Serbska awantgarda w Krakowje
Krakow. We wobłuku 38. Krakowskeho mjezynarodneho festiwala komponistow předstajištaj Jan Kalinowski (cello) a Marek Szeler (křidło) wčera prapremjernje kruch Jana Cyža „Pax optima rerum – Pokój jest najlepszy“. Samsna wobsadka wuhotuje tež němsku premjeru, a to 3. junija na 24. Braniborskim swjedźenju noweje hudźby „Intersonanzen“ w Podstupimje.
Nalada rjemjeslnikow špatna
Drježdźany. Konjunkturna analyza Drježdźanskeje rjemjeslniskeje komory wotbłyšćuje špatnu naladu mjez zawodami. Poprawom so situacija rjemjeslniskich předewzaćow w nalěću stajnje polěpša. Tola lětsa njebě rozmach tajki wulki kaž hewak. Hospodarske ramikowe wuměnjenja su nadal hubjene, na čož měła politika z jasnymi impulsami reagować, sej komora žada.
Podij wo přichodźe Europy
Spěchowanje na dobro wuwića
Kamjenc. Spěchowanje we wysokosći štyrjoch milionow eurow přepoda wčera, srjedu, statna sekretarka Barbara Meyer wyšemu měšćanostu Kamjenca Rolandej Dantzej. Su to pjenjezy ze spěchowanskeho programa za wuwiće městow. Wosebje spěchuja z nimi měšćanske štwórće ze socialnymi problemami. 38 komunow so cyłkownje spěchuja.
Na Dnju Europy zastupjenej
Žitawa/Raduš. Hibanje Slavonic Europe a Radušanske Słowjanske hrodźišćo stej na Dnju Europy jutřišim, sobotu, w krajowym třiróžku Pólskeje, Čěskeje a Sakskeje blisko Žitawy zastupjenej. Na zhromadnym stejnišću budu tež čłonojo Europskeho kongresa Ukrainjanow z Prahi přitomni. Podawk wotměje so składnostnje přistupa Čěskeje a Pólskeje k Europskej uniji 1. meje 2004.
Zastaraja XXL-pacientow
Lětne zeńdźenje zahajili
Lubnjow. Bahne Bahnsen, předsyda dźěłoweho zjednoćenstwa FUEN za naležnosće mjeńšinow bjez maćerneho stata, je dźensa něhdźe 30 wobdźělnikow z 10 krajow na lětne zeńdźenje w Lubnjowje witał. Nimo Alexandera Erberta, přirjadnika we wokrjesu Hornje Błóta/Łužica, je tež předsyda Domowiny Dawid Statnik hosći do Łužicy powitał. Wón podšmórny hódnotu mjezsobneje wuměny mjez europskimi mjeńšinami.
„List z Bórkowow“ w mediatece
Bórkowy. W mediatece ARD je wot wčerawšeho wječora reportaža RBB pod titulom „Der Brandbrief aus Burg“ přistupna. Loni w aprylu staj so wučerjej šule Miny Witkojc z (najprjedy anonymnym) listom medijam prawicarskim podawkam na kubłanišću wobarałoj. Mjeztym staj šulu wopušćiłoj. Reportaža so tomu wěnuje, kak ludnosć w Bórkowach z problematiku wobchadźa.
Wjelki ilegalnje morili
Medicinska uniwersita we Łužicy
Choćebuz/Podstupim. Łužica dóstanje medicinsku uniwersitu. Wědomostna rada poradźowanskeho gremija Zwjazka a krajow je tomu wčera přihłosowała, zdźěli braniborske wědomostne ministerstwo. Uniwersita budźe lětsa 1. julija załožena. Prěni studowacy měli k zymskemu semestrej 2026/27 swój studij w Choćebuzu zahajić móc.
Jasnje mjenje twarnišćow
Kamjenc. Ličba twarskich dowolnosćow za bydlenja w Sakskej je dale a mjenje. Loni bě jich samo 26 procentow mjenje hač lěto do toho, zdźěli wčera krajny statistiski zarjad ze sydłom w Kamjencu. Najwjac twarskich próstwow, mjenujcy 382, je twarski zarjad w Lipsku dowolił. Po tym sćěhuje Lipšćanski wokrjes z 349 přizwolenjemi. W Drježdźanach su zarjady 219 twarskich dowolnosćow sposrědkowali.
CDU: Wólbny bój z wjelkom
Wjace prawicarskich nadpadow
Drježdźany. Dohromady 250 nadpadow z prawicarskim motiwom su regionalne poradźowarnje za wopory namocy loni w Sakskej registrowali. Porno předlětu je ličba z tym wo 21 procentow stupała – to pokazuje cyłkowna statistika, kotruž su pjatk w Drježdźanach wozjewili. Dohromady 380 ludźi je potrjechenych. Nimo městow Lipsk, Drježdźany a Kamjenica słuša nětko tež wokrjes Zhorjelc do ćežišćowych regionow namocy.
Wylem-Keł kandiduje za AfD
Wětošow. Čłon Serbskeho sejma Hanzo Wylem-Keł z Huštanja (Wüstenhain) kandiduje jako jedna z dweju wosobow za AfD při wólbach zhromadźizny měšćanskich zapósłancow we Wětošowje 9. junija. To wuchadźa z přehlada wo wólbnych namjetach stron a zjednoćenstwow, kotrymž je měšćanski wólbny wuběrk k wólbam přizwolił a je w hamtskim łopjenje wozjewił.
