Wóslinčanscy šulerjo w kursu serbšćinu wuknu
Prěni króć wotměwa so na Ewangelskej srjedźnej šuli Wóslink zajimowy kurs serbšćiny. Christina Mjetašowa ze Sulšec, nazhonita wučerka na wuměnku, jón nawjeduje.
Wóslink (SN/mwe). „Sym wjesoła, zo je so dźesać šulerjow za kurs přizjewiło, w kotrymž wěnujemy so serbskej rěči, serbskim spisowaćelam, našim stawiznam a kulturje“, rozłožuje 63lětna Christina Mjetašowa našemu wječornikej. Třiceći lět wuwučowaše wona na Kulowskej šuli „Korla Awgust Kocor“ serbšćinu, jendźelšćinu a rušćinu, dźewjeć lět skutkowaše we Wóslinku. Kóždu wutoru popołdnju tam nětko znowa je, zo by šulerjam 7. do 9. lětnika dwě hodźinje mjez druhim serbsku rěč spřistupniła.
Delnjoserbske rěčne kursy maja 65lětny jubilej
Choćebuz (HA/SN). Šula za delnjoserbsku rěč a kulturu w Choćebuzu zhladuje lětsa na wosebity jubilej. Před 65 lětami běchu so tam kursy delnjoserbšćiny za dorosćenych oficialnje zahajili. Za Hornju Łužicu běchu lěta 1949 Serbsku ludowu uniwersitu (SLU) z kubłarnjomaj w Chrósće a Radworju załožili, 1951 slědowaše wotnožka SLU w Delnjej Łužicy. Wona bě w bywšim Bórkowskim hosćencu zaměstnjena. Tak zwoprawdźachu dale zaměr Domowiny, w serbskej ludnosći přewjesć wobšěrnje organizowane serbskorěčne dalekubłanje.
Tři lěta pozdźišo, 1954, załožichu Centralnu serbsku rěčnu šulu. Ta bě prěnje měsacy w Běłej Gorje (Byhleguhre) a hač do lěta 1990 w Dešanku pola Choćebuza. Po tym wobsteješe wulki strach, zo so wažne kubłanišćo zhubi. Tohodla bu 1992 Šula za delnjoserbsku rěč a kulturu jako dźěl Choćebuskeje ludoweje uniwersity nowozałožena. Na jubilej 1951–2016 chce šula na wosebitym zarjadowanju 26. septembra w měšćanskim domje spominać.
Wabja tež pólskich, čěskich a słowakskich wučerjow
Sakske knježerstwo chce sylnišo serbskich wučerjow we Łužicy wabić. Wotpowědny paket naprawow stej ministerka za kultus Brunhild Kurth (CDU) a ministerka za wědomosće dr. EvaMaria Stange (SPD) wčera w Drježdźanach předstajiłoj.
Pohłubšatej zhromadne dźěło
Budyšin (SN). Nowe pěstowarske lěto je so zahajiło. Za Serbski ludowy ansambl je to přiležnosć, zo by zhromadne dźěło z Budyskej dźěćacej dnjowej přebywarnju „Jan Radyserb-Wjela“ dale pohłubšił. Jednaćelka SLA Diana Wagerec je minjenu wutoru na staršiskej zhromadźiznje nawodnicy Grit Henčlowej symboliske wopismo přepodała.
Estetiske kubłanje we wobłuku pedagogiskeho dźěła zarjadnišća w nošerstwje Křesćansko-socialneho kubłanskeho skutka (CSB) ma z kmótřistwom wyšu kwalitu docpěć. Wupruwowane poskitki kaž kóždolětny hudźbny tydźeń tuž dale wjedu. Nimo toho zmóžnja podpěra SLA, w přichodźe hudźbu, spěwanje a reju sylnišo do skutkowanja za čas cyłeho pěstowarskeho lěta zapřijeć, kaž CSB zdźěla. Wjeršk budźe znowa ptačokwasny program dźěći Budyskeje serbskeje pěstowarnje na wulkej žurli SLA.
Wukubłuja pjekarjow při modernych pjecach
Budyšin (CS/SN). Powołanskošulski centrum za zežiwjenje a domjacnosć je z Budyskim zhotowjerjom pjecow Debag kooperaciske zrěčenje wotzamknył. Prěni wuraz toho spočatk tydźenja bě, zo su wukubłanskemu centrumej tři pjecy a tak mjenowanu droždźensku připrawu w hódnoće dohromady 55 000 eurow přepodali. Stara pěc bě z lěta 1994 a dźensnišim žadanjam na tajkule techniku hižo njewotpowědowaše. Debag chce swoje pjecy w powołanskej šuli za swojich kupcow testować dać. Za to smědźa wučomnicy – tuchwilu je jich w třoch lětnikach dohromady 35 – zawod wopytać a sej wobhladać, kak tam pjecy zhotowjeja.
Budyski powołanskošulski centrum je ze swojimi nastrojemi na aktualnym techniskim stawje. Nowe pjecy hodźa so zdźěla samo programěrować. Droždźenska připrawa je multifunkcionalna – zamóže chłódźić, zamróžić a droždźić. Za nowe nastroje dyrbjachu elektriku a wodowody šule změnić. Z pjecami budu tohorunja wučomnicy z partnerskich šulow w Pólskej, Čěskej a Francoskej dźěłać, hdyž do Budyšina hospitować přijědu.
