Regionalny ligist FC Energija Choćebuz najebać dočasny kónc w krajnym pokalnym kole pilnje na zestawje noweho kadra dźěła. Jako prěnje koparski klub wozjewi, zo přińdźe kapitan Berlinskeho AK (BAK) Shawn Kauter jako nutřkowny škitar do Choćebuza. Jeho bilanca je wjele lubjaca. 25lětny bě w třećej lize dotal 37 króć zasadźeny a w štwórtej najwyšej lize Němskeje 129 razow. Jan Koch, kiž je zrěčenje z Energiju podlěšił, so na nowopřichad wosebje wjeseli. Wón znaje Kautera ze sezony 2018/2019, jako staj „zhromadnje pola BAK hrałoj a w škiće prima harmoněrowałoj“.