Steinmeier pola pólskeho prezidenta
Waršawa/Berlin (dpa/SN). Zwjazkowy prezident Frank-Walter Steinmeier poda so dźensa składnostnje 30. róčnicy podpisanja němsko-pólskeho zrěčenja wo dobrym susodstwje do Waršawy. Tam wočakowaše jeho pólski statny prezident Andrzej Duda. Zaměr wopyta Steinmeiera je „znamjo rukuzawdaća a zhromadneho zhladowanja na přichod“, najebać wšitke ćeže, kotrež w poćahach mjez krajomaj eksistuja, kaž prezidialny zarjad w Berlinje zdźěli. Duda a Steinmeier chcetaj z młodostnymi wobeju krajow diskutować a bywšeho pólskeho jateho němskeho koncentraciskeho lěhwa zetkać.
Němsko-pólske zrěčenje běchu 17. junija 1991 podpisali. W nim sej krajej mjezsobnje přilubjatej, wšitke konflikty jenož hišće z měrniwymi srědkami rjadować.
Na 30. róčnicu zrěčenja dopominał je tež braniborski ministerski prezident Dietmar Woidke. W Frankfurće nad Wódru skedźbni wón na „samozrozumliwosć, z kotrejž so Němcy a Polacy mjeztym jako susodźa zetkawaja“.
Skromny spočatk
Fridays for future zaso prawidłownje
Berlin (dpa/SN). Aktiwisća hibanja Fridays for future chcedźa přichodne tydźenje do wólbow zwjazkoweho sejma kóždy pjatk na dróhu hić a za lěpši škit klimy demonstrować. To je organizacija wčera zdźěliła.
Hižo jutře, pjatk, chcedźa w 23 městach Němskeje protestować, mjez druhim w Berlinje, Hamburgu a Kölnje. Po informacijach hibanja Fridays for future budu na akcijach tež dźěłarnistwo ver.di, sportowe towarstwa a cyrkwje wobdźělene. Najebać woteběracu ličbu infekcijow z koronawirusom chcedźa tež dale předpisy hygieny dodźeržeć. Předsyda dźěłarnistwa ver.di Frank Werneke sej w tym zwisku žada, ludźom wudawki za klimoškitne naprawy zarunać.
Hibanje Fridays for future wojuje wot lěta 2018 wo lěpši škit klimy. Koronapandemije dla běchu zamołwići protestne akcije minjene měsacy nachwilnje přetorhnyli.
To a tamne (17.06.21)
Z hłowu w betonowym bloku tčacy wostała je liška w jendźelskim Littlehamptonje a dyrbješe tam pjeć hodźin wutrać, doniž ju njewuswobodźichu. Młode zwěrjo bě kusk tykanca wuslědźiło, kotryž měješe poprawom kuntwory přiwabić. Čłonojo organizacije za zwěrinoškit su lišku w mjezyčasu z wodu zastarali. Skónčnje so wohnjowym wobornikam poradźi betonowy element rozrězać.
Přesadźowanje stareho awta ma za badensku gmejnu Oberwolfach bolostne sćěhi: Gmejna bě ležownosć ze starej kólnju kupiła. W njej steješe za staplowanym drjewom dawno zabyty oldtimer, kotryž je gmejna bjez wahanja za 24 500 eurow na awkciji předawa. Sudnistwo pak nětko rozsudźi, zo dyrbi gmejna pjenjezy a dań bywšej wobsedźerce kólnje wróćić. Citroën 2 CV steješe tam nimale 30 lět a je runje 14 kilometrow jěł.
Biden a Putin so zetkałoj
Genf (dpa/SN). Po lěta trajacej ćežkej konfrontaciji mjez Washingtonom a Moskwu chcyštaj so prezidentaj USA a Ruskeje, Joe Biden a Wladimir Putin, dźensa w Genfje zetkać. Biden bě Putina na wjeršk přeprosył. Rozjimać chcyštaj prezidentaj wulkeju atomoweju mocow zhromadne zajimy, ale tež konflikty na swěće. W Moskwje z tym ličachu, zo traja rozmołwy wobeju statnikow dlěje hač spočatnje planowane.
Israel nadběhuje pasmo Gazy
Gaza (dpa/SN). Prěni króć po zeskutkownjenju přiměra z palestinskej Hamas su israelske lětadła dźensa wojerske objekty w Gazaskim pasmje bombardowali. Bě to reakcija na zasadźenje wohnjowych balonow ze stron Palestinjanow přećiwo Israelej, kotrež su tam wjacore wohenje zawinowali. Palestinjenjo běchu z balonami na wčerawši pochod israelskich nacionalistow po Jerusalemje reagowali, kotřiž běchu na te wašnje zdobyće města w juniju 1967 wopominali.
