Nochce wjace
Berlin (dpa/SN). Po šěsć a poł lěće na čole AfD so Jörg Meuthen wróćo sćehnje a nochce po intensiwnych rozmołwach ze swójbu znowa za předsydstwo strony w decembrje kandidować. To je wón čłonam wčera w lisće oficialnje zdźělił. Zhromadnje z Tinom Chrupallu ze Zhorjelskeho wokrjesa 60lětny AfD nawjeduje. Swojeho politiskeho dźěła so Meuthen přiwšěm wzdać nochce a budźe „swój hłós słyšomnje zasadźeć“. Tuchwilu je wón zapósłanc Europskeho parlamenta. W zašłymaj dwěmaj lětomaj bě Meuthen za poměrniši kurs w stronje, štož pak jemu njepřećelow wunjese. Wosebje prawicarsce wusměrjene hibanje wokoło durinskeho šefa Björna Höcki je přećiwo njemu dźěłało. Mjeztym tež zwjazkowy wustawoškit prawicarskoekstremne hibanje wobkedźbuje.
To a tamne (12.10.21)
Dokelž nochcyše 50lětny muž předołho na chorobne awto za swojeho wuja čakać, wudawaše so wón wčera jako mordar a praji policiji při telefonje, zo je wuja zakłół. Wjacore policajske awta, nuzowy lěkar a wuchowanske awto jědźechu tuž do Steinheima nad rěku Murr. Tam wšak nańdźechu jenož muža, kotrehož chribjet boleše. 50lětny ma nětko z chłostanskim jednanjom ličić.
Hudźbnicy wosom orchestrow z wjacorych zwjazkowych krajow pokazachu njedźelu wulku solidaritu ze swojimi kolegami w bayerskim Bad Kissingenje a wuhotowachu flashmob-koncert. Něhdźe 50 hudźbnikow je so na zarjadowanju wobdźěliło. Hižo dlěje wojuja přistajeni kuroweho orchestra w Bad Kissingenje wo tarifowe zrěčenje a lěpše dźěłowe wuměnjenja, město pak dotal k rozmołwam zwólniwe njeje.
Kak su křesćenjo wolili
Mannheim (B/SN). Kak su katolscy a ewangelscy wěriwi Němskeje zwjazkowy sejm wolili, je wosebita slědźerska skupina zwěsćiła. Tak je so zwjazanosć křesćanow k CDU/CSU dale pomjeńšiła, na tamnej stronje je jich SPD bóle k sebi wjazać zamóhła. Katolikojo su z 35 procentami swój křižik pola CDU/CSU stajili (2017: 44 proc.), protestanća ze 24 procentami (2017: 33 proc.). Za SPD rozsudźi so 23 procentow katolikow (2017: 18 proc.) a 30 procentow protestantow (2017: 24 proc.). Ličby bazuja na 41 373 woprašanych wolerkow a wolerjow. Mjez katolikami su Zelenych 13 procentow, FDP 11 proc., AfD 8 proc. a Lěwicu tři procenty wolili. Mjez ewangelskimi wolerjemi běchu za Zelenych 15 proc., za FDP 11 proc., za AfD 9 proc. a za Lěwicu štyri procenty.
Po synodalnej zhromadźiznje
Z lóštneho kwisa samo hišće něšto nowe zhonili
Radšo zarjadowanje přestorčić a pozdźišo přewjesć, hač je cyle wupadnyć dać. To prajištej sej Serbske ewangelske towarstwo a hosćićelska Rakečanska Bjesada a přeprosyštej sobotu na lětušu dźěłarničku.
Rakecy (GH/SN). Na swoju dźěłarničku je Serbske ewangelske towarstwo serbske Bjesady sobotu do Rakec přeprosyło. Tele zarjadowanje ewangelskich Bjesadow wotměwaja prawidłownje jónu wob lěto, zwjetša hižo w prěnim kwartalu. Koronapandemije dla pak stej towarstwo a Rakečanska Bjesada jako hosćićelka lětsa nowy, njezwučeny nazymski termin woliłoj. A tež na wonym terminje płaćeše, zo su hosćo šćěpjeni, wustrowjeni abo testowani. Najebać to je něhdźe 20 wobdźělnicow a wobdźělnikow z Bukec, Hodźija, Budyšina a Rakec do tamnišeje farskeje bróžnje přichwatało.
Přijomne słónčne wjedro bohudźak dowoli, zo njetrjebachu Bjesadnicy cyły čas nutřka wostać. Tak wotmě so zarjadowanje zdźěla wonka pod hołym njebjom.
Kretschmer: Bazu zapřijeć
Berlin (dpa/SN). Nawodnistwo CDU ze swojim šefom Arminom Laschetom je dźensa w Berlinje wo konsekwencach wólbneje poražki wuradźowało. Sakski minister prezident Michael Kretschmer (CDU) žadaše sej do zahajenja posedźenja, hišće lětsa stronski zjězd přewjesć, hdźež njeměło jenož wo zastojnstwo šefa hić, ale wo cyłozwjazkowe nawodnistwo. „Njetrjebamy jeno předsydu, ale cyły team, kotryž nadawki z wjeselom wukonja“, wón wuzběhny. Na tym měła so tež baza strony wobdźělić.
