To a tamne (23.07.21)
Na wšě 20 000 wobdźělnikow wočakuja jutře w Berlinje na tradicionalnej paradźe homo-, bi- a transseksuelnych „Christopher Street Day“, po tym zo móžachu lońšu paradu jenož internetnje přewjesć. Demonstranća dyrbja koronakrizy dla škitny nahubnik wužiwać. Hłownej žadani lětsa stej zjednorić mjena za transseksuelne wosoby a zběhnyć zakaz za potrjechene skupiny, krej darić směć.
Z wodomjetakami a sylzopłunom je grjekska policija demonstraciju přećiwnikow šćěpjenja w Athenje rozpušćiła. Něhdźe 3 000 demonstrantow bě přećiwo naprawam knježerstwa protestowało, kotrež ćišć na nješćěpjenych zesylnja. Tak je mjeztym zakonsce postajene, zo smědźa do nutřkownych rumnosćow hosćencow a kulturnišćow jenož hišće šćěpjeni zastupić. Sobudźěłaćerjo strowotnistwa dyrbja šćěpjeni być.
Dalše zliwki hroža
Offenbach (dpa/SN). W Porynsko-Pfalcy a Posaarskej dyrbja so ludźo kónc tydźenja znowa na zliwki a hrimanja nastajić. Přiwšěm njemóža meteorologojo Němskeje wjedroweje słužby w Offenbachu dotal hišće rjec, hač dóńdźe znowa k njewjedram. Prěnje spadki wočakuja sobotu na zapadźe. Njedźelu a póndźelu drje budźe wša Němska potrjechena. Minjeny tydźeń běchu sej njewjedra a zapławjenja 172 smjertnych woporow žadali.
Bydlenska politika tema
Drježdźany (dpa/SN). Sakski krajny sejm je so dźensa z bydlenskej politiku rozestajał. Debata na próstwu frakcije Lěwicy steješe pod hesłom „Zapłaćomne podruže w městach a wsach město wupředanje – podruže wobmjezować, socialnišo twarić, bydlenja w komunalnych rukach zachować“. Dalše temy běchu digitalizacija a zapućowanje ćěkancow. Minister za wobswět, energiju, škit klimy a ratarstwo Wolfram Günther (Zeleni) dyrbješe na prašenja zapósłancow wotmołwjeć.
Ludwig a Hausding z chorhoju
W Norwegskej su dźensa wopory teroroweju nadpadow w Oslu a na kupje ...
Söder: Kónc brunicy hižo do lěta 2038
Mnichow/Drježdźany (dpa/SN). Bayerski ministerski prezident Markus Söder chce wo wobzamknjenym skónčenju zmilinjenja brunicy w Němskej po wólbach zwjazkoweho sejma znowa wuradźować. Pruwować so měło, „hač njeje kónc brunicy hišće spěšnišo móžny“, rjekny předsyda CSU w swojej knježerstwowej deklaraciji wčera w Bayerskim krajnym sejmje. „Mam lěto 2038 tež na tutym městnje za njenaročne.“ Tak chcył so wón za to zasadźeć, kónc brunicy hižo w lěće 2030 zmóžnić.
FDP wuprajenja premiera kritizuje. „Söder zaso raz bjez zdaća wokoło błudźi a zaměnja populistisku symbolowu politiku z woprawdźitym škitom klimy“, praji klimopolitiski rěčnik frakcije w zwjazkowym sejmje Lukas Köhler. Wot Södera žadane nowe jednanja njebychu k škitej klimy přinošowali, ale bychu jeničce wobsedźerjam milinarnjow dalše miliardy wotškódnjenja wunjesli, štož bychu dawkipłaćerjo financować dyrbjeli.
Merkel Putinej kompromis rozkładła
Berlin (dpa/SN). Zwjazkowa kanclerka Angela Merkel (CDU) je wčera po informacijach knježerstwa z ruskim prezidentom Wladimirom Putinom telefonowała. Jedna z temow bě rusko-němski płunowód Nord Stream 2. Kanclerka rozłoži Putinej w tym zwisku kompromis, kotryž běchu USA a Němska do toho wujednali. W prěnjej reakciji chwaleše rěčnik Krjemla „konsekwentne zasadźenje němskeje strony“ při zwoprawdźenju „ryzy hospodarskeho projekta“, kiž polěkuje energijowej wěstoće Němskeje, kaž rěkaše.
