Ralbicy (JK/SN). Wokomiknje je zaměrowy zwjazk za wopłóčki Při Klóšterskej wodźe bjez jednaćela. Dotalny wotrjadnik Jan Mikel jón tuchwilu komisarisce wjedźe. Zwjazk pak trjeba po smjerći wjelelětneho jednaćela Hansa-Joachima Schöny nowe wjednistwo abo podobne zjednoćenstwo, kotrež by wjednistwo zaměroweho zwjazka přewzało. Wo tym rozmyslowali su čłonojo gmejnskeje rady Ralbicy-Róžant na swojim minjenym posedźenju.
Spěšnotesty na koronawirus maja so přichodny čas tež w Budyskim wokrjesu z wažnym instrumentom přećiwo koronapandemiji stać. Nětko wozjewichu lisćinu, hdźe móža so ludźo darmotnje testować dać.
Budyšin (SN/MWj). Na dokładnje 21 městnach, mjez druhim w mnohich apotekach a fyzioterapeutiskich praksach Budyskeho wokrjesa móžeš so tuchwilu na koronawirus testować dać. W dalšich 37 wjetšich a mjeńšich centrumach so na to přihotuja. Přichodne dny tam swoje dźěło zahaja, kaž w nowinskej zdźělence wokrjesa rěka. Nimo toho budu tři mobilne testowanske skupiny po puću, kotrež w Budyskim, Kamjenskim a Wojerowskim regionje dohromady 27 gmejnow docpěja. Za testowanje dyrbja sej wobydlerjo termin wujednać. We wjetšich centrumach kaž tež pola mobilnych skupin je we wuwzaćnych padach test tež bjez přizjewjenja móžny.
Po něhdźe pjeć hodźinach je Budyski wokrjesny sejmik wčera we Wojerecach wokrjesne etatne wustawki 2021/2022 wobzamknył, tworjo tak zakładny konsens nastupajo srjedźodobne financne planowanje hač do lěta 2025.
Wojerecy (KD/SN). Diskusiju wo dwójnym etaće z cyłkownej sumu něhdźe jedneje miliardy eurow je frakcija AfD zahajiła. Dokelž pandemije dla dochody woteběraja a wudawki rozrostuja, hrozy wokrjesej hižo w lěće 2023 minus 21 000 eurow, lěto pozdźišo budźe to 16,8 milionow eurow, wuswětli frakciski předsyda Henry Nitzsche. Tele wuwiće móžetej jenož konsekwentna konsolidacija budgeta a hnydomne pytanje ze rezerwami zadźeržeć. AfD ma za trěbne ličbu personala pomjeńšić, dokelž wobydlerstwo na teritoriju wobstajnje woteběra. Hans-Jürgen Stöber z frakcije Lěwicy nima to za spomóžne. Wšako ličba tych ludźi přiběra, kotřiž pomoc na młodźinskim abo socialnym zarjedźe pytaja.
Mjenje natyknjenjow
Budyšin. W Budyskim wokrjesu informowaše strowotniski zarjad wčera wo třoch dalšich natyknjenjach z koronu a wo dalšim smjertnym padźe. Aktualnje je 634 schorjenych (-9). RKI poda dźensa incidencu 116,8. W Zhorjelskim wokrjesu zwěsćichu sydom nowoinfekcijow, jedna wosoba je zemrěła. Indicenca po RKI je tam dźensa 140,5.
Götz Schweighöfer zemrěł
Budyšin. Dźiwadźelnik Götz Schweighöfer je njedźelu 61lětny po ćežkej chorosći zemrěł. Wotrostł bě wón w Altenburgu, wot lěta 2000 do 2008 skutkowaše ze swójby dźiwadźelnikow pochadźacy w Budyskim Němsko-Serbskim ludowym dźiwadle. Mjez druhim hraješe Götz Schweighöfer Čorneho młynka w kruchu „Krabat“ a naposledk w Budyskim lětnim dźiwadle „Olsenbande“.
Žane zjawne mytowanje
Bolborcy. Dróhotwarskich dźěłow dla je wot dźensnišeho hač do 12. meje wokrjesna dróha wot Tellerec zawoda w Bolborcach hač ke křižowanišću statneje dróhi S 106 w Słonej Boršći dospołnje zawrjena. Tak kaž tamny dźěl dróhi do směra na Haslow ma tež jězdnja do směra na Słonu Boršć nowu asfaltowu worštu dóstać. Wjacore wokołopuće su wupisane a wjedu po wokrjesnych a statnych dróhach.
Zahroda w přewodniku
Pančicy-Kukow. W nalětnim wudaću po cyłej Němskej wuchadźaceho magacina „Der Pilger“ je nětko zelowy a zežiwjenski centrum klóštra Marijineje hwězdy w Pančicach-Kukowje sobu zapřijaty. Sobudźěłaćerka Křesćansko-socialneho kubłanskeho skutka Lisa Wuttig je so za magacin na kołopuć po klóšterskej zahrodźe z jeje 500 rostlinami podała. Nadrobnje rozłožuje wona zwisk mjez wědu rjadniskich sotrow a modernej zahrodniskej techniku. Na te wašnje chcedźa putnikow a dalšich zajimcow pohnuć, zo sej zahrodu wobhladaja.
Kćenjowy běh wirtuelnje
Budyšin (SN/MWj). Byrnjež sněh a temperatury minjenych dnjow skerje na zymski počas dopominali, směmy poněčim z nalětnim wjedrom ličić, tak zo najwšelakoriše družiny žabow, krokawow a mološow dźeń a bóle ze swojeho zymskeho sprostnjenja wotućeja a k swojim njerkanskim wodźiznam pućuja. Za to su přirodoškitne stacije a wjacore towarstwa w Budyskim wokrjesu minjene tydźenje tak mjenowane amfibijowe płoćiki nastajili. Prěnje pućowanja małych štyrinohačow zwěsćichu fachowcy hižo na ćopłych dnjach w februaru.
Kolesowarka ćežko zranjena
Narć. Na zwjazkowej dróze B 96 w Narću sta so sobotu dopołdnja ćežke wobchadne njezbožo, při kotrymž je so 79lětna kolesowarka strašnje zraniła. Wona bě po wokrjesnej dróze ze směra Noweje Łuki přijěła a chcyše zwjazkowu dróhu přeprěčić, zo by so na kolesowansku šćežku na tamnym boku puća dóstała. Wona pak přewidźa z Wojerowskeho směra přijěduce wosobowe awto typa Suzuki, kotrehož 62lětny wodźer zražce hižo zadźěwać njemóžeše. Při tym njeje so jenož rentnarka ćežko zraniła, tež šofer Suzukija snadne zranjenja poćerpje. Wěcna škoda wučinja po informacijach Zhorjelskeje policajskeje direkcije tysac eurow. Njezbožowa słužba dokładnu přičinu njezboža přepytuje.