Krótkopowěsće (07.05.20)
Hladanska słužba potrjechena
Budyšin/Zhorjelc. Z 13 nowonatyknjenymi je ličba infekcijow z koronawirusom w Budyskim wokrjesu na 374 přiběrała. Wosebje potrjechena je ambulantna hladanska słužba, čehoždla dyrbja nětko něhdźe 100 hladanja potrěbnych a ewentuelnje jich přiwuznych testować. W Zhorjelskim wokrjesu je dalša wosoba pandemije dla zemrěła. Tu maja mjeztym 21 mortwych. Z jednej nowej infekciju je nětko dohromady 268 natyknjenych.
„Rokotak“ myto dobył
Budyšin. Mjeztym štwórty raz je jury Serbskeho poskitka tydźenja w syći (SPTWS) myto spožčiła. Tónraz smě so Milan Grojlich alias „Rokotak“ nad sto eurami wjeselić. Wón je za čas koronapandemije hnydom tři spěwy wozjewił, pohnuwajo ludźi k tomu doma wostać. Wosebje přeswědčił je jurorow tekst jeho „Prózdnych dróhow“.
Lětopis 1/2020 wušoł
Wospjetna suchota wulke wužadanje
Lěs ma być dodawar drjewa, wuchowar klimy, ekosystem, domizna zwěriny a wotpočnišćo čłowjekej
Lěće 2018 a 2019 běštej tež za sakske lěsnistwo ćežkej. Wichory, suchota a skórnik su lěsy njesměrnje wužadali. Kaž w Sakskej ma lěsnistwo po cyłej Europje hižo lěta zmištrować změny, kiž su wočiwidne a čujomne a kotrež njebudu přichodnje jenož wuwiće klimy, ale tež přirody postajeć.
Wosebje lěto 2018 bě pokazało, zo je změna klimy woprawdźitosć. Fachowcy a wobhospodarjerjo lěsow su spóznali, zo móže jenož wulkomyslne a jara wobšěrne přerjadowanje lěsow połoženje dołhodobnje a skutkownje stabilizować. Sakska je w tym nastupanju minjene lěta wulke postupy docpěła, hdyž je lěs přiběrajcy přetworjała. Tak je wosebje běłe jědle, ale tež lisćowcy kaž duby, hórske klony a buki sadźeć dała. Tele napinanja chce nětko hišće raz zesylnić.
Wobstatk dźiwiny přiměrić
Policija (06.05.20)
Žanu rozbuchlinu njenamakali
Zhorjelc. W Zhorjelskim krajnoradnym zarjedźe mějachu so wčera z bombowym hroženjom rozestajeć, kotrež bě tam připołdnju dóšło. Po dorěčenju z policiju wšak zamołwići z konkretneho wohroženja njewuchadźachu. Přiwšěm je policija popołdnju dom na Dwórnišćowej z pomocu psow za schowanej rozbuchlinu přepytała, zdźěla zarjad. Namakała tam na zbožo ničo njeje, a dźěło na zarjedźe njebě zasadźenja dla wulce mylene, w nowinskej zdźělence dale rěkaše.
Njewšědne zasadźenje za policiju
Mortkow. Čorny ryćer je minjeny štwórtk w Mortkowje zasadźenje policije zawinił. Kaž wona hakle wčera zdźěli, bě wobydlerka nuzowe čisło woliła a zdźěliła, zo chcetej so maskěrowanej wosobje ze sekeru na tamnišu twjerdźiznu zadobyć. Zastojnicy na městnje zwěsćichu, zo jednaše so wo fotoshooting. 21lětny bě so zwonka areala w samopaslenym ryćerskim brónidle a kumštnej sekeru před twjerdźiznu fotografować dał.
Dźakne kemše njebudu
Přirodoškit sylnišo spěchować
W Dubjanskim lěsu tuchwilu štomy pušćeja
Połpica (SN/JaW). Na arealu wotnožki Němskeje zwjazkoweje załožby wobswět (DBU) přirodne herbstwo w Dubjanskim lěsu pola Połpicy (Halbendorf/Spree) tuchwilu z ćežkej techniku dźěłaja. Kaž DBU, kotraž je wobsedźerka Dubjanskeho lěsa a k tomu słušaceho bywšeho wojerskeho zwučowanišća, w nowinskej zdźělence informuje, „pušćeja lěsni dźěłaćerjo suche chójny a šmrěki podłu wokrjesneju dróhu mjez Połpicu a Lemišowom (Lömischau) a z Połpicy do směra na Lichań (Spreewiese) kaž tež do směra na Nowu Wjes (Neudorf)“. Zdobom zamołwići připowědźeja, zo dochadźa na tychle wotrězkach k poćežowanjam wobchada, dokelž dyrbja tam dróhu wěstotnych přičin dla dźělnje zawrěć. Na to měli so wobydlerjo kaž tež šoferojo nastajić.
