Za wjace mzdy
Budyšin (SN/JaW). Wuchodosakska wotnožka dźěłarnistwa twarstwo, agrar a přiroda (IG Bau) žada sej za dźěławych w twarstwje wjace mzdy. „Předewšěm dołhe jězby hač na twarnišća měli jim połnje zapłaćić“, rěka w nowinskej zdźělence. Cyłkownje potrjechi to 5 270 twarskich dźěłaćerjow w Budyskim wokrjesu.
Pozadk žadanjow su dalše tarifowe jednanja za twarstwo, kotrež započnu so 19. měrca w Berlinje. „Dźěłaćerjo měli z połnych nadawkowych knihow, rekordnych wobrotow, skrótka z booma w twarskej branši profitować“, argumentuja dźěłarnicy. Tohodla žadaja sej wot dźěłodawarjow zwyšenje mzdy wo 6,8 procentow – znajmjeńša pak 230 eurow wjac měsačnje. Za wučomnikow chcedźa 100 eurow wjac wob měsac.
Zhotowjeja twarožk za jubilej
Prěni raz na žurli SLA wuswědčenja přepodali
Budyšin (CS/SN). Premjera to w Budyskim Serbskim ludowym ansamblu: Prěni raz su tam minjeny pjatk wučomnikow wokrjesneho rjemjeslnistwa wuwjazali. Po połštwórta lěće wukubłanja we wobłukach mechanikar připrawow, metalotwar, elektronika a systemowa elektronika dóstachu młodostni swoje rjemjeslniske wuswědčenja.
Cyłkownje 38 wučomnikow, mjez nimi tež dwě młodej žonje, je wukubłanje wuspěšnje zakónčiło. Najlěpši ze znamku dwaj běchu Benno Gäbel, William Glaß, Nick Handrich, Jakob Schur a Richard Wenke. Nimo Williama Glaßa, kiž njebě chorosće dla přitomny, dóstachu wšitcy hódnotne wěcowne myta a wupichu w mjenje wšěch wučomnikow karančk piwa jako symbol młodych fachowcow. Runje tak wjeselachu so nad dalekubłanskim dobropisom. Wokrjesny rjemjeslniski mišter Frank Scholze, Budyski krajny rada Michael Harig (CDU) a wobdźělnik olympiskich hrow, triatlet Maik Petzold, jim gratulowachu. Posledni mjenowany skutkuje mjeztym dwě lěće w Budyskim powołanskošulskim centrumje jako sportowy wučer.
Zawjedźenje tarifa wulki wuspěch
Budyšin (SN/JaW). Jan Otto wostanje hłowny jednaćel dźěłarnistwa IG metal wuchodneje Sakskeje. Jeho je 90 přitomnych na sobotnej delegatnej zhromadźiznje z 91,5 procentami hłosow w zastojnstwje wobkrućiło, kaž IG metal zdźěla. Tohorunja na dalše štyri lěta w zastojnstwje wobkrućeny je druhi społnomócnjeny Gerd Kaczmarek. Wón dósta 92 procentow wšěch hłosow. Wolili su zdobom předsydstwo z cyłkownje 14 přisydnikami z regionalnych zawodow.
Gerd Kaczmarek móžeše dobru bilancu skutkowanja dźěłarnistwa we wuchodnej Sakskej sćahnyć. „W minjenych štyrjoch lětach smy w našej wotnožce tójšto k pozitiwnemu změnili. Ličba čłonow je wobstajnje přiběrała, a smy nowe zawody zdobyli. Zhromadnje chcemy z nowowuzwolenymi delegatami po wuspěšnym puću dale kročić.“
Wšelakorosć projektow překwapiła
Choćebuz (SN/BŠe). Hnydom sydom inowatiwnych projektow ma šansu na lětuše Łužiske wědomostne transferne myto. Kónc februara běchu wšitke wobdźělene projekty, nastate na zakładźe kooperacije, jury předstajili a za wuznamjenjenje poručili. Štó je skónčnje dóstanje, zhonja wobdźělnicy 10. junija we wobłuku swjedźenskeho zarjadowanja. Łužiska hospodarska iniciatiwa je za to myta w hódnoće 10 000 eurow wupisała.
„Lětsa předstajene projekty pokazuja, zo su we wšěch branšach a kónčinach Łužicy mjeńše a wjetše předewzaća, kotrež do slědźenja a wuwića inwestuja a sej za to sylnych partnerow pytaja. Runje wšelakorosć inowacijow je w regionje trěbna“, zwurazni předsyda jednaćelstwa koncerna BASF w Carnym Gozdźe. Předsydźe jury je wědome, zo je wulke wužadanje, nimo wšědnych nadawkow hišće čas, personal a pjenjezy za slědźenje nałožić. Łužiske transferne myto ma pokazać, zo so próca wudani.
