Dyrbimy wočaknyć, hač je chinski statny šef Xi Jingping hladajo na to, štož dyr­bjachu ruske jednotki w Ukrainje dožiwić, přeco hišće na přewšo wuskim zwjazkar­stwje z ruskim prezidentom Putinom ­zajimowany. Wobaj statnikaj chcyštaj so dźensa na kromje mjezynarodneje konferency w Samarkandźe zetkać. Při tym je Putin zhladajo na wojerske poražki, kotrež su jemu tež w Ruskej tójšto kritiki wunjesli, w dale słabšej poziciji. Nimo toho je Xi Jingping jasnu a jednotnu reakciju zapada na inwaziju w Ukrainje na wědomje brał. Podobnu reakciju dyrbi wón tež w zwisku ze swojimi planami nastupajo Taiwan wočakować. USA su mjeztym dalšu wojersku pomoc na dobro Ukrainy připowědźili a prezidentka komisije EU Ursula von der Leyen je rozsudźenosć EU potwjerdźiła, wotwisnosć zapada wot ruskeje energije přewinyć. W běhu wosom měsacow su so tektoniske platy swětoweje politiki raznje změnili, z wuskutkami, kotrež drje hišće mnohe lěta začuwamy. Marko Wjeńka

Berlin (dpa/SN). Po prěnim kole tarifowych jednanjow sakskeje metaloweje a elektroindustrije žada sej dźěłarnistwo IG metal jednanja kmany poskitk dźěłodawarjow. Po štyrjoch lětach bjez zwyšenja mzdy a dale stupacych płaćiznow „wočakuja přistajeni wot dźěłodawarjow sylny skutkowny poskitk“, wuzběhny wčera nawodnica wobwodow Berlin, Braniborska a Sakska, Irene Schulz.

Do jednanjow bě sej IG metal zwyšenje mzdy wo wosom procentow za ně­hdźe 3,9 milionow dźěławych branše žadała. Tole je najwyše žadanje za metalowu a elektroindustriju wot lěta 2008. Tehdy žadaše sej dźěłarnistwo tohorunja wosom procentow wjace mzdy.

Jednanske koło je so bjez wuslědkow kónčiło. Dźěłodawarjo njejsu žadyn poskitk předpołožili a město toho swoje přeće za „nulowym kołom“ přednjesli. Z tym postarachu so wo eskalaciju. „Dźěłodawarjow warnuju, wolu dźěławych podhódnoćić“, Irene Schulz podšmórny.

Minjeny kónc tydźenja bě něhdźe 2 000 přistajenych ze Sakskeje, Berlina a Braniborskeje w Lipsku za zwyšenje mzdow demonstrowało. Přichodne jednanske koło je w Swobodnym staće 14. oktobra planowane.

Po 142 lětach chcedźa w Šwicarskej kónc lěta ćišćanu telefonowu knihu doskónčnje wotstronić. Wot 2023 wozjewja priwatne telefoniske čisła jenož hišće internetnje, zdźěla zhotowjer knihow Localsearch w Zürichu. Dale a mjenje ludźi swoje priwatne čisła wozjewja, předewzaće informuje. Nimo toho ma dźeń a wjace ludźi jenož hišće mobilny telefon.

Za paduchami gullyjowych wěkow pyta policija w južnej Předpomorskej. Njeznaći běchu minjene dny wjace hač 20 tajkich železnych wěkow pokradnyli, policija w Pasewalku zdźěli. Potrjechene běchu wjacore dróhi w Penkunje, Krackowje a Bismarku njedaloko pólskeje mjezy. Policija namołwja šoferow k wosebitej kedźbnosći, dokelž móža pobrachowacych wěkow dla strašne dźěry nastać.

Straßburg (dpa/SN). K wolóženju přetrjebarjow maja so nadměrne dobytki energijowych předewzaćow w EU přichodnje wotwjesć a přerjadować. Tole připowědźi dźensa prezidentka komisije EU Ursula von der Leyen w Straßburgskim Europskim parlamenće a namjetowaše zakoń přećiwo wysokim energijowym płaći­znam. Tajki potrjechi producentow wobnowjomneje miliny kaž tež płunowe a wolijowe koncerny. „Naš namjet stronskim statam wjace hač 140 miliardow eurow wunjese, zo by nuza bjezposrědnje woteběrała“, von der Leyen wuswětli.

Winowatosć wopodstatniła

Erfurt (dpa/SN). Prezidentka Zwjazkoweho dźěłoweho sudnistwa w Erfurće Inken Gallner je wčera winowatosć dźěłoda­warjow k systematiskemu zwěsćenju dźěłowych časow swojich dźěławych wo­podstatniła. Fachowcy liča z tym, zo móže zakładny zasadny wusud daloko sahace wuskutki na dotal w hospodar­stwje a zarjadnistwje praktikowane modele dowěrneho dźěłoweho časa hač k mobilnemu dźěłu a homeofficu měć, dokelž je z tym wjace kontrole trěbne.

Hižo w nocy čakali