Postupne hry wulosowane
Postupne hry do třećeje najwyšeje koparskeje ligi Němskeje su jasne. Lochkoatletka Marie-Laurence Jungfleisch ze Stuttgarta je tři duele wulosowała. Z pjeć regionalnych ligow smědźa mjenujcy jeno tři mustwa do třećeje ligi postupić. Zamołwity za wulosowanje bě Manfred Schnieders, předsyda hrajneho wuběrka Němskeho koparskeho zwjazka (DFB).
Mišter regionalneje ligi, zapad hraje njedźelu, 28. meje, a srjedu, 31. meje, přećiwo dobyćerjej regionalneje ligi, sewjerowuchod a ma při tym najprjedy domjacu lěpšinu. Zastupjer regionalneje ligi, juhozapad dyrbi přećiwo cyłkej ze sewjera hrać. Ligaprimus z bayerskeje stafle nastupi najprjedy doma a wočakuje wicemištra juhozapadneje stafle. Zo njeby k někajkim skřiwjenjam wubědźowanja (Wettbewerbsverzerrung) na kóncu sezony dóšło, budźetaj wobdźělnikaj juhozapadneje stafle přidatnje wulosowanaj, hdyž budźe jasne, štó je mišter a štó wicemišter. Dokładne časy zakopow postaji DFB po wothłosowanju z telewizijnymi sćelakami.
Wuslědki (27.04.17)
Regionalna koparska liga
RB Lipsk II – Budissa Budyšin 2:0 (4:1)
BFC Dynamo – Babelsberg 2:1 (0:0)
Choćebuz – Hertha BSC II 1:1 (0:0)
Neugersdorf – Fürstenwalde 0:1 (0:0)
1. Jena 30 62 : 20 71
2. Energija Choćebuz 30 50 : 21 60
3. RB Lipsk II 30 61 : 38 53
4. Berlinski AK 29 50 : 36 51
5. FC Viktoria Berlin 30 58 : 43 49
6. Hertha BSC II 30 41 : 39 45
7. SV Babelsberg 03 30 43 : 40 43
8. VfB Auerbach 30 46 : 44 43
9. Wacker Nordhausen 28 38 : 41 42
10. FC Neugersdorf 30 34 : 29 40
11. BFC Dynamo 28 46 : 45 39
12. Lok Lipsk 29 45 : 46 37
13. Meuselwitz 29 29 : 31 35
14. FC Schönberg 29 42 : 52 35
15. Fürstenwalde 30 40 : 55 35
16. FSV Luckenwalde 30 32 : 63 23
17. Budissa Budyšin 30 26 : 55 18
18. Neustrelitz 30 26 : 71 10
krajna liga
Freiberg – Markkleeberg 0:2 (0:0)
Lößnitz – Eilenburg0:1 (0:0)
Reichenbach – Kamjenc 1:0 (0:0)
1. FC Eilenburg 22 62 : 16 58
2. Jednota Kamjenc 22 49 : 21 48
3. FC Grimma 22 46 : 22 48
4. Hohenstein-Ernstthal 21 53 : 31 39
5. Wocl Riesa 22 49 : 42 34
6. Pirna-Copitz 22 37 : 36 29
7. Markkleeberg 22 35 : 44 28
8. Přezjednota Niska 21 31 : 36 24
9. Rapid Kamjenica 22 38 : 41 23
10. Empor Glauchau 21 37 : 43 22
FC Energiji powětr wušoł
Po wukonje sprawne 1:1 docpěł je regionalny koparski ligist FC Energija Choćebuz njedźelu doma přećiwo amateram Herthy BSC. Pózdnje nawjedowanje Strelija Mamby (77.) za FCE wurunachu runohódni hosćo z wobhladanjahódnym konterom w 85. min. Choćebuženjo pokazachu wosebje w prěnim połčasu wahawu hru, kotrejž pobrachowachu zasadźenje a tak wužiwajomne šansy.
