Camp lětsa znowa přewjedu
Přewjele młodostnych swoje rjemjeslniske wukubłanje přetorhnje
Budyšin (SN/at). Zrałosć za wukubłanje mnohe rjemjeslniske zawody pola młodostnych-wučomnikach paruja. Na to skedźbnja jednaćelka Budyskeho wokrjesneho rjemjeslnistwa Sabine Gotscha-Schock z widom na starosće, zawěsćić powołanski dorost w firmach. Jako jara njespokojaca wšak wopokazuje so dale wulka ličba wučomnikow, kotřiž wukubłanje přetorhnu. „Wězo móža tu a tam problemy być a wukubłanske zrěčenje so kónči. Trajne přetorhnjenja mjez 20 a 25 procentami wukubłanja pak je prosće přewjele“, praji jednaćelka. Runje nětko, hdyž přeprošenja za mjezy- a rjemjeslniske pruwowanja wobdźěłuja, tónle jara mjerzacy staw znowa zwěsćeja. Zo nastupajo skónčenje wukubłanskeho poměra druhdy tež znjewužiwanje drogow rólu hraje, Gotscha-Schock njezamjelči.
Móža fleksibelnje na wiki reagować
Změna k wobnowjomnym energijam w Němskej derje postupuje. Loni su wódne a wětřikowe připrawy něhdźe 154 kilowattowych hodźin miliny produkowali, štož je pjećina wjace hač w lěće 2016.
Budyšin/Choćebuz (SN/BŠe). Wětřika minjenych tydźenjow a dnjow dla su wětrniki wosebje wjele miliny produkowali, štož ma konsekwency za łužiske brunicowe milinarnje. „Hladajo na zwyšenje produkcije wobnowjomnych energijow wokoło hodownych swjatych dnjow a runočasnje jasnje mjenje trěbneje miliny za přetrjebarjow a industriju smy wukony našich štyrjoch milinarnjow w Janšojcach, Čornej Pumpje, Hamoru a Lippendorfje wo 25 procentow pomjeńšili“, informowaše nětko nawoda předsydstwa koncerna Łužiska energija a milinarnje (LEAG) Hubertus Altmann.
Mjez hodami a Nowym lětom bě koncern swoje milinarnje wjacekróć horje a zaso dele regulował, zo bychu přetrjebarjo stajnje dosć z milinu zastarani byli. Tež na wichor Burglind, kotryž je zawčerawšim w Němskej howrił a so wo wyše wukony wětrnikow postarał, móžeše LEAG jara fleksibelnje reagować a stabilitu w milinowej syći zawěsćić.
Blidarjam nětko wjace płaća
Hamburg/Schwerin (dpa/SN). We wuchodoněmskim blidarskim rjemjesle su so spočatk lěta 2018 mzdy za fachowych dźěłaćerjow wo 11,1 procent zwyšili, klětu maja wone wo dalše 4,4 procenty rozrosć. Tole předwidźi tarifowe zrěčenje, kotrež stej dźěłarnistwo IG metal a tarifowe zjednoćenstwo wuchodoněmskeho blidarskeho rjemjesła wujednałoj, zdźěli rěčnik dźěłarnistwa w Hamburgu.
Tak mjenowane róžkowe dochody zwyša so wot 1 958 na 2 175 a wot klětušeho potom na 2 262 eurow. Tarifowe zwyšenje płaći za 32 000 přistajenych w Braniborskej, Mecklenburgsko-Předpomorskej, Sakskej, Saksko-Anhaltskej a Durinskej, dźěłaja-li woni w zawodach rjemjeslniskeho zjednoćenstwa. Mzdy wučomnikow so w samsnej měrje zwyša.
Zastupnik dźěłarnistwa IG metal při tarifowych jednanjach Bodo Grzonka je sej wěsty, zo je powołanje blidarja z nowym tarifom zaso atraktiwne a přichodakmane. We wočomaj předsydy tarifoweho zjednoćenstwa Hansa Höflera je wuslědk jedanjow wulka kročel hladajo na to, zo so mzdy na wuchodźe a zapadźe přibližeja.
Miłe wjedro tyło
Budyšin (CK/SN). We wuchodnej Sakskej bě kónc decembra 2017 dohromady 20 056 bjezdźěłnych, 636 wjace hač měsac do toho (+3,3 procenty) a 2 690 mjenje hač lěto do toho (-11,8 procentow). Miłeho wjedra dla zwosta ličba přizjewjenjow bjezdźěłnosće z ratarstwa, twarstwa, transportnistwa kaž tež zahrodnistwa přehladna, kaž zwěsći předsyda jednaćelstwa Budyskeje agentury za dźěło Thomas Berndt dźensa na nowinarskej rozmołwje.
Naprašowanje za dźěłowymi mocami je porno nowembrej (-75 městnow, -35 procentow) a lětu 2016 (-165 městnow, -54 procentow) wosebje na sektorje časoweho dźěła woteběrało. Tuchwilu móže dźěłowa agentura 4 486 swobodnych městnow posrědkować.
Insolwencu přizjewili
Niska (SN/BŠe). Na wurjadnej zhromadźiznje přistajenych wagonotwarca Niska je tamniše jednaćelstwo wčera zdźěliło, zo běchu 27. decembra na Drježdźanskim zarjadniskim sudnistwje próstwu wo insolwencu zapodali. Tuchwilny towaršnik Quantum sej hižo njepřicpěwa straty minjeneho lěta wurunać. Ze zašłych hospodarsce jara dobrych lět njeje towaršnik docpěte dochody z předewzaća ženje do wagonownje inwestował, pisa dźěłarnistwo IG metal. Jasne tohorunja njeje, kak bě najebać dosć nadawkow k situaciji dóšło.