LEAG chce dźěłowe městna wotstronić
Choćebuz (dpa/SN). Koncern Łužiska energija a milinarnje (LEAG) předźěłuje hladajo na zakónčenje wudobywanja brunicy swoju rewěrowu koncepciju a zdobom pruwuje, hdźe móhł dźěłowe městna wotstronić. Pozadk toho su ćežke wobstejnosće na wikach, kaž LEAG wutoru zdźěli. Lětsa w běhu prěnjeju dweju měsacow su miłe wjedro, corona-wirus, swětowe hospodarstwo, płaćizny za płun a najwjetše dodawanje wětroweje miliny do syće wuslědk LEAG negatiwnje wobwliwowali. Dokładne ličby drje předewzaće dotal žane mjenowało njeje, přiwšěm so nawodnistwo prócuje šmórnjenje dźěłowych městnow socialnje znjesliwje přewjesć.
We widejowej powěsći nawody předsydstwa Helmara Rendeza je rěč wo „bolostnych rozsudach“ a wo pomjeńšenju zarjadniskeho wobłuka. LEAG dyrbi nastupajo wudawki nuznje na „borzdźidło stupić“. Zakoń wo kóncu brunicy tam tuchwilu rozjimuja. Hač do lěta 2038 dźě maja wšitke brunicowe milinarnje w Němskej zawrjene być.
Na demonstraciji so wobdźělić
Drježdźany/Budyšin (SN). Na hubjene połoženje ratarjow skedźbnić chce jutře sakske towarstwo „Wjesne kónčiny zwjazuja“ a namołwja wšěch sobudźěłaćerjow wobłuka, so na demonstraciji w stolicy Sakskeje wobdźělić.
Přičina zarjadowanja je posedźenje ratarskeho wuběrka Sakskeho krajneho sejma, kotryž chce wo zakładnych zaměrach nowelěrowanja hnojenskich postajenjow wuradźować a rozsudźić. Towarstwo, w kotrymž tež mnoho ratarjow z Łužicy sobu skutkuje, chce składnosć wužić a přitomnym rozkłasć, w kajkim špatnym stawje měrjenske stejnišća su, abo zo su na wopačnym městnje, tak zo k sfalšowanym wuslědkam dochadźa. Tež wohroženje eksistency ratarjow ma tema na Drježdźanskej demonstraciji być.
Nowi fachowcy maja wjelorake móžnosće
Wojerecy (JoS/SN). Cyłkownje 16 wučomnikow a přewuknjencow Wojerowskeje Towaršnosće za wu- a dalekubłanje (GAF) móže so wjeselić, dokelž su wuspěšnje swoje fachowe pruwowanje złožili. Prěni gratulanća minjeny pjatk běchu wučerjo a zastupjerjo wukubłanskich zawodow, kotřiž běchu přeprošenje kubłanišća sćěhowali.
Dobra bilanca, ale tójšto twarnišćow
Wjele wjac hosći hač w lěće 2018 je loni Hornju Łužicu wopytało. Marketingowej towaršnosći Hornja Łužica-Delnja Šleska je to přičina wjesela, nic pak wotpočinka.
Budyšin (UM/SN). 2019 bě dobre lěto za turizm w Hornjej Łužicy. Kaž Marketingowa towaršnosć Hornja Łužica-Delnja Šleska (MGO) zdźěla, je ličba přenocowanjow porno lětu do toho wo 116 189 rozrostła. To wučinja přirost 8,3 procentow a je wjac hač we wšěch dalšich turistiskich regionach Swobodneho stata Sakskeje. Zdobom bu prěni raz hranica dweju milionow přenocowanjow překročena. „Naša strategija płody njese“, hódnoćeše předwčerawšim jednaćel Olaf Franke na nowinarskej konferency w Budyšinje. Předewšěm měnješe wón ćežišća, kotrež zaměrnje zwičnjeja. „Při tym jedna so wo temy kaž swójbny dowol, aktiwny dowol a kulturne jězby“, zwurazni „najwyši zwičnjer“ regiona.
Wulke wužadanje lěsnistwu
Njeje lochko prawu družinu štomow za klimowu změnu namakać
Njeswačidło (JK/SN). Klimowa změna njewuskutkuje so jenož na wjedro a wotběhi počasow, ale ma drastiske wuskutki na wegetaciju, wosebje na lěsy. Tež sakske a tak łužiske lěsy su potrjechene.
Kak hodźi so na změny w lěsach a na nowu a njezwučenu situaciju reagować, bě wobsah póndźelneho zarjadowanja w Njeswačanskej přirodoškitnej staciji. Wotrjadnik w statnym lěsniskim zawodźe Sachsenforst Sven Mertens spyta wulkej ličbje zajimcow, předewšěm wobsedźerjow lěsow, pokazać, kak móhli wuskutki njedosahacych spadkow wurunać a kak hodźi so lěsnistwo do přichoda wukmanić, hdyž budźe lěs dyrbjeć wo eksistencu wojować.
