Po přewróće z ideologiju wyšnosće pokročowali
Budyšin (CS/SN). Kak zhladujemy we wuchodnych zwjazkowych krajach na stawizny NDRskeho časa? Mnoho Budyšanow, kotřiž běchu so minjeny pjatk na „Budysku narěč“ w tachantskej cyrkwi swj. Pětra zešli, so wotmołwow na tute prašenje nadźiješe. Dohromady 400 připosłucharjow – telko, kaž hižo dołho nic – sćěhowaše přednošk historikarja a publicista Ilko-Sascha Kowalczuka pod hesłom „Šok swobody“.
To a tamne (12.05.25)
Muski balet z Finsterwalde je němski mišter 2025 w turněrje wjesołych rejwarjow. Skupina z Braniborskeje je so we wubědźowanju cyłoněmskeho zwjazka muskich baletow we Würzburgu přećiwo 14 dalšim mustwam w kategoriji hač do 35 lět přesadźiła. Mužojo z Finsterwalde wustupowachu z choreografiju „Rybjaceho mandźelstwa“. Za to běchu cyłe lěto zwučowali. Muske balety pochadźeja poprawom z karnewala. Mjeztym pak wustupuja tež zwonka póstnicow.
Na wšěch 50 dnjow na swoje wuchowanje na morju su rybarjo w pacifiskim oceanje čakać dyrbjeli. Ekwadorska mórska straža je pjeć muži z Peruwa a z Kolumbiskeje wuchowała, po tym zo běchu druzy rybarjo skóncowany kuter wuhladali. Jako chcychu jón wotwlec, čołm rozpadny. Tuž dyrbješe mórska straža wupomhać. Motor kutera bě wupadnył.
Prawicarstwu so spřećiwjeć
Merz a Trump telefonowałoj
Berlin (dpa/SN). Cunje signale wotputanja w cłownej zwadźe, zwólniwosć ke kooperaciji Ukrainy dla a mjezsobne přeprošenja do Němskeje a USA: Tole su wuslědki prěnjeho telefonata zwjazkoweho kanclera Friedricha Merza (CDU) z prezidentom USA Donaldom Trumpom. W kruhach knježerstwa rěča wo „njewšědnje pozitiwnej, wurunanej a přećelnej telefoniskej rozmołwje“. Merz je Trumpej wobswědčił, zo wostanu USA „njeparujomny partner a přećel Němskeje“.
Zjězd Lěwicy z nowym elanom
Kamjenica (dpa/SN). Lěwica zetkawa so dźensa na dwaj dnjej trajacy cyłoněmski zjězd w Kamjenicy. Po njewočakowano dobrym wuslědku wólbow zwjazkoweho sejma a wulkim nawalom nowych čłonow chce strona přichodne mězniki skutkowanja wobzamknyć. Hłowny dokument zjězda ma titul „My smy nadźija“. Zaměr strony je, w přichodnych wólbach krajnych sejmow a komunalnych zastupnistwow derje wobstać a přichodne lěta na 150 000 čłonow rozrosć.
Žane měšenje USA do konflikta
Z wulkej wojerskej paradu je Ruska dźensa 80. róčnicu dobyća nad ...
Nowe francosko- pólske zrěčenje
Ministrojo EU w Lwiwje
Merz pola NATO w Brüsselu
Brüssel (dpa/SN). Tři dny po nastupje do zastojnstwa je so zwjazkowy kancler Friedrich Merz (CDU) do Brüssela a z tym na swoju druhu wukrajnu jězbu podał. Tam wočakowaštaj jeho generalny sekretar NATO Mark Rutte, prezidentka komisije EU Ursula von der Leyen a druzy načolni zastupnicy EU. Swój prěni wopyt we wukraju bě Merz hižo srjedu w Parisu a we Waršawje zmištrował.
Při podpisanju koaliciskeho zrěčenja mjez CDU/CSU a SPD bě předsyda CDU připowědźił, zo chcył so ze swojim knježerstwom wo to postarać, zo je „hłós Němskeje w Europje a po wšěm swěće“ zaso słyšomny. Europska unija na to čaka, zo Němska zaso swój dźěl k poradźenju wulkeho europskeho projekta přinošuje, Merz swój čas rjekny.
Jako nawoda opozicije bě Merz swojemu předchadnikej Olafej Scholzej (SPD) wumjetował, zo je w europskej politice pasiwny. Tute „europapolitiske mjelčenje“ chcył Merz skónčić a z europskimi partnerami na nowy kurs prezidenta USA Donalda Trumpa reagować.
Wulke wočakowanja na bamža
Po wuzwolenju Roberta Francisa Prevosta za noweho nawodu katolikow
Rom/Mnichow (dpa/SN). Nowy bamž Leo XIV. je zbožopřeća ze wšeho swěta k swojemu wuzwolenju za noweho nawodu katolskeje cyrkwje dóstał. 69lětneho Roberta Francisa Prevosta běchu kardinalojo wčera w Romje za 267. pontifeksa wuzwolili. Arcybiskop z Chicaga je so za bamžowske mjeno Leo XIV. rozsudźił.
Němski kardinal Reinhard Marx je hladajo na wólby noweho bamža „jara zbožowny“. Leo XIV. je wosobina, kotruž katolska cyrkej trjeba, rjekny Mnichowski a Freisingski arcybiskop w ZDF. Prevost móže „připosłuchać, argumentatiwny być, problemy zrozumić a na prašenja wotmołwić“, Marx rjekny. Hladajo na katolsku cyrkej Němskeje a jeje prócowanja wo reformy widźi Marx pola noweho bamža wulku zwólniwosć, so na diskusiji wobdźělić. Wón je sej wěsty, zo bamž połoženje Němskeje dokładnje wobkedźbuje a zrozumi. „Hladajo na to, kaž sym jeho dotal zeznał, sym jara optimistiski“, tak Marx.