Dźěłarnistwo je ze stron wěrićelow wo insolwency zhoniło. Woni maja zajim, zo so předewzaće zachowa a nichtó z přistajenych so njepušći. Zaměr IG metal a zawodneje rady wagonownje je jasny. Předewzaće ma so zdźeržeć, sobudźěłaćerjo dyrbja wšitcy wostać a zawod ma so dale wjesć.
Kaž sakske hospodarske ministerstwo wčera informowaše, ma wone z předewzaćom zwisk a chce pomhać zawod zachować. „Próstwu wo insolwencu měli jako nowy start wužiwać“, rjekny hospodarski minister Martin Dulig (SPD).
Nowa technika zmóžnja efektiwniše dźěło
Zły Komorow (SN/BŠe). Stupaca dnowna woda we łužiskim brunicowym rewěrje je so zašłe dźesać lět na hižo wužiwanych nasypach wuskutkowała. Wosebje na sewjeru běchu sćěhi toho wulke, wšako su nowe geotechniske wužadanja spontane zesuwanja zemje zawinili. Krótkodobnje dyrbjachu zamołwići kołowokoło Łužiskeje a srjedźoněmskeje towaršnosće hórnistwoweho zarjadnistwa (LMBV) wjacore płoniny zawrěć. Potrjechenych bě něhdźe 20 000 hektarow zdźěla hižo přistupnych přestrjenjow, kotrež njejsu we wjetšinje hišće dźensa wužiwajomne.
Wot lěta 2011 dźěłaja geologojo a inženjerske běrowy tuž zaměrnje na tym, tereny dołhodobnje zawěsćić. Jako wuspěšne wopokaza so zhusćenje ležownosćow z pomocu rozbuchliny we hłubokosći 20 do 25 metrow. W dwěmaj pilotowymaj projektomaj w lěće 2014 a 2016 su tule naprawu w saněrowanskej kónčinje Bzež (Seese) wuspěšnje praktikowali. Přiwšěm wujewichu so ćeže wosebje hladajo na točensku techniku, kotraž měła lochka, pohibliwa a wukonliwa być.
Wjace zrěčenjow podpisali
2 132 młodych ludźi za wukubłanje w rjemjesle so rozsudźiło
Drježdźany (SN). Tež kónc minjeneho lěta je pozitiwne wuwiće hladajo na ličbu wučomnikow dale šło. Cyłkownje 2 132 młodych ludźi, mjez nimi 581 žonow, je so hač do kónca decembra za wukubłanske městno we wobłuku Drježdźanskeje rjemjeslniskeje komory rozsudźiło a wukubłanje w jednym z wuchodosakskich rjemjeslniskich předewzaćow zahajiło. To je 8,6 procentow wjace hač lěta 2016. Ličba wučomnikow tak hižo pjate lěto za sobu přiběra, kaž rjemjeslniska komora zdźěla.
Saněrowanska łódź „Klara“ derje dźěłała
Łužiska a srjedźoněmska towaršnosć hórnistwoweho zarjadnistwa (LMBV) chce łužisku jězorinu dale zaměrnje saněrować. To su na njedawnej regionalnej konferency w Hórnikach připowědźili.
Hórnikecy (AK/SN). Najwažniši dźěłowy srědk LMBV při polěpšenju kwality wody jězorow je saněrowanska łódź „Klara“, kaž nawoda projektoweho managementa Michael Matthes na konferency zdźěli. Łódź běchu hižo loni na Parcowskim jězoru zasadźili. Zo by wodu neutralizowała, je „Klara“ 10 300 tonow běłeho drobneho wapna a 16 000 tonow mlěteho wapnowca do wody sypała. Akcija traješe hač do nowembra. „Chcemy łódź nalěto 2018 znowa zasadźić“, Matthes rjekny.
Što móhł nowy agrarny zakoń wuskutkować
Wočakowanja ratarjow na nowy agrarny zakoń EU su wulke. Lětsa w lěću ma naćisk předležeć. Předewšěm wuchodoněmscy burja pak so prašeja, hač přewažuja lěpšiny abo njelěpšiny.
Podstupim (dpa/SN). Wuchodoněmscy ratarjo boja so móžneho kaženja wikow. „Wobsteji strach, zo zhromadna europska agrarna politika wjace na prěnim městnje njesteji a kraje po swójskich zajimach postupuja“, rjekny prezident Braniborskeho krajneho burskeho zwjazka Henrik Wendorff powěsćerni dpa.
W lěću ma naćisk zakonja předležeć. Po ćežkim połoženju ratarstwa w minjenych lětach chce komisija EU agrarne spěchowanje reformować. Kraje maja potom wjace móžnosćow swójskeho jednanja dóstać. Wendorff pak ma to za „krok dozady. Wjele za přichod wotmysleneho wupada kaž zapłatany přestrjenc.“ Problematiske je, hdyž na přikład jedyn kraj wěste formy plahowanja skotu z premijemi spěchuje, tamny pak nic. „Kraje móža potom tež rozsudźić, hač direktne dochodowe pomocy płaća abo hinaše programy preferuja“, Wendorff warnuje.