Ministrojo so schadźuja
Mysl ekumeny po měsće šěrić
Budyšin (SN/bn). „Štož tu wšitko zdokonjeće, mje chětro hnuje. Wy pěstujeće ekumenu. Wěcy móža so jeničce potom derje wuwić a žohnowane być, hdyž so jim zhromadnje wěnujemy.“ Takle dźakowaše so ewangelski krajny biskop Tobias Bilz čłonam Budyskeho towarstwa Ekumeniski tachantski wobchod předwčerawšim w hosćencu „Wjelbik“. „Sobubratr“ Bilza, Drježdźansko-Mišnjanski biskop Heinrich Timmerevers, jemu přihłosowaše, prajo: „Skutkujeće z wulkej sensibilitu w zhromadnym duchu. Wjeselu so, zo so to runje nětko we wobłuku našich swjatočnosćow wujewja!“
To a tamne (16.06.21)
Za wobsedźerjom nopawy pytaja w Hohensteinje-Ernstthalu. Šoferka wosoboweho awta bě ju póndźelu namakała a sobu domoj wzała. Prawdźepodobnje jedna so wo grjeksku nakrajnu nopawu. Podarmo je žona spytała wobsedźerja přez socialne medije wuslědźić. Policija jeho nětko namołwja so přizjewić.
W błóćanej dźěrje potepiło je so wosobowe awto w indiskim Mumbaiju. W interneće wozjewjeny widejo wobsedźerja awta pokazuje, kak so jeho jězdźidło přez prědni dźěl w běhu někotrych sekundow w błóće zhubi. Parkowanišćo běchu swój čas na bywšej studni twarili, a tak drje je betonowa struktura přez lěta wosłabnyła. Wulki zliwk je nětko k dospołnemu rozpadej konstrukcije wjedł. Dokelž tež infrastruktura dobra njeje, tam stajnje zaso tajke dźěry nastawaja, kotrež móža samo čłowjekam strašne być.
Debatuja wo nahubnikach
Berlin (dpa/SN). Winowatosć, nahubnik wužiwać, měli po měnjenju Bonnskeho fachowca za infekcije Petera Walgera pod hołym njebjom wšudźe zběhnyć. Za nutřkowne rumnosće měli wo tym diferencowanje diskutować, wotpowědnje ličbje přitomnych wosobow, rjekny fachowc Němskeje towaršnosće za hygienu w chorownjach dźensa w rańšim magacinje telewizije ZDF. Nahubnik wostanje přiwšěm najefektiwniši škit před infekcijemi, Walger wuzběhny.
Načolne rozmołwy na wjeršku EU
Brüssel (dpa/SN). Na wjeršku w Brüsselu je so prezident USA Joe Biden dźensa z wodźacymi zastupnikami Europskeje unije zetkał. W rozmołwje z prezidentom Rady EU Charlesom Michelom a prezidentku komisije EU Ursulu von der Leyen dźěše wo to, kak móhli hospodarske a politiske poćahi mjez EU a USA po mnohich konfliktach z bywšim prezidentom Donaldom Trumpom zaso polěpšić. Jutře chce Biden w Genfje z ruskim prezidentom Wladimirom Putinom rěčeć.
Wojakow domoj zwołali
Krajny biskop Ewangelsko-lutherskeje krajneje cyrkwje Sakskeje Tobias ...
Scholz žada sej nowy rozmach za wuchod
Bad Saarow (dpa/SN). Zwjazkowy financny minister Olaf Scholz (SPD) žada sej nowy rozmach na dobro wuchodneje Němskeje. Přeco hišće ma so tójšto wuchodnych Němcow za wobydlerjow druheje klasy, rjekny Scholz wčera na wuchodoněmskim hospodarskim forumje w braniborskim Bad Saarowje. Wón skedźbni na rozdźěle nastupajo dochody, zamóženje a zdźědźenja kaž tež na pobrachowace koncernowe centrale a slědźenske institucije. „To njeje spomóžne za našu towaršnosć a za Němsku scyła.“ Dotalny natwar na wuchodźe bě předewšěm napodobnjenje zapada. „Štóž pak stajnje jenož nachwatuje, njemóže nihdy prěni być.“ Zaměr měł być, nowe a do přichoda sahace technologije na wuchodźe zasydlić. Tak njenastanu jenož nowe předewzaća, ale tež derje płaćene dźěłowe městna na dobro ludźi. Hladajo na mobilitu pokaza Scholz na twar noweje twornje awtotwarca Tesla a na zawod elektroawtow Volkswagen w Zwickauwje. Runje na polu klimoweje neutrality je tole wuchodnej Němskej hoberska strategiska šansa.
