To a tamne (30.09.21)
Do swobody pušćić chcychu w běhu dnja tři sorny, kotrež hižo tři dny na twarnišću noweho jastwa za młodostnych w Hamburgu-Billwerder žiworja. Zwěrjata běchu so prawdźepodobnje na ležownosć jastwa dóstali, jako dźěłaćerjo twarski płót nastajichu. Sorny su z nadosć picu a wodu zastarane. Hajnik chcyše dźensa płót wočinić.
Dospołnje putany wot napohlada hrodu Hohenschwangau je šofer sportoweho awta po schodźe pěškow dele jěł. Při tym wobškodźi 39lětny wjacore schodźenki. Škoda wučinja 3 000 eurow. Po powučenju policije móžeše šofer dale jěć. Hród Hohenschwangau steji w susodstwje hrodu Neuschwanstein w Bayerskej, kiž přiwabja kóžde lěto syły turistow.
Paducha rolera přelesćił je muž w bayerskim Fürthće. Njeznaty bě tydźenja wotstajeny roler pokradnył. Nan wobkradnjeneje holcy něšto dnjow pozdźišo zwěsći, zo poskićuja 180 eurow drohe dźěćace jězdźidło w interneće. Muž sej z poskićowarjom rolera termin dojedna a informowaše policiju. Kaž dojednane, přińdźe pozdatny paduch z rolerom k dojednanemu městnu, hdźež jeho policija wočakowaše. 14lětneho zajachu.
Lange so starosći
Zhorjelc (dpa/SN). Zhorjelski krajny rada Bernd Lange so po debaklu CDU při wólbach zwjazkoweho sejma wo pobrachowacy wliw w Berlinje za region starosći. „W Berlinje nětko žadyn hłós wjace nimamy“, rjekny politikar CDU. Wón ma mało nadźije, zo móhł znowa wuzwoleny direktny kandidat AfD Tino Chrupalla za region skutkownje něšto nastorčić. Saksku CDU w nowym zwjazkowym sejmje jenož hišće sydom zapósłancow zastupuje, do toho běše jich dwanaće.
Z 32,5 procemtami je AfD we wólbnym wokrjesu Zhorjelc po cyłym Zwjazku najwjace hłosow dóstała.
Zaměr šćěpjenja njedopjelnjeny
Genf (dpa/SN). Zaměr swětoweje strowotniskeje organizacije (WHO), hač do kónc septembra w kóždym kraju znajmjeńša dźesać procentow ludźi přećiwo koronawirusej šćěpić, njejsu spjelnili. Tole wuchadźa z dźensa wozjewjeneje rozprawy WHO. W mnohich krajach, předewšěm w Africe, je kwota šćěpjenja wo wjele niša. WHO bohate kraje namołwja, chudym krajam wjace seruma přewostajić. Organizacija kritizuje, zo bohate kraje šćěpiwo składuja, mjeztym zo miliony ludźi nuznje na prěnje šćěpjenja čakaja.
Hrozy znowa shutdown
Washington (dpa/SN). W USA hrozy znowa strach, zo dyrbja ministerstwa knježerstwa swoje dźěło přetorhnyć, dokelž nimaja wjace pjenjezy. Republikanojo su w senaće předłohu knježerstwa wotpokazali, z kotrejž bychu financowanja knježerstwa tež po kóncu etatoweho lěta zaručili. Nowe etatowe lěto zahaja 1. oktobra, potajkim pjatk. Njeje-li hač do toho nowy etat schwaleny, hrozy „shutdown“ w dźělach knježerstwa. Prezident Joe Biden chcył tomu na kóždy pad zadźěwać.
Znowa klimowy stawk
Něhdźe tysac stopnjow horca lawa z wulkana na kanariskej kupje La ...
„Wosoby wuměnić njedosaha“
Jenož hišće 2G
Zeleni a FDP z prěnimi rozmołwami
Berlin (dpa/SN). Dospołnje njewočakowano su so wodźacy zastupnicy Zelenych a FDP hižo wčera wječor k prěnim rozmołwam wo móžnym wobdźělenju w nowym knježerstwje zetkali. Předsydaj Zelenych Annalena Baerbock a Robert Habeck zetkaštaj so z předsydu FDP Christianom Lindnerom a generalnym sekretarom strony Volkerom Wissingom. Wšitcy štyrjo stajichu foto kwarteta do interneta a pisachu: „Pytajo za nowym knježerstwom pruwujemy zhromadnosće a mosty nad so dźělacym, a smy samo něšto namakali. Napjate časy.“
Zeleni a liberalni móhli po wólbach zwjazkoweho knježerstwa tak mjenowanu amplowu koaliciju z SPD abo tež zwjazk z CDU wutworić. SPD z kanclerskim kandidatom Olafom Scholzom je wólby dobyła. CDU je razne straty poćerpjeła. Hłowny zaměr Zelenych a FDP je, so na zasadne směrnicy zhromadneho politiskeho dźěła jako wuměnjenje za „nowostart“ knježerstwoweje politiki dojednać. Hakle pozdźišo chcedźa ze stronu móžneho kanclera rěčeć.