Němska a USA běchu so po lěta trajacej zwadźe na kompromis dojednali. Płunowód ma so dotwarić, bjez toho zo USA dalše sankcije wukazaja. Z nim dóstawa Němska zemski płun z Ruskeje. Z nowej pipelinu wobeńdu Ukrainu, kotraž je na srědki z transita płuna pokazana. Chłostanja přećiwo Ruskej měli so hakle postajić, hdyž wona płun jako srědk politiskeho ćišća nałožuje. Wonkowny minister Heiko Maas (SPD) reaguje wolóženy na dojednanje a mjenuje je „konstruktiwne rozrisanje“.
Naležna debata šćěpjenja dla
Sakski krajny sejm połoženje w koronakrizy rozjimał
Drježdźany (dpa/SN). Minister za hospodarstwo Sakskeje Martin Dulig (SPD) ma pobrachowacu zwólniwosć ludźi, so přećiwo koronawirusej šćěpić dać, za wulke riziko. Sakska steji nastupajo kwotu šćěpjenja po wšej Němskej na poslednim městnje, rjekny wón wčera w krajnym sejmje. „To je strach za přichodnu nazymu.“ Dulig apelowaše na zapósłancow, so zhromadnje za škitne šćěpjenje přećiwo koronje zasadźeć, zo by šćěpjenska zwólniwosć zaso přiběrała. Šćěpić so dać je tež akt solidarity napřećo tym, kotřiž njemóža so šćěpić dać. „Trjebamy hišće dalšu motiwaciju“, sakski hospodarski minister wuzběhny. Ličby infekcijow zaso přiběraja. Móžemy so jenož nadźijeć, zo njedóńdźe k dalšej žołmje a nowemu lockdownej. Zaměr wostanje, dalšim infekcijam zadźěwać a pandemiju dalokož móžno wobmjezować.“
Trjebamy dowolnosć?
Dokumentuja industrijne stawizny
To a tamne (22.07.21)
Z čakarnje zubneho lěkarja na kupje Hawaii pokradnjeny wobraz su po 50 lětach w awkciskim domje w Texasu namakali a wobsedźerjej wróćili. Wobraz wuměłče Margaret Keane běchu 1972 w Honolulu pokradnyli. Loni w decembru je awkciski dom mólbu přesadźił, kotruž bě swójba w galeriji w New Jerseyju kupiła. Mjeztym je wobraz zaso na Hawaiiju.
Hotowy chaos zawiniła je wulka myš w parlamenće juhošpaniskeho regiona Andaluziska. Prezidentka tamnišeho parlamenta Marta Bosquet runje posedźenje nawjedowaše, jako wona pod blidami prawicarskopopulistiskeje strony Vox hrymzaka wuhlada a přez mikrofon wótře zakřikny. Na to skočichu wjacori zapósłancy ze swojich stólcow, někotři su samo žurlu wopušćili, čemuž so druzy smějachu. Skónčnje so zbywacym parlamentownikam poradźi, myš ze žurle wuhnać.
Lědma hišće nadźija
Berlin (dpa/SN). Nimale tydźeń po zapławjenjach na zapadźe Němskeje ma wiceprezidentka Techniskeho pomocneho skutka Sabine Lackner lědma hišće nadźiju, přežiwjenych namakać. „Pytamy přeco hišće za zhubjenymi, tak při wurumowanju a wuklumpanju pincow“, rjekny Lackner nowinarjam. „Mjeztym pak je jara prawdźepodobne, zo móžeš wopory jenož hišće namakać, njemóžeš pak je wjac wuchować.“ Ličba smjertnych woporow wulkeje wody dla je na 170 rozrostła.
Sportowcy zwjetša šćěpjeni
Tokio (dpa/SN). 95 procentow wšěch něhdźe 430 němskich sportowcow na olympiskich hrach w Tokiju je přećiwo koronje šćěpjenych. Kaž prezident Němskeho olympiskeho sportoweho zwjazka Alfons Hörmann zdźěli, su za medicinarjow a přewodźerjow mustwa samo winowatostne šćěpjenje wukazali, byrnjež sej to ani Japanska ani Mjezynarodny olympiski komitej nježadałoj. „Je to naš wuraz respekta napřećo wobydlerjam a japanskim hosćićelam.“
Francoska naprawy přiwótřa
