Ukrainske wójsko ofensiwu zahajiło
Kijew (dpa/SN). Poł lěta po nadpadźe ruskich wojerskich jednotkow na juh Ukrainy je ukrainska armeja přećiwnu ofensiwu zahajiła. Při tym móžachu prědnje zakitowanske linije ruskeje armeje na wjacorych městnach přełamać, ukrainske wójsko zdźěla. Prezident Wolodymyr Zelenskyj w swojej narěči ofensiwu jenož naspomni, dokelž nochcyše nadrobnosće přeradźić. „Tola okupanća měli wědźeć, zo jich přez mjezu ćěrimy, kotraž přeco hišće wobsteji.“ Ruscy wojacy, kotřiž chcedźa přežiwić, „měli nětko domoj hić“, Zelenskyj rjekny. Při wšěm njeje wjele faktow ofensiwy znate. Po informacijach južneje skupiny ukrainskeje armeje su separatistow a rusku marinowu infanteriju nuzowali, so wróćo sćahnyć. Po informacijach sćelaka CNN w USA su ukrainske jednotki štyri wsy wuswobodźili.
Ruske zakitowanske ministerstwo je ukrainski nadpad wobkrućiło. Zdobom w Moskwje twjerdźa, zo je wona „žałostnje zwrěšćiła“. Pozdatna ofensiwa je „kaž přeco fake ukrainskeje propagandy“.
Połoženje so přiwótřiło
W Němskej pobrachuje po trochowanju něhdźe 40 000 wučerjow
Berlin (dpa/SN). K zahajenju noweho šulskeho lěta pobrachuje na šulach Němskeje po posudku Zwjazka wučerjow Němskeje hač do 40 000 wučerkow a wučerjow. Wučbne zastaranje je so we wšitkich zwjazkowych krajach dale pohubjeńšiło, rjekny prezident zwjazka Heinz-Peter Meidinger powěsćerni dpa. „Po wšej Němskej wuchadźamy wot woprawdźiteho njedostatka 30 000, snano samo 40 000 njewobsadźenych městnow.“
Połoženje, městna z derje wukubłanymi wučerjemi wobsadźić, je so přirunujo z lońšim lětom hišće raz přiwótřiło“, rjekny předsydka dźěłarnistwa kubłanje a wědomosć (GEW) Maike Finnen. „Wupad wučby hnydom na spočatku šulskeho lěta je hižo woprawdźitosć, wjetše wučbne skupiny, šmórnjenje spěchowanskich poskitkow a skrótšenja hodźinskich taflow su na dnjowym porjedźe“, rjekny Udo Beckmann, předsyda Zwjazka zdźěłowanje a kubłanje.
To a tamne (30.08.22)
Swój dom wo 150 metrow přesunyć chce bur w Indiskej noweje awtodróhi dla. Nowu čaru chcedźa runje tam twarić, hdźež poměrnje nowy dwuposchodowy dom steji. Knježerstwo bě burej wotškódnjenje 100 000 eurow poskićiło. To pak by mjenje było, hač je muž před lětami za twar domu wudał. Mjeztym su dźěłaćerjo hrjebje wuzběhnyli a z hydrawliskej techniku dom wo něšto metrow přesunyli.
Kłok k pohłušenju wopicy je w Japanskej mylnje žonu trjechił. Žona bě měšćanske zarjadnistwo Tokioskeje susodneje prowincy Shizouka informowała, zo njedaloko dwórnišća wopica dunda. Na to přińdźe fachowc, zo by zwěrjo pohłušił a popadnył. Jako třělbu přihotowaše, njewotpohladnje třěli. Žona bu wot kłoka při ruce trjechena a so zwjeze, móžeše pak chorownju krótko na to zaso wopušćić. Nětko pad přepytuja.
Žadaja sej reformy
Rom (B/SN). Katolikojo w Italskej přeja sej wjace wotewrjenosće, transparency a wobdźělenje lajkow w zwisku ze synodalnym procesom na swěće, zdźěli italska biskopska konferenca. „Začuće, zo jedyn na druheho słucha, je zawěsće to najwjetše znowawotkryće synodalneho procesa a prěni nimoměry hódny wupłód“, pisaja w dokumenće na internetnej stronje biskopskeje konferency. Na naprašowanju je so 500 000 ludźi z 50 000 synodalnych skupinow wobdźěliło.
