Poršicy (CS/SN). Z poswjećenjom třoch nowych mjedźanych zwonow Poršiskeje cyrkwje je so wčera wulke předewzaće wosady a spěchowanskeho towarstwa wuspěšnje skónčiło. Spěchowanske towarstwo běchu 2012 załožili. Njeličomni sponsorojo a pomocnicy projekt podpěrachu.
Wčera běštej konjacej zapřahaj po puću, zo byštej zwony wšitkim wobydlerjam Poršiskeje wosady předstajiłoj. Mjeńšej zwonaj ćehnješe zapřah ze štyrjomi konjemi, wulki zwón ćehnješe dwukonjacy zapřah. W Lětonju so wobaj zetkaštej a jědźeštej zhromadnje do Poršic. Tam dźěše hišće raz přez cyłu wjes, doniž jej skónčnje před cyrkwju pod zynkami pozawnoweho chóra wosady njewitachu.
Dźěćo mylnje do awta zamknył
Budyšin. Po nakupowanju ze swojej třilětnej dźowku wróći so sobotu 33lětny muž w Budyšinje k swojemu awtu. Sadźiwši do toho holcu na jeje městno, połoži wón twory do wačoknika a wostaji tam tež kluč ležo. Začiniwši wačoknik so awto sekundy pozdźišo same wot so zamkny. W swojej nuzy zawoła muž policiju. Zastojnicy dojědźechu sej k jeho mandźelskej po rezerwowy kluč, tak zo móžachu dźěćo njezranjene „wuswobodźić“.
Njebjelčicy (SN/MiR). Wulki bě nawal a zajim ludźi za nowe dźěćace dnjowe přebywanišćo „Jan Skala – Barbojte kamuški“ w Njebjelčicach, kotrež bu wčera oficialnje wotewrjene. To njeběchu wjesnjanosta Tomaš Čornak (CDU) a jeho gmejnscy radźićeljo a wšitcy, kiž běchu so za twar noweho kubłanišća zasadźeli, wočakowali. Woni běchu přemóženi wo wulkej přichilnosći a wobdźiwanju přitomnych, kotřiž su sej areal wobhladali. Architekt objekta Thorsten Luka z Lipska je hižo městno namakał, hdźež so wón wosebje derje čuje: „Je to róžk na dworje, hdźež hladam na druhi bok do rumnosćow za kreatiwnu zaběru.“ Jeho zaměr, nutřkowny wobłuk z přirodu njeposrědnje zwjazać, je so wulkotnje poradźił. Na tymle dworje witaše Tomaš Čornak wopytowarjow a dźakowaše so wšitkim, kiž su při realizowanju projekta pomhali, wosobinsce nawodnicy kubłanišća Andreji Hejdušcynej.
Na dóńt nućenych dźěłaćerjow za čas Druheje swětoweje wójny dopomina nětko pomnik „Płomjo a sylzy, nadźija a ćerpjenje – Nadja“ w Njebjelčicach napřećo pohrjebnišću.
Njebjelčicy (SN/MWj). Wot wuměłca Roberta Algera stworjenu skulpturu je farar Beno Jakubaš požohnował. Do toho běštaj Syman Deleńk a Charlota Čornakec samospisanu baseń a spěw Berna Pittkuningsa přednjesłoj. Nastork za pomnik dał bě před lětomaj wopyt Nikolaja Tokarskeho, kotrehož mać Nadju běchu na Ukrainje zajeli a w Njebjelčicach k dźěłu nućili. Dźensa 91lětna drje njemóžeše sama do Njebjelčic přijěć, jeje syn Nikolaj pak bě wčera přewšo hnuty a so tež swojich sylzow njehańbowaše, zo we Łužicy z pomnikom na wosud jeho maćerje a wšitkich nućenych dźěłaćerjow spominaja. Nikolaja Tokarskeho powita w jeho maćeršćinje Gerat Korjeńk.
Młynkowa naslěduje Kowarja
Choćebuz. Nowa hornjoserbska zastupowaca čłonka rady Załožby za serbski lud je Marlis Młynkowa ze Serbskeho šulskeho towarstwa. Wona naslěduje Marka Kowarja, kotryž je zastojnstwo z wosobinskich přičin złožił, poinformowa předsyda Domowiny Dawid Statnik na posedźenju zwjazkoweho předsydstwa sobotu w Choćebuzu.
Zwjena z noweje twornje
Kodersdorf. Zajutřišim, srjedu, je zazběh za nowotwar zawoda k zhotowjenju zwjenow z lochkometala firmy Borbet w Kodersdorfje pola Zhorjelca. Zawod nastanje bjezposrědnje při awtodróze A 4. Tam ma nastać 400 nowych dźěłowych městnow. Požadanja k tomu přijimuje dźěłowa agentura w Niskej.
