Přezjednota Niska – SJ Chrósćicy 2:0 (1:0)
Zestawa SJC: Králíček – Mark, F. Cyž, Černohorský, Graf, Marx, G. Zahrodnik (65. Matješk), M. Zahrodnik, Hawš (46. Kreuz), L. Zahrodnik (74. Rätze), Bogusz (86. Wencel)
Róla faworita běše sobotu w Niskej jasnje rozdźělena. Domjacy maja w tabulce hižo něšto dypkow předskoka a běchu minjenu hru w Chrósćicach jasnje za sebje rozsudźili. Přiwšěm chcychu Chróšćenjo na minjene hry nawjazać a domjacych tak dołho kaž móžno mjerzać.
Wot spočatka hry pokazachu hosćićeljo swoju klasu a bul derje w swojich rjadach dźeržachu. Z hry sem pak sej koparjo z Niskeje jeno mało šansow wuhrachu. Tola w 10 min. padny 1:0 za domjacych. Po wotkopje dobychu domjacy dwubój w powětře a bul padny k Luce Pluta, kiž sam na Petra Králíčeka běžeše a hrajny nastroj do klětki suny. Po tym běchu hosćićeljo dale mustwo z wjetšimi hrajnymi podźělemi. Chróšćenjo pak so derje organizowachu a z tym rumy za domjacych derje zastajichu. Tola přiwšěm sej domjacy někotre šansy přez spěšne kombinacije wuhrachu. Tute pak njewužichu.