Młodźinske zetkanje
Taizé (B/SN). Prezidentka komisije Europskeje unije Ursula von der Leyen je 27. awgusta swětowe zetkanje młodźiny w francoskim měsće Taizé wopytała, zo by wo europskich temach z wobdźělnikami rěčała. Taizé je lětdźesatki woblubowane zetkanišćo swětoweje młodźiny. Frère Alois, prior bratstwa Taizé, wjeseli so, zo je so wot jutrow sem wjace hač 20 000 młodostnych ze wšeho swěta na tydźenskich zetkanjach k zhromadnemu modlenju, k rozmołwam w małych skupinkach a na praktiskim sobudźěle wobdźěliło. Bratstwu přisłuša sto mužow z 30 krajow, kotřiž su sobustawojo ewangelskeje a katolskeje cyrkwje.
Biskop zajaty
Po puću k milinarni w Ukrainje
Wien (dpa/SN). Fachowcy Mjezynarodneho atomoweho energijoweho zarjada IAEA chcedźa hišće tutón tydźeń wot Ruskeje wobsadźenu atomowu milinarnju Saporiššja w Ukrainje wopytać. Kaž nawoda IAEA Rafael Grossi informuje, je so dźensa ze 14 wosobow wobstejace mustwo na puć do Ukrainy podało, hdźež jich přichodne dny wočakuja. Milinarnju běchu ruske jednotki w měrcu wobsadźili. Stajnje zaso dóńdźe k třěleńcam, Moskwa a Kijew so mjez sobu wobwinujetej.
Wuhódnoća akciju z jězdźenku
Berlin (dpa/SN). Krótko do kónca płaćiwosće 9-eurow-jězdźenki w bliskowobchadźe su wobchadne zawody dźensa akciju wuhódnoćili. Hač do spočatka awgusta běchu w Němskej 38 milionow jězdźenkow předali. Měsačne jězdźenki běchu za junij, julij a awgust poskićeli, zo bychu ludźom hladajo na stupace energijowe płaćizny pomhali. Němska železnica ma to za wulki wuspěch a žada sej naslědne rjadowanje.
Raketa po puću k měsačkej
Połoženje w dospołnje přepjelnjenym nižozemskim azylowym ...
Habeck změny připowědźił
Bamž zetkawa so z kardinalemi
Němska a Pólska wuradźujetej
Mrěće rybow we Wódrje poćežuje mjezystatny poměr
Bad Saarow (dpa/SN). Zwjazkowa ministerka za wobswět Steffi Lemke žada sej hladajo na masiwne mrěće rybow hnydomne skónčenje wutwara Wódry na pólskej stronje. „Rozměr škodowanja drohotneho ekosystema Wódry njeje hišće wotwidźeć“, rjekny Lemke powěsćerni dpa do posedźenja dźensnišeje němsko-pólskeje wobswětoweje rady w Bad Saarowje w Braniborskej. Politikarka Zelenych a jeje pólska kolegina Anna Moskwa wuradźujetej wo sćěhach wobswětoweje katastrofy.
„Dalše negatiwne wliwy dyrbimy wobeńć“, rjekny Lemke. „Před tutym pozadkom je z mojeho wida tež wutwar pomjezneje rěki jara problematiski a dyrbi so nětko zadźeržeć.“ Přičina mrěća rybow njeje hišće wujasnjena. Za wuslědźenje přičinow su mjeztym zhromadnu skupinu fachowcow wutworili.
Dźe tež wo to, kročele zahajić, „zo móhli ćežko škodowany ekosystem Wódry zhromadnje z Pólskej wobnowić“. Mjezy překročace wotběhi při tajkich podawkach dyrbjeli so nimo toho polěpšić, zo hodźało so tajkemu katastrofalnemu rozměrej w přichodźe zadźěwać, rjekny Lemke.
To a tamne (29.08.22)
Ilegalnje natwarjenej sto metrow wulkej wysokodomaj rozbuchnyli su w Indiskej. Sudnistwo bě před lětom wotstronjenje wobeju domow přikazało, dokelž njebě priwatny twarski předewzaćel twarske předpisma dodźeržał. Nimo toho tehdy wukazachu, kupcow bydlenjow wotškódnić a tež sobudźěłaćerjow zarjadow chłostać, kiž běchu twarskim planam přizwolili. Za rozbuchnjenje nałožowachu 3 700 kilogramow rozbuchliny. Na akciji wobdźělichu so fachowcy z wjacorych krajow, rozprawjeja indiske medije.
W bydlenju susoda so spać lehnył je 21lětny w bayerskim Ichenhausenje. Wobydler wołaše policiju, dokelž bě „cuzeho muža w spanskej stwě“ wuhladał. Policija muža do swójskeho bydlenja přewodźeše. Kak bě wón do bydlenja přišoł njeje znate. Prawdźepodobnje njeběchu durje zamknjene, policija tuka.