Zběrka kaligrafijow a poezije
Měto Nowak nowy nawoda
Berlin. Po třoch měsacach wakancy je mjeńšinowy sekretariat w Berlinje poziciju wjednistwa wobsadźił. Nowy nawoda je wot 15. apryla delnjołužiski Serb Měto Nowak. W swojim poslednim zastojnstwje jako referent braniborskeho społnomócnjeneho za serbske naležnosće je wusko z mjeńšinowymi zwjazkami hromadźe dźěłał. Do toho je pjeć lět Choćebuski Rěčny centrum WITAJ nawjedował.
Insolwenca jako sćěh skandala?
Drježdźany. Třěšny zwjazk organizacijow migrantow w Sakskej ma so po wuprajenju zarjadnika insolwency rozpušćić. K citatej w „Sakskich Nowinach“ nochcyše so zwjazk na naprašowanje SN wuprajić. Insolwenca je dalši sćěh rozprawy zličbowanskeho zarjada, kiž bě socialnemu ministerstwu pod Petru Köpping (SPD) politiske znjewužiwanje spěchowanja we wobłuku migracije wumjetował.
Wobchadne přeńdźenja přiběrali
W duchu do Indoneziskeje
Pančicy-Kukow. Njewšědnje wulki wothłós žnjał je wčera wot Domowinskeje skupiny Pančicy-Kukow organizowany přednošk Achima Miča wo jeho dožiwjenjach w Indoneziskej. Něhdźe 60 zajimcow je do awle Šule Ćišinskeho přichwatało, nimo skupinarjow mnozy dalši ze wsy a wokoliny. Jich wza Mič w duchu sobu na pućowanje po kupach Sulawezi, Java, Bali a do dalšich kónčin.
Dosć wody w zawěrach
Pirna. Rěčne zawěry w Sakskej su k nimale sto procentam z wodu napjelnjene. Tole zdźěli rěčnica krajneho zarjada za rěčne zawěry. Za zastaranje z wodu je tak lětsa dobry zakład tworjeny. Někak 40 procentow pitneje wody zaruča so w Sakskej přez dohromady 25 rěčnych zawěrow. Tež při suchim lěću njewidźa tuchwilu wohroženje zastaranja.
Witanski pjenjez wobzamknyła
Žadyn dźiw na postawje
Drježdźany/Wotrow. Prašenje za pozdatnym dźiwom na postawje blisko Wotrowa je rozrisane. Po přepytowanju zdźěli biskopstwo Drježdźany-Mišno wčera, zo jedna so při čerwjenej maćiznje wo roztoče. Klaus Reinhardt, profesor za nałožowanu coologiju při Drježdźanskej TU, bě k tutomu rezultatej přišoł. Wulka ličba zwěrjatkow na hłowomaj postawy móhła na ćopłoće zaležeć.
Stawki maturu poćežuja
Budyšin. Po cyłej Sakskej stawkuja wot dźensa, srjedy, hač do njedźele zaso busowi šoferojo. W Budyskim wokrjesu je wospjet předewzaće RegioBus potrjechene. Wosebje mjerzacy je stawk za maturantow, kotřiž tuchwilu swoje pruwowanja złoža. Sakski kultusowy minister Christian Piwarz bě so wčera nad situaciju wulce hóršił.
Poskićuja přezmjezny studij
Serbske filmy w Drježdźanach
Drježdźany. We wobłuku dźensa zahajeneho 36. filmoweho swjedźenja Drježdźany wuhotuja Sakski filmowy zwjazk, serbsko-němska syć Łužycafilm a Załožba za serbski lud jutře pod hesłom „Wiźeś – Sichtbar – Widźomne“ popołdnjo „serbskich (krótko)filmow“. Mjez druhim předstaja na Hrodźe Lingnera pask „Som doma“ a knihu „Serbske filmowe krajiny“ Grit Lemke a Andyja Rädera.
Druhi raz „Happy monday“
Budyšin. Na druhej „Wjesołej póndźeli“ dožiwi wčera něhdźe 300 zajimcow Młodźinski dujerski orchester Budyšin, skupinu Fortschritt a „Spěwy do směrkow“ z Annu Mariju Bretschneider, Tassom Schille a Timom Heilmannom na Budyskim Hłownym torhošću. Přichodnu póndźelu wuhotuja mjez druhim Serbski institut a band Skaprifischer program na Póstowym naměsće.
Budyšanej myto spožčiła
Přihotowanski wuběrk powołany
Choćebuz. Zwjazkowe předsydstwo Domowiny je minjeny pjatk w Choćebuzu čłonku a čłonow přihotowanskeho wuběrka za Mjezynarodny folklorny festiwal „Łužica“ 2025 powołało. To su Gabriel Krawc ze Serbskeje rejowanskeje skupiny Smjerdźaca, Błažij Handrik ze Serbskeho folklorneho ansambla Wudwor, Chróšćanski wjesnjanosta Marko Kliman kaž tež Katharina Jurkowa a Pětr Brězan z Domowiny.
Lětsa holcy w čitanju dobyłoj
Budyšin. 14 holcow a dwaj hólcaj, wšitcy su šulerjo 3. lětnika serbskich zakładnych šulow, su so zašłu sobotu w čitanju wubědźowali. Walentina Koklic z Ralbičanskeho kubłanišća je była mjez dwanaće maćernorěčnymi najlěpša a Sascha Landeckec z Budyskeho mjez štyrjomi w skupinje serbšćinu wuknjacych dźěći. Rěčny centrum WITAJ je čitanske wubědźowanje lětsa 20. króć organizował.
Dwójny poskitk wuknihowany