Prěni stresowy test wobstali
Zhorjelski krajny rada Bernd Lange widźi wuspěchi w koronapandemiji
Zhorjelc (AK/SN). W Zhorjelskim wokrjesu su prěnje wuspěchi w boju přećiwo koronapandemiji widźomne. „To je woprawdźite pruwowanje. Smy pak tónle stresowy test wobstali“, rjekny krajny rada Bernd Lange (CDU) spočatk tydźenja nowinarjam. Hač do njedźele mějachu we wokrjesu 266 wobkrućenych padow korony, z nich je 93 schorjenych, třoch lěkuja w chorowni. 165 potrjechenych je w karantenje, 153 je wustrowjenych. Dwacećo su na koronawirus zemrěli.
„Prěni pad zwěsćichu 10. měrca pola muža, kiž bě so z dowola w Južnym Tirolu nawróćił. Kónc měrca so pady kopjachu. Na to dóńdźe k infekcijam w hladarnjach, fyzioterapijach a w gymnaziju“, rozłoži Annegret Schynol, nawodnica strowotniskeho zarjada a hamtska lěkarka wuwiće minjenych tydźenjow. „Smjertne pady jewjachu so předewšěm mjez wosobami, staršimi hač 60 lět – stajnje w zwisku z ćežkimi předschorjenjemi.“ Potrjecheni su pak tež sobudźěłaćerjo hladarnjow w starobje 35 do 59 lět.
Wosebity dypk za měšćanske dźěle
Wojerecy (AK/SN). Wjesnym předstejićelam Brětnje/Michałkow, Němcow, Hórnikec, Čorneho Chołmca a Ćiska přisteji we wobłuku posedźenjow Wojerowskeje měšćanskeje rady wotnětka prawidłowna hodźina za naprašowanja. Wotpowědne wudospołnjenje dnjowych dypkow je rada wčera z wjetšinu hłosow frakcijow CDU, Lěwicy, Aktiwne Wojerecy/Zeleni a SPD wobzamknyła. Jědnaće radźićelow AfD a Swobodnych wolerjow/Přichod města namjet wotpokaza, Dirk Nasdala (Swobodni wolerjo) so hłosa wzda.
„Zhromadne dźěło mjez městom a jeho dźělemi docpěje nowy schodźenk. Wobydlerjo měšćanskich dźělow dožiwja, zo rada jich naležnosće na wědomje a chutnje bjerje. To móže wuraz hišće lěpšeho wobydlerskeho wobdźělenja być“, we wobkrućenju schwaleneho namjeta rěka.
Sebastian Dömmel (AfD) kritizowaše: „Nažel njeběchmy do zdźěłanja namjeta zapřijeći. To zbudźa zaćišć, zo njeńdźe wo wjesnych předstejićelow, ale skerje wo to nam škodźeć. Mamy namjet za ryzy politisku bitwičku. Wjesni předstejićeljo móhli bjeze wšeho regularnu hodźinu naprašowanjow wužiwać, za to wosebity dnjowy dypk trěbny njeje.“
Krótkopowěsće (06.05.20)
Snadny přirost infekcijow
Budyšin/Zhorjelc. Ličba z koronawirusom natyknjenych w Budyskim wokrjesu je na 361 (+3) přiběrała. Z nich je 85 schorjenych, štyrjoch lěkuja w chorowni. 263 (+2) ludźi je so wustrowiło. Tuchwilu je 163 wosobow w karantenje. W Zhorjelskim wokrjesu je z dalšej wosobu dohromady 267 inficěrowanych. Z 85 schorjenych přebywa wosom w klinice. Dohromady 162 natyknjenych je tam mjeztym zaso strowych.
Festiwal dudakow wupadnje
Strakonice. Woblubowany Mjezynarodny festiwal dudakow w južnočěskich Strakonicach koronapandemije dla lětsa njebudźe. Wo wotprajenju za kónc awgusta planowaneho podawka je tamniša radnica informowała. Nastupajo termin přichodneho festiwala njejsu zamołwići dotal ničo zdźělili, najskerje pak festiwal hakle za dwě lěće wotměja.
Zaso prědku do busa zastupić
Kamjenski policajski rewěr z nowym nawodu
Kamjenc (SN/JaW). Wot pjatka, 1. meje, skutkuje policajski wyši rada Michael Kummer jako nawoda Kamjenskeho policajskeho rewěra. To zdźěli wčera nowinski rěčnik Zhorjelskeje policajskeje direkcije Kai Siebenäuger. Kummer naslěduje dotalnu nawodnicu Susann Benad-Uslaub. Wona je do Krajneho kriminalneho zarjada Sakska wotešła a nawjeduje tam wotnětka decernat we wobłuku za wuhódnoćenje statneho škita a policajskeho wotwobaranskeho centruma přećiwo terorizmej a ekstremizmej. Michael Kummer přewozmje zamołwitosć za cyłkownje 142 zastojnikow a zastojničow a dalšich přistajenych rewěra. Zhromadnje z nimi chce so 41lětny přichodnje w Lessingowym měsće a wokolinje wo wěstotu a porjad starać.