Sakska atraktiwne stejnišćo
Drježdźany. Hospodarske spěchowanje Sakskeje (WFS) zmóžni loni zasydlenje 13 nowych předewzaćow a rozšěrjenje dalšich dźesać. Z tym bu 600 nowych dźěłowych městnow wutworjenych, wuchadźa ze zdźělenki towaršnosće. Cyłkownje je so 182 milionow eurow inwestowało. WFS zregistrowa 37 procentow wjace naprašowanjow za nowozasydlenje hač 2013.
Kanada dale bjez poražki
Gumijowy čołm pokradnyli
Wulke Ždźary. Na kotrym z łužiskich jězorow drje paduši swoju rubiznu wužiwaja? Z tymle prašenjom zaběra so policija we Wulkich Ždźarach, hdźež běchu sej njeznaći njewšědnu rubiznu wupytali. W nocy na minjenu srjedu přewinychu woni płót wokoło saněrowanskeje kónčiny Hórnikečanskeho jězora a dóstachu so tak na twarnišćo. Tam pokradnychu industrijowy gumijowy čołm, štyri padle a wonkowny motor. Škodu na skóncowanym płoće a hódnotu pokradnjeneho dźěłoweho gratu saněrarjow trochuja na dohromady 5 500 eurow. Kriminalna policija pad přepytuje a nětko najskerje při jězorach wosebje kedźbuje.
Róžant (SN/MWj). Gmejna Ralbicy/Róžant wotkupi klóštrej Marijinej hwězdźe na kromje Sernjan dwaj hektaraj pódy, hdźež móhli sej priwatni zajimcy přichodnje swójski dom natwarić. Nimo płaćizny na kwadratny meter, kotruž w zjawnosći radšo rjec nochcedźa, přewozmje komuna tež wudawki za notara a dalše kóšty. Tole je gmejnska rada na swojim wčerawšim posedźenju w Róžeńće wobzamknyła. Nimo toho přepodachu nadawk za planowanje wotkryća płoniny Drježdźanskemu inženjerskemu běrowej, z kotrymž maja ze zašłosće dobre nazhonjenja.
Njezrozumjenje wubudźi wčera žadanje, zo měł so za Sernjansku nowu bydlensku štwórć posudk wo poćeženju přez haru zdźěłać, dokelž tam statna dróha nimo wjedźe. „Wšitcy druzy w Sernjanach dyrbja z dróhu žiwi być, ale za nowe domy předpisuja nam posudk wo harje“, komentowaše Tomaš Bjeńš po jeho měnjenju bjezzmyslne žadanje.
Zo móžeš něštožkuli za swoju wjes wuskutkować, hdyž so prócuješ a za móžnosćemi pytaš, dopokazuja znowa w Miłoćicach, hdźež su minjene lěta hižo sportnišćo ponowili a wjesny hat porjeńšili.
Miłoćicy (bš/SN). Wo dalšim porjeńšenju wsy rěčachu wčera wječor třo socialni dźěłaćerjo z Drježdźan z wjesnjanami z Miłoćic. Wobydlerjo a čłonojo wjesneho towarstwa Miłočanska žaba běchu so lětsa we wobłuku projektneho programa „Horje z konopeja“ wo spěchowanske srědki požadali. Je to akcija Němskeje załožby za dźěći a młodźinu, mjez druhim w kooperaciji ze sakskim ministerstwom za socialne.
Spěchuja Lessingowy dom
Kamjenc. Zwjazk spěchuje saněrowanje podzemja Kamjenskeho Lessingoweho domu z wjace hač 120 000 eurami z programa „Inwesticije za narodne kulturne zarjadnišća we wuchodnej Němskej“. To wobkrući tele dny zwjazkowa ministerka za kulturu prof. dr. Monika Grütters zapósłanči zwjazkoweho sejma Mari Michałkowej (CDU).
Přijeće k pólskemu swjatkej
Berlin. Wulkopósłanc Pólskeje w Němskej dr. Jerzy Margański je wčera něhdźe sto hosći w Berlinje přijał. Aktualna přičina bě róčnica Konstitucije 3. meje, z kotrejž bě pólski sejm 1791 prěnju modernu wustawu Europy w zmysle rozswětlerstwa schwalił. Za Zwjazk serbskich wuměłcow wobdźělištaj so Alfons Wićaz a prof. dr. Dietrich Šołta na zetkanju.
Chróšćenjo dóstanu premiju
Chrósćicy. Projekt dźěći, młodostnych a staršich ze wsy a z wokoliny „Přirodźe bliska zahroda w Chróšćanskej pěstowarni“ słuša k najlěpšim lětušeje 48hodźinskeje akcije. Za to dóstanu 250 eurow. Premiju zmóžnja Budyska wokrjesna lutowarnja. We wokrjesu Budyšin chce so lětsa dohromady 84 skupin na akciji wobdźělić, kaž zdźělichu.