Remis dźens tydźenja pola Berlinskeho AK je chowancam trenarja Clausa-Dietera Wollitza po zdaću poslednje nadźije rubił, načolnika z Jeny hišće z prěnjeho městna w tabulce storčić. Za kulisami FCE sonděruja zamołwići tučasnje aktualny kader a rozhladuja so po chuduškich wikach štwórteje ligi, zo bychu w nich za zesylnjenjom pytali. Wulke mzdy pak nowopřichady w Choćebuzu wočakować njesmědźa. To pytanje za woprawdźitymi zesylnjenjemi přidatnje poćežuje. Georg Zielonkowski
Šnóruje kopački w Hnašecach
Rezerwa bykow čisło přewulka była
RB Lipsk II
– Budissa Budyšin 4:1 (2:0)
Zestawa hosći: Große – Heppner, Iliadis, Hausdorf, Salewski, Hoßmang, Kloß, Rosendo (83. Němec), Hermann (72. Žuljević), Barth (83. Šisler), Müller
Z někotrymi starosćemi w zestawje je so Torsten Gütschow z regionalnym koparskim ligistom Budissu Budyšin k RB Lipskej II nastajił. Dorost zwjazkoweho ligista pak hosćom wjele njedowoli. Woni njemějachu nimale žanu šansu, rezerwa Lipšćanskich bykow porno tomu tójšto. Zběhnjeny bul Johna-Patricka Straußa přez Mareka Großu wjedźeše k 1:0 (27.). Krótko do połčasa zwyši Timo Mauer za domjacych na 2:0 (45.).
Narěč trenarja Torstena Gütschowa w přestawce koparjow Budissy hišće raz motiwowaše. Spěšnje poradźi so hewak słabym Budyšanam přez Daniela Bartha, zastatk na 2:1 pomjeńšić (49.). Mustwo ze sprjewineho města hraješe nětko lěpje a nadźiješe so hišće wurunanja. Hrajerska klasa RB-youngsterow pak so přesadźi. Mauer třěli 3:1 (75.) a Federico Palacios 4:1 (88.). Za Budyšanow bě rezerwa bykow cyle jednorje čisło přewulka. Clemens Werner
Prěnje dobyće druheje połserije
FSV Budissa Budyšin
– 1. FC Lok Lipsk 2:1 (0:1)
Zestawa domjacych: Große – Kolan, Patka, Hausdorf, Heppner, Salewski (88. Němec), Hoßmang, Kloß, Müller (59. Hermann), Rosendo, Barth (77. Iliadis)
W druhej z třoch hrow w tak mjenowanym jendźelskim tydźenju wočakowaše Budissa na Młynkec łuce koparjow 1. FC Lok Lipska. Team trenarja Torstena Gütschowa běše sej předewzał skónčnje raz dobyć. Pavel Patka móžeše ze škitnej masku w mjezwoču domjacemu škitej trěbnu stabilitu dać. We wrotach steješe tónkróć Marek Große a pokaza přeswědčiwy wukon. Kaž hižo často startowaše Budissa derje do hry a měješe prěnje móžnosće, nawjedowanje docpěć. Daniel Barth pak njemóžeše přetworić. Přichodnu wrotowu scenu bě Barth spřihotował, wotpołožiwši bul Ezequielej Horacijej Rosendźe, kiž jón nimo wrotow třěli. Hosćo swoju prěnju składnosć hnydom wužichu. Daniel Becker docpě 0:1 (22.) ze 16 metrow. Znowa běchu Budyšenjo po někotrych dobrych šansach w zastatku.
Lěpši byli a přiwšěm jenož remis
Arnsdorfske KT
– ST Marijina hwězda 0:0
Zestawa hosći: O. Schmidt – Wróbl, Njek, Škoda, R. Hawš, Peschmann (89. Čornak), O. Hawš, T. Jurš, P. Schmidt, Winkler, Pakoßnick (79. D. Jurš)
K dalšej směrodajnej partiji poda so prěnje koparske mustwo Sportoweho towarstwa Marijina hwězda do Arnsdorfa. Bohužel pak dosahaše sobotu na kóncu jenož k bjezwrotowemu remisej, byrnjež hosćo přez dołhi čas hru postajeli. Z wěsteje defensiwy postarachu so woni wo někotre rjane nadběhi. W 4. min. namaka Oskar Hawš w wrotarju domjacych swojeho mištra, w 22. min. bu Paul Schmidt w poslednim wokomiku blokowany. Wobě móžnosći bě Alex Winkler přihotował. Pančičenjo ćišć dale zesylnichu, tak zo měješe hosćićel w škiće chětro wjele dźěła. W 26. min. prasny třělwa Tomaša Jurša na nutřkownu žerdź. Dźesać mjeńšin do połčasa njebě fortuna znowa na jich stronje, a Jakob Pakoßnick sadźi wólny kop do aluminija.
