Smjertnej woporaj njezboža

Njebjelčicy. Hrózbny wobraz skićeše so wuchowanskim mocam, wohnjowym wobornikam a policiji wčera připołdnju na statnej dróze S 94 blisko Njebjelčanskeje wotbóčki. Tam bě so krótko po 12.30 hodź. ćežke wobchadne njezbožo stało. Z dotal njeznateje přičiny zrazyštej transporter typa Fiat a wosobowe awto typa Audi frontalnje do so. Dospołnje skóncowany transporter wosta na třěše ležo, Audi suny so do přirowa. Wodźer transportera bě po wšěm zdaću nablaku mortwy. Šofera wosoboweho awta dyrbjachu z ćežkej techniku z jeho jězdźidła wuswobodźić. Tež wón pak pozdźišo w chorobnym awće wudycha. Nimo dweju helikopterow běchu dźesatki wobornikow a wuchowarjow zasadźene. Wobdźěłanja njezboža a rumowanja wobdźěleneju jězdźidłow dla bě statna dróha wjacore hodźiny dospołnje zawrjena. Za přičinami njezboža policija slědźi.

Kamjenc (SN/MWj). Sakske zjednoćenstwo kasowych lěkarjow je w Kamjenskej chorowni maltezow hotowostnu lěkarsku praksu wotewrěło a poskića tam wotnětka rěčne hodźiny. „Z wotewrjenjom praksy swój puć k integrowanemu nuzowemu zastaranju w Kamjenskej chorowni dale wjedźemy“, praji jeje jednaćel Sven Heise. Zaměr je centralne nuzowe přijimanje (ZNA) hač do lěta 2022, rěka w nowinskej zdźělence chorownje. W nim budźetej słužba kasowych lěkarjow a nuzowa słužba na jednym městnje zjednoćenej. Pacienta móža potom pak w nuzowej ambulancy pak w hotowostnej praksy zastarać.

Pandemija twarski wotběh při Bjerwałdskim jězoru přemjetała

Klětno (CK/SN). Po mustrowym domje loni su nětko prěni płuwacy dom w Klětnjanskim přistawje při Bjerwałdskim jězoru na wodu stajili. Štyri dalše na to hišće čakaja. 11. měrca běchu domy přiwjezli. Hižo před měsacami dowolene ćežkotransporty z pontonami pak dyrbjachu wjacore dny w Bitterfeldźe čakać. Dalšu jězbu nadměru šěrokich jězdźi­dłow bě policija zakazała. Přičina bě wot koronawirusa zawinjeny wjace hač 60 kilometrow dołhi rynk čakacych nakładnych awtow na awtodróze A 4 wot Zhorjelca hač za Budyšinom. Tohodla dyrbjachu cyłu akciju najprjedy raz wotprajić, informuje jednaćel firmy FHG floating house Ulf Sybel. Wot minjeneho tydźenja nětko prěni dom na wodźe steji.

Worklecy/Wotrow/Rakecy (aha/SN). W času tuchwilneje krizy koronawirusa dla je so towaršnostne žiwjenje tež na serbskich wjeskach dospołnje změniło. Najbóle drje boli rozsud krajneje direkcije w Drježdźanach, kotraž je aktualneho połoženja dla lětuše křižerske procesiony zakazała. Tak ma so natyknjenju ze žadławym wirusom dalokož móžno zadźěwać. Zo pak by zastaranje ze žiwidłami zaručene było, su sobudźěłaćerjo w kupnicach wulkim wužadanjam wustajeni. Kóždy na wsy bydlacy pak njemóže so tam podać. Tohodla su wosebje nětko do jutrow rěznicy a pjekarjo ze swojimi předawanskimi wozami wšudźe jara witani.

Mějićel předewzaća za mjasowe a kołbasowe twory Silvio Riedel budźe swoje wudźěłki na tydźenskich wikach, ale tež srjedu wot 7 hodź. a jutrownu sobotu hižo wot 5.30 hodź. we Worklecach a zeleny štwórtk wot 7 hodź. w Rakecach poskićeć. Wón tučasnje wobkedźbuje, zo ludźo jara wjele kupuja, a wopodstatnja to ze słowami, zo „njewěstosć mnohich kupcow znjeměrnja“. Přiwšěm Silvio Riedel ludźi za jich disciplinu chwali, zo před wozom čakajo trěbny wotstawk dodźerža.