam tajke něšto kaž pěstowarnja štomow. Starosće pak wobradźeja zamołwitym tež škódniki, přećiwo kotrymž płoty njepomhaja. Skórnika dla dyrbjachu minjene lěta 500 dubow pušćić. Foto: Michael Helbig

Wiesbaden (dpa/SN). Produkcija mjasa w Němskej je po lěće 2016 zaso prěni króć přiběrała. Wotpowědnje ličbam Zwjazkoweho statistiskeho zarjada su w rězarnjach loni něhdźe 6,9 milionow tonow mjasa produkowali. To bě 97 000 tonow abo 1,4 procenty wjace hač 2023.

Hłowny jednaćel zwjazka mjasoweho hospodarstwa Steffen Reiter ma najnowše ličby za pokazku na zasadnu změnu wuwića: „Ludźo jědźa zaso wjace mjasa.“ Napinanja a inwesticije ratarstwa a mjasoweho hospodarstwa nastupajo škit klimy a skotu su so zadanili.

Što pak su přičiny noweho wuwića? Hospodarski fachowc slědźenskeho instituta YouGov Robert Kecskes wobkedźbuje změnu zwučenosćow. „Wulki trend k weganym a wegetariskim wudźěłkam je swój rozmach zhubił, tež mjez mło­dymi ludźimi.“ Runočasnje so přetrjeba mjasa stabilizuje. Mnozy drje mjenje mjasa jědźa. Zdobom su pak zwólniwi, wjace pjenjez za nje wudawać a produkty z wysokej hódnotu kupować. „Mjaso ma mjez ludźimi zaso wjetšu hódnotu“, tak slědźer wičnych zwučenosćow. Woprawdźitu změnu zwučenosćow wšak Kecskes njewidźi. Wón je sej wěsty, zo je kwalita mjasa dźeń a wažniša.

Pod Nutellu hišće butru abo nic? Tute prašenje njeje zwjazkowemu kanclerej Olafej Scholzej scyła wažne. „Zwjetša scyła njesnědam“, wotmołwi politikar SPD na prašenje šulerja na zarjadowanju we wobłuku wólbneho boja w Ludwigsburgu. Z Nutellu Scholz tak a tak wjele započinać njemóže: Wot swojeho dwanateho žiwjenskeho lěta wón tule šokolodźanu pomazanku njewužiwa.

Snadny wothłós je njewšědna akcija wólbneho boja Berlinskeho politikarja Lasse Hansena (27) žnjała. Minjenu sobotu chcyše wón w hosćencu w stolicy tysac Cheesburgerow předać a sej za kóždy runje jedyn cent žadać. Planowany nawal kaž něhdy pola Lukasa Podolskyja w Kreuzbergu pak wuwosta: Po informacijach Hansena su 400 Cheesburgerow rozdawali. Reporterojo nowiny B.Z., kotřiž su wo kurioznej akciji rozprawjeć chcyli, tole wobkrućić njemóžachu.