Maja wobchadny koncept adwenta
Drježdźany (dpa/SN). 2 300 přidatnych městnow na parkowanišćach a specielna linija tramwajki budu nadróžny wobchad w adwenće w Drježdźanach po sypnjenju Carolineho mosta sobu zmištrować. Tole je měšćanosta za wobchad sakskeje stolicy Stephan Kühn (Zeleni) wčera při předstajenju noweho wobchadneho koncepta připowědźił. Z Carolinym mostom je centralna a wukonita wobchadna wóska wotpadnyła. Tuž dyrbjachu w měsće za nowymi móžnosćemi pytać. W nadróžnym bliskowobchadźe zwyši so w dohodownym času ličba sobujěducych wo 120 000 na cyłkownje 730 000 ludźi wob dźeń. Ličba wopytowarjow, kotřiž z awtom přijědu, wo 20 procentow rozrosće.
Ludźo njech po móžnosći zjawny bliskowobchad wužiwaja, to wobchadny koncept praji. Přidatnje wutworjenych 2 300 parkowanišćow je zwjetša darmotnych. 1 200 městnow steji njedaloko wikow k dispoziciji. Wot tam jědźe tramwajka. Busy smědźa pod Marijinym mostom stać. Hodowny cirkus je so lětsa na druhe městno přepołožił. Tuž nastanje tež tam přidatnje 130 městnow za parkowanje busow.
To a tamne (13.11.24)
Silwester praskotaki zakazać? Wo tym wuradźuje hižo nětko Berlinska policija. Wuchadźejo z nazhonjenjow minjeneho lěta chcedźa tež lětsa na łoskoćiwych městnach zwjazkoweje stolicy praskanju zadźěwać. Loni běchu wjacore tajke pasma zarjadowali. Za to běchu wohnjostroje na druhich blakach ćim hórše. Policija je 400 ludźi nachwilnje zajała, 54 policistow so zrani. Wosebje strašne je, hdyž wužiwaja ludźi trašawki a pistole.
Wo spektakularnym rubjenju wjace hač wosom milionow eurow pjenjez ze składa transportneho předewzaća wuradźuja tuchwilu před Bremenskim krajnym sudnistwom. Wobskoržena je 32lětna žona. Wona bě w meji 2021 pjenjezy w kontejneru na koleskach schowała a na dwór firma dowjezła. Tam čakachu kumpanojo w awće. Na to ćekny žona do Turkowskeje. Jej hrozy dźesać lět jastwa.
Ćěkancy smědźa do Italskeje
Rom (dpa/SN). Prawicarska ministerska prezidentka Italskeje Georgia Meloni je ze swojimi planami, ćěkancow zwonka EU zaměstnić, sudnisku poražku poćerpjeła. Sudnistwo w Romje je wukazało, migrantow, kotrychž běchu do lěhwa ćěkancow w Albanskej dowjezli, pušćić. Mužojo z Egyptowskeje a Bangladesha smědźa přichodne dny do Italskeje přińć. Runočasnje je so sudnistwo w Romje na Mjezynarodne sudnistwo wobroćiło.
Atomowe zawody nadpadnyć?
Tel Aviv (dpa/SN). Nowy israelski zakitowanski minister Israel Katz je so za to wuprajił, atomowe připrawy Irana nadběhować. „Iranowe atomowe zawody su njestabilne. Mamy tuž składnosć, swój najwažniši zaměr docpěć – eksistencne wohroženje Israela wotstronić“, Katz w interneće piše. Tole je wón tež na prěnim zetkanju z generalnym stabom rjekł. Israel bě při swojim nadpadźe w oktobru radarowe a raketowe stacije Irana zničił. Iranej wumjetuja, zo twari atomowe brónje za nadpad na Israel.
W Amsterdamje cychnowali
Čłonojo libanonskeho Čerwjeneho křiža pytaja w rozwalinach we wsy ...
Rubio nowy wonkowny minister USA
Washington (dpa/SN). Za swoje njepowalne nastajenje napřećo Chinje a Iranej znaty senator Marco Rubio ma so po informacijach medijow z přichodnym wonkownym ministrom USA stać. Přichodny prezident Donald Trump je so pječa za swojeho republikanskeho kolegu rozsudźił. Přiwšěm njeje wěste, hač Trump swoje měnjenje tola hišće njezměni. Rubio je wot lěta 2019 w senaće USA a bě 2016 podarmo spytał, sam za republikanow kandidować. Tehdy bě wón w předwólbach Donaldej Trumpej podležał.
Jedyn z móžnych kandidatow za zastojnstwo wonkowneho ministra bě tež Richard Grenell, bywši wulkopósłanc USA w Němskej.
Ukraina pola Kurska wuspěšna
Bohate kraje měli za klimu płaćić
Baku (dpa/SN). Na zahajenju swětoweje klimoweje konferency w Azerbaidźanje su bohate kraje kaž Němsku z pjenježnymi žadanjemi w astronomiskich rozměrach konfrontowali. Znajmjeńša 1 000 miliardow dolarow wob lěto wočakuje 45 najchudšich wuwićowych krajow wot industrijnych krajow, zo móhli dalšemu woćoplenju zemje zadźěwać a sćěhi klimoweje změny zmištrować. Němska statna sekretarka za klimu Jennifer Morgan w Baku rjekny, zo je sej Němska swojeje zamołwitosće za klimu zasadnje wědoma. Płaćić pak měli wšitke staty, „kotrež móža sej to dowolić“. Z wida EU na přikład su kraje kaž China abo bohate staty arabskeho zaliwa zamołwite, klimowe pomocy financować. Po lětdźesatki trajacej logice EU pak tute kraje přeco hišće jako wuwićowe kraje zastopnjuja, kotrež su pomocy potrěbne.
Nimale 200 krajow w něhdyšej sowjetskej republice wuradźuje, kak móhli klimowu krizu a jeje sćěhi wobmjezować. Po wólbnym dobyću Donalda Trumpa so boja, zo so USA dale njewobdźěla.
Nowowólby sejma 23. februara
Nawodnistwje SPD a CDU/CSU so dojednałoj – Zeleni přezjedni
Berlin (dpa/SN). W zwadźe wo termin móžnych dočasnych wólbow zwjazkoweho sejma su so zastupnicy SPD a CDU/CSU dźensa na 23. februar 2025 dojednali. Tole rozprawja powěsćernja dpa. Termin je tež ze Zelenymi wothłosowany. Zwjazkowy kancler Olaf Scholz (SPD) chce 16. decembra w zwjazkowym sejmje prašenje dowěry stajić. Wo wólbnym terminje doskónčnje rozsudźić ma zwjazkowy prezident Frank-Walter-Steinmeier. Minjene dny běchu so wo termin dočasnych wólbow zwjazkoweho sejma dosć raznje wadźili.
Frakciski předsyda CDU/CSU Friedrich Merz (CDU) chcyše po zwrěšćenju amploweje koalicije SPD, Zelenych a FDP wólby w februaru přewjesć. Na posedźenju frakciskeho předsydstwo mjenowaše wón wčera terminaj 16. abo 23. februar jako móžny termin, powěsćernja dpa rozprawješe. Zwjazkowy kancler Olaf Scholz (SPD) chce jutře w zwjazkowym sejmje knježerstwowu deklaraciju wozjewić. Wón chcyše poprawom hakle 15. januara w zwjazkowym sejmje prašenje dowěry stajić a nowowólby kónc měra přewjesć dać. Tole běchu raznje kritizowali.
