Münster (dpa/SN). Skeptiske zhladowanje swětoweje cyrkwje na tuchwilny reformowy proces w Němskej ma po słowach Münsterskeho biskopa Felixa Genna tež něšto z němskej zašłosću činić. „Wobsteji strach, zo nas Němcow w swětowej cyrkwi jako tych wobhladuja, kiž po zdaću wšitko lěpje wědźa hač druzy“, rjekny Genn katolskemu internetnemu magacinej Kirche + Leben. Wón před tym warnuje to pohódnoćić. „Hdyž nastanje zaćišć, zo my Němcy wšitko zdokonjamy a wy tamni to snano tež něhdy docpějeće, by to fatalne a jara strašne było. Wostanjemy poćežowany lud z poćežowacym herbstwom.“

Reformowy proces synodalneho puća ma najwjace katolikow Němskeje za dawno trěbny. W druhich krajach su zdźěla jara skeptiscy a na Němsku „křiwje hladaja“, Genn zwěsća. Při synodalnym puću dźe wo pozicije žonow w cyrkwi, wo katolsku seksualnu moralku, wo wobchadźenje z mocu a wo celibat. Vatikan bě so wospjet kritisce k planowanym reformam wuprajił.

Chłostansko-prawniske přepytowanja přećiwo zapósłancomaj Lěwicy

Drježdźany (dpa/SN). Móžneho chłostanskeho přesćěhowanja dla je wuběrk Sakskeho krajneho sejma za jednaćelski porjad a imunitu minjeny pjatk tomu přihłosował, imunitu zapósłancow Lěwicy Juliany Nagel a Marca Böhmy zběhnyć. Wobaj běštaj so kónc nowembra 2019 na protestach hibanja „Ende Gelände“ w brunicowej jamje Schleenhain wobdźěliłoj. Srjedźoněmska brunicowa akciska towaršnosć Mibrag bě jeju na to ranjenja domjaceho měra dla wobskoržiła.

Böhme, kiž je zdobom zastupowacy frakciski šef, minjeny pjatk na to dopominaše, zo bě so protest swój čas měrniwje wotměł. „Njejsmoj demonstraciju nawjedowałoj abo organizowałoj. Samo-zrozumliwje pak sympatizujemoj z naležnosću spěšneho skónčenja zmilinjenja brunicy a mjezynarodneje klimoweje sprawnosće a smój demonstraciju tuž jako wobkedźbowarjej přewodźałoj.“

Lědma što je minjene lěta w katolskej cyrkwi telko diskusije zbudźiło kaž lěta 2019 wot Němskeje biskopskeje konferency připowědźeny synodalny puć, daloko sahace reformy nastupajo pozicije žonow w cyrkwi, katolsku seksualnu moralku, wobchadźenje z mocu a celibat. Běchu-li prěnje reakcije Vatikana skerje zdźeržliwe a pesimistiske, je bamž Franciskus tydźenja předsydźe biskopskeje konferency, Limburgskemu biskopej Georgej Bätzingej, na krótkodobnje organizowanej awdiency „zelenu swěcu“ za proces reformow dał. Zdobom hłowa katolskeje cyrkwje připowědźi, zo měł tónle proces swět wopřijacy być. Hižo jewja so hłosy, zo dyrbjała němska katolska cyrkej proces reformow nachwilnje přetorhnyć a čakać, doniž njeje so swětowa cyrkej na synodalny puć podała. Při tym móhła cyrkej w Němskej tež wot druhich krajow wuknyć, na přikład nastupajo jeje wuprudźenje na młodźinu. Cyrkej steji na započatku dołheho a napinaceho puća. Marko Wjeńka

Berlin (dpa/SN). Społnomócnjeny zwjazkoweho knježerstwa za turizm Thomas Bareiß (CDU) je w debaće wo raznišich prawidłach za nawróćacych so dowolnikow před tym warnował, ludźi njetrjebawši znjeměrnjeć. Bareiß rjekny wčera powěsćerni dpa w Berlinje: „Płaća dźě hižo najrazniše wěstotne předpisy za tajke kónčiny, kotrež su noweje delta-warianty koronawirusa dla hižo wosebje strašne. Při tym měło wostać. Aktualna diskusija wo nowych wobmjezowanjach ludźi njewěstych čini a płaći dowěru.“

Hladajo na rozšěrjenje wosebje natykliweje warianty koronawirusa běchu sej wjacori ministerscy prezidenća wótriše postajenja žadali, mjez druhim podlěšenu karantenu za nawrótnikow.

Bareiß na to skedźbni, zo su z cyło­zwjazkowymi rjadowanjemi zapućowanja jasne a zrozumliwe prawidła nasta­jene. Po tójšto kónčinach swěta móža ludźo­ tuchwilu wěsće pućować, hdyž napra­wy hygieny na městnje a rjadowanja jednotliwych krajow wobkedźbuja. „Zo njebychmy to wohrozyli, dyrbjał kóždy­ hladajo na delta-wariantu wosebje kedźbliwy być a postajenja dodźeržeć.“