Berlin (dpa/SN). Ze zetkanjom zastupnikow CDU/CSU a Zelenych je so dźensa dopołdnja prěnje koło sonděrowanskich rozmołwow wo nowym zwjazkowym knježerstwje skónčiło. Zeleni prócuja so po wólbach zwjazkoweho sejma wo tak mjenowanu amplowu koaliciju z SPD a FDP. Zdobom woni tež zwjazk z uniju a FDP, tak mjenowanu jamaisku koali­ciju, njewuzamkuja. To by poslednja šansa za kanclerskeho kandidata CDU/CSU Armina Lascheta była, uniju po historiskej wólbnej poražce 26. septembra tola hišće do kanclerskeho zarjada wuchować. Tež FDP njeje so w prašenju móž­neje koalicije hišće rozsudźiła, chila pak po wobsahach skerje k uniji.

Unija je Zelenych dźensa na campus Euref do Berlina přeprosyła. Laschet poski­ća jim „koaliciju přichoda“ a zwjazuje z tym tež symboliku: Na campusu slědźi 5 000 ludźi k temam energija, mobilita a dołhodobna skutkownosć.

Praha (dpa/SN). Wotkryća tak mje­no­wa­nych „Pandora papers“ stajeja po­li­tika­rjow a prominentnych jich pje­njež­nych počinanjow dla po wšěm swěće pod ćišć. Politikarjo, předewzaćeljo a sportowcy su přez lěta dubiozne financne přede­wzaća wužiwali, zo bychu swoje zamóženje chowali abo na njepřewidne wašnje za imobilije wudali. Tole zwěsći zwjazk wotkrywacych žurnalistow, po tym zo su nimale dwanaće milionow dokumentow wuhódnoćili. Tak bě jordaniski kral Abdullah II. za ležownosće w USA a Wulkej Britaniskej 100 milionow dolarow wudał.

We wuskosćach je tež čěski ministerski prezident Andrej Babiš. Wón bě sej pječa za 15 milionow eurow wosobny statok we wjesnym rumje w Francoskej kupił a jón na njetransparentne wašnje zapłaćił. Babiš wšitke wumjetowanja wotpokazuje. Wón ma wozjewjenja něšto dnjow do wólbow za pospyt, jeho wo­sobinsce wočornić a wuslědk wólbow wobwliwować. W Čěskej budźe kónc tydźenja nowy parlament woleny.

Zakoń wo lěpšim medicinskim zastaranju we wjesnych kónčinach schwalili

Drježdźany (dpa/SN). Sakski krajny sejm je minjeny štwórtk zakoń wo lěpšim lěkarskim zastaranju we wjesnych kónčinach wobzamknył. Při tym dźe hłownje wo to, zawjesć tam wěstu kwotu za lěkarjow. Młodym žonam a mužam poski­ćeja studij mediciny zwonka płaćiweho numerusa claususa, jeli so po wukubłanju na fachoweho lěkarja na dźesać lět dźěła w kónčinje z pobrachowacymi lěkarjemi zawjazaja. Cyłkownje chcedźa 6,5 procentow studijnych městnow mediciny za potrjechenych rezerwować.

„Ličby su alarmowace. Wot dotal ně­hdźe 2 600 domjacych lěkarkow a lěkarjow w Sakskej w přichodnych pjeć do sydom lětach wulki dźěl na wuměnk woteńdźe. Zo bych to hišće jasnišo rjekła: Kóžda štwórta lěkarka a kóždy štwórty lěkar je mjeztym starša/starši hač 60 lět, kóžda dźesata/kóždy dźesaty je starša/starši hač 65 lět“, rjekny strowotniska ­ministerka Petra Köpping (SPD). Jedyn z domjacych lěkarjow ze 96 lětami přeco hišće praktikuje, wona podšmórny.