Djumo dwoje wrota třělił
FC Hornja Łužica Neugersdorf
– FSV Budissa Bautzen 2:0 (1:0)
Zestawa hosći: Wohlfeld – Kolan, Iliadis (86. Šisler), Hausdorf, Heppner, Milde, Pfanne (31. Kloß), Hoßmang, Salewski, Němec (65. Müller), Rosendo
Z derbyja w Neugersdorfje bychu sej koparjo Budissy Budyšin rady dypk sobu wzali. Prěnje móžnosće woni tež mějachu. Daloka třělwa Franza Pfanny pak dźěše snadnje nimo wrotow. Někotre mjeńšiny pozdźišo poda so samsny hrajer sam na wrotarja domjacych, zo by jeho přewinył, njebě pak wuspěšny. Hosćićeljo sčinichu to lěpje a docpěchu přez Bocara Djuma nawjedowanje (22.). Dalši dyr do tyła dósta Budissa w 31. min. Pfanne bu foulowany, so při tym zrani a dyrbješe so wuměnić dać. Krótko do połčasa móhli hosćo hišće wurunać. Třělwu Paula Mildy pak Neugersdorfski wrotar wotpopadny.
Budyšanka pola RB w Lipsku za bulom honi
W zwjazkowej koparskej lize muži hraje mustwo RB Lipsk super sezonu; mało ludźi pak wě, zo tam w Lipsku tež rodźena Budyšanka Aline Wegerdt za bulom honi. Ze 17lětnej łužiskej zastupjerku žonjaceho mustwa RB Lipsk je so za Serbske Nowiny Hanspeter Benad rozmołwjał.
Hdźe sće kopańcu hrać započała?
A. Wegerdt: To bě w mojim ródnym měsće pola Budissy (po tym hraješe wona pola FFV Lipsk, přisp. red.)
Što běchu dotalne wjerški Wašeje karjery?
A. Wegerdt: Z koparskej wubranku Sakskeje smy w starobnej skupinje turněr Sewjerowuchodneho koparskeho zwjazka Němskeje dobyli.
Kotre cile hišće maće?
A. Wegerdt: Chcu z RB Lipskom rady do regionalneje ligi postupić a snano raz w němskej zwjazkowej lize hrać.
Što činiće, hdyž za bulom njehoniće?
A. Wegerdt: To zetkawam so z přećelkami a přećelemi abo ze swójbnymi. Šulske wěcy su tež wažne. A nakupować wězo tohorunja rady chodźu.
Kak so Wam w Lipsku pola RB lubi?
A. Wegerdt: Tu hraja jara dobru kopańcu a hrajerki móža so optimalnje dale wuwiwać. Jónkrótne su přećelstwa, kotrež tu nastawaja. Zamołwići a trenarjo su cyle jednorje perfektni.
30. jubilejny běh na Mnišonc
Při chětro wětřikojtym zymnym wjedrje je so minjenu srjedu hižo 30. jubilejny běh wo hórskeju kralow wot Hornjohórčanskeje sportoweje hale hač na wjeršk 449 metrow wysokeje hory Mnišonc přewjedł. Při tymle wubědźowanju ze zdźěla jara nahłymi stupanjemi mějachu mužojo kaž žony wšitkich starobnych skupin, tež ći najstarši, 230 metrow wysokostneho rozdźěla přewinyć. Cil běše za nich direktnje při woblubowanym hosćencu z wuhladnej wěžu, ke kotremuž je so 62 atletow a 15 atletkow zdračowało.
Mjez mužemi je sej 31lětny Hartmut Engert z Budyšina titul hórskeho krala w 14:36 min zawěsćił. Pola žonow bě 32lětna Franziska Kranich z Niskeje hórska kralowna w 17:17 min. Na 3,3 kilometrach wubědźowaštaj so tež zaso najstaršej wobdźělnikaj cyłeho zarjadowanja: 70lětna Hella Helmowa z Rakec (37:32 min) a 82lětny Jurij Nuk z Budyšina (33:10 min), kotrajž so tohorunja hač na wjeršk dodrapaštaj. Wobeju počesći Hornjohórčanske sportowe towarstwo w starobnymaj klasomaj.