Liči hišće lětsa z koaliciju
Berlin (dpa/SN). Wicešef SPD Kevin Kühnert liči hišće lětsa z koaliciju SPD, Zelenych a FDP. „Z toho kruće wuchadźam“, rjekny wón dźensa rano sćelakej ARD. „Rozmołwy su so derje a dowěrliwje započeli. Wotnutřka ničo njesłyšiš, štož je dobry zakład.“ Po jeho słowach je etatowa a financna politika najwjetše wužadanje rozmołwow, hdźež měli so zastupjerjo na kompromisy dojednać.
Zwjazk žada sej přiražki
Po cyłej Pólskej kaž tu w Krakowje su tysacy ludźi přećiwo ...
Knježerstwo druhu šansu dóstało
Wien (dpa/SN). Dwaj dnjej po tym zo je w Awstriskej zwjazkowy kancler Sebastian Kurz wotstupił, dóstanu tam noweho šefa knježerstwa. Zwjazkowy prezident Alexander Van der Bellen chcyše dźensa připołdnju 52lětneho Alexandera Schallenberga jako kanclera spřisahać. Schallenberg a wicekancler Werner Kogler mataj nětko wobstejacu koaliciju dale wjesć. Najebać krizu knježerstwa mataj za to kruty fundament, kaž wonaj přezjednje zwurazništaj. Zwjazkowy prezident pak wobeju k wěcownemu a konstruktiwnemu zhromadnemu dźěłu namołwja, a to na dobro Awstričanow.
Předwčerawšim wječor je Sebastian Kurz (ÖVP) po wozjewjenju podhlada korupcije dla wotstupił. To bě za Zelenych, kotřiž knježerstwo w kraju sobu nawjeduja, wuměnjenje, zo koalicija z ÖVP dale wobsteji. Schallenberg hižo dlěje w politice skutkuje a bě dotal we wonkownym ministerstwje aktiwny. Wjacerěčny, mjezynarodnje nazhonity diplomat zastupuje w migraciskim wobłuku runje tak kruty kurs kaž jeho předchadnik.
Njeje samozrozumliwe
Podpěra přilubjena
Drježdźany (dpa/SN). W Sakskej trjeba wjele komunow financnu podpěru, zo móhli narokam měšćanskeho twarstwa wotpowědować. Kaž sakske ministerstwo za regionalne wuwiće minjeny pjatk w Drježdźanach zdźěli, chcedźa bórze něhdźe 152 milionow eurow cyłkownje 113 městam přewostajić. Połojca sumy je z hornca Zwjazka, tamny dźěl přida Swobodny stat Sakska. Nimale 200 twarskich naprawow móža tak spěchować. Wosom z nich je we wotpowědnych programach zakótwjenych, z čehož profituja mjez druhim Radeberg, Kamjenc a Wjelećin.
„W zwisku z měšćanskim twarom steja naše komuny před wulkimi wužadanjemi. Koronapandemija a klimatiske wuwića swoje slědy zawostajeja, a tuž je ćežko nutřkowne města a centrumy žiwjenjahódne a atraktiwne wuhotować“, zwurazni sakski minister za regionalne wuwiće Thomas Schmidt (CDU). Pjenjezy su přinošk, zawěsćić runohódne žiwjenske poměry.
Spěchowanske srědki su z třoch programow k dispoziciji. Wone mjenuja so „žiwe centrumy“, „socialna zhromadnosć“ a „rozrost a dołhodobne ponowjenje“.
To a tamne (11.10.21)
Tež kompjuter móže so z popstarom stać. To dopokazachu wědomostnicy, kiž su program z informacijemi Beethovenskeje hudźby pjelnili, a tón je 10. sinfoniju skomponował. Ludwig van Beethoven dźě bě swój čas dźewjeć sinfonijow stworił. Wuslědk eksperimenta bě kónc tydźenja na Bonnskim Telekom-forumje słyšeć. Kompoziciju móža sej zajimcy tež na cejdejce z mjenom „Ludwig van Beethoven X – The Al Project“ naposkać.
„Horcy“ hudźbny widejo w katedrali města Toledo – tu porik jara erotisce rejuje – zbudźa w katolskej cyrkwi Španiskeje wulku kritiku. Mjeztym je samo rěč wo „wójnje“. Arcybiskop z Toleda Francisco Cerro Chaves prosy wo zamołwjenje. Dekan katedrale Juan Miguel Ferrer Grenesche pak ma twórbu za wuraz čłowjeskeje lubosće. Po wozjewjenju wideja je sej 3,7 milionow ludźi w běhu 48 hodźin twórbu wobhladało a pozitiwnje hódnoćiło.