Zrěčenje za šuli podpisane
Kamjenc (CoR/SN). Po dwě lěće trajacej diskusiji staj wčera krajny rada Budyskeho wokrjesa Michael Harig (CDU) a Kamjenski wyši měšćanosta Roland Dantz (njestronjan) skónčnje wobłukowe zrěčenje wo dalšim wuwiću šulskeho stejnišća Kamjenc podpisałoj.
Tak móža nětko saněrować historiske twarjenje Lessingoweho gymnazija na Henselowej 14 kaž tež wobnowić 2. wyšu šulu na Saarskej 18. Ta ma přechodnje do twarjenja na Henselowej přećahnyć. Ručež budu wyši šulerjo zaso we wobnowjenej šuli, rozšěrja gymnazij z přitwarom na třičarowe kubłanišćo. Lessingowy gymnazij móže potom stejnišćo na Macherowej 146 zaso wopušćić. Naprawa budźe financowana přez Budyski wokrjes ze 4,2 milionomaj eurow, přez město Kamjenc z 2,8 milionami eurow, z předanje ležownosće wokrjesa na Macherowej 146 kaž tež z hižo dojednanymi spěchowanskimi srědkami.
Njejasne je dale financowanje noweje dwupoloweje sportownje pak na Henselowej pak na Jahnowym sportnišću.
Chcedźa wjeselo budźić
Žiwy wobchad z pedagogiku za dźěći a młodostnych we Wojerecach
W połkruhu sedźa šulerjo wokoło Diany Schönig. „Čehodla rěka kamjentna doba poprawom kamjentna doba?“, praša so muzejowa pedagogowka šulerjow 1. a 2. lětnika Mozaikoweje zakładneje šule Picnjo z Delnjeje Łužicy. Spěšnje du ruki do wysokosće. „Ludźo tehdy su wšitko z kamjenja twarili, swoje domy, brónje, ale tež dźěłowe graty“, praji Leon. Diana Schönig nygnje, so dźiwa a so zaměrnje dale praša. Na slědźenskim dnju „Kamjentna doba“ we Wojerowskim měšćanskim muzeju pokazuje wona dźěćom 10 000 lět stare kosće. Chce wot nich wědźeć, kak běchu ludźo w kamjentnej dobje žiwi, što stej mamut a tesakowy tiger (Säbelzahntiger).
Z knihami do noweho šulskeho lěta
Na Ewangelskej srjedźnej šuli Wóslink su wuknjacy 5. do 10. lětnika z projektowym tydźenjom do noweho šulskeho lěta startowali
Wóslink (DJ/SN). Za šulerjow 5. lětnika steji w srjedźišću, so mjez sobu kaž tež z kubłanišćom zeznajomić. Zdobom trenuja metody wuknjenja. 6. lětnik zaběra so z temu respekt. A w 7. lětniku zbližeja sej tematiku „mosty“ we wšej jeje wobšěrnosći. Na slědy wuspěcha podawaja so holcy a hólcy 8. lětnika, dźewjatkarjo zaběraja so z prěnjej pomocu. Wězo steji za šulerjow zakónčaceho 10. lětnika na prěnim městnje, kak móža so na pruwowanja přihotować.
Serbskej swójbje wuběrnej hosćićelce
Hóstne swójby za wukrajnych šulerjow mamy mjeztym tež we Łužicy. A kaž poradźowarnja Stepin zwěsća, su mjez němsko- a serbskorěčnymi swójbami rozdźěle.
Budyšin/Drježdźany (SN/BŠe). „Wot prěnjeho wokomika su mje entuziazm, zrozumjenje za hóstnych šulerjow, pomocliwosć a zhromadnosć mjez serbskimaj swójbomaj zahorili“, praji Ursula Löffler z poradźowarnje Stepin, kotraž ma swoje stejnišćo w Drježdźanach. Wona bě minjeny čas dweju hóstneju šulerjow Zelnakecom w Kamjencu a Bobkecom we Worklecach sposrědkowała. Do toho njeměješe žane kontakty ze serbskimi swójbami. Nětko je pozitiwnje překwapjena, prawdźepodobnje šokowana wo zwjazanosći tudyšich ludźi. „Wuprajam tuž swoju česćownosć!“, wona podšmórnje.
Před 15 lětami so zběžk započał
Dźensa před 15 lětami zahaji so před Chróšćanskej srjedźnej šulu tydźenje trajacy protest, kotryž zańdźe do stawiznow Serbow jako dotal jónkrótny podawk: Chróšćan zběžk.
Chrósćicy/Budyšin (SN/JaW). Hižo cyłu chwilu bě so nastupajo serbske šule w Kamjenskim wokrjesu chětro wariło. Serbja, w prěnim rynku wězo starši, wojowachu wo zachowanje Chróšćanskeje srjedźneje šule „Jurij Chěžka“. Regionalny šulski zarjad nochcyše tam nowy 5. lětnik zarjadować, přemało šulerjow dla. To rěkaše poněčimna smjerć za ryzy serbsku šulu. Swój prěni wjeršk docpě protest z akciju před kubłanišćom, kotruž bě Domowina ze swojim tehdyšim předsydu Janom Nukom přihotowała. To běše 8. awgusta 2001 a poł tydźenja do spočatka noweho šulskeho lěta. Što z akcije wurosće, to tehdy nichtó prawje njewědźeše.
