Woteběracy zajim za Black Friday
Berlin/Köln (dpa/SN). Zajim ludźi za rabatne akciske dny kaž Black Friday kupowanskich portalow kaž Temu a Shein dla widźomnje woteběra. Wjace hač 40 procentow ludźi rabatowe akcije po zwěsćenju instituta za přirunowanje płaćiznow Idealo hižo njetrjeba. Wšako wabja poskićowarjo z Aziskeje cyłe lěto z tajkimi hrabnjenčkami. Reprezentatiwne naprašowanje mjez 2 000 ludźimi bě slědźenski institut Kantar w septembru přewjedł. Podobny bě wuslědk naprašowanja Kölnskeho wikowanskeho slědźenskeho instituta IFH. Kóždy štwórty mjez zajimcami za Black Friday měni, zo nochce so lětsa na akciji wobdźělić – runje aziskich portalow dla.
Na dnju Black Friday, kotryž wotměje so zajutřišim, pjatk, poskićuje tójšto wikowarjow twory wo wjele tuńšo. Minjene lěta bě so zadomiło, zo hižo dny a tydźenje do toho z wurjadnymi poskitkami ludźi přiwabja. Zajim ludźi za tajke rabatowe akcije je w Němskej wulki.
Nimo adwentnych sobotow su dny wokoło Black Friday wobchodnikam w Němskej sobu najwažniše cyłeho lěta.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianca Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (27.11.24)
Paduši na adwentnych wikach móhli ludźom wjeselo dohodowneje zabawy skazyć. Před tym warnuje sakske nutřkowne ministerstwo. Runje tołkańcy na wjetšich zarjadowanjach su paducham witana składnosć za njeskutki. Policija radźi, zo wopytowarjo wikow swoje pjenjezy a kreditne karty stajnje w zamknjenych nutřkownych faškach kabatow chowaja.
Na wšěch 400 000 ilegalnych e-cigaretow, 600 kilogramow tobaka a 200 000 eurow su policisća při raciji přećiwo cwólbam w Berlinje sćazali. Zastojnicy wobkedźbuja přiběracu aktiwitu kriminelnych wikowarjow, kotřiž měrja so wosebje na njepołnolětnych kurjerjow e-cigaretow.
Stawiznarka z ćěłom a dušu była
Zrudna powěsć je k nam dóšła, zo je něhdyša županka našeje župy „Michał Hórnik“ Trudla Kuringowa 84lětna na prawdu Božu wotešła. Narodźiła bě so 28. januara 1940 do serbskeje swójby w Kanecach. Wuchodźiwši šulu we Wotrowje a susodnych Pančicach kaž tež po wopyće wyšeje šule w Budyšinje nawukny powołanje tekstilneje chemikarki. Přemóžaca pak bě jeje žadosć, stać so z wučerku. Tuž nawróći so po dwěmaj lětomaj z Limbacha-Oberfrohny do Łužicy, zo by na Budyskim Pedagogiskim instituće serbšćinu a němčinu studowała. Wot 1968 do 1991 běše wona wučerka w Šuli Ćišinskeho w Pančicach-Kukowje. Mjeztym zabsolwowa dalokostudij chemije. Dalši puć powołanskeho žiwjenja wjedźeše ju jako wučerku na Budyski Serbski gymnazij hač do lěta 2000.
Zmandźeliwši so z Janom Pohončom, narodźi so mandźelskimaj w přichodnych lětach pjeć dźěći. Ćežke horjo je swójbu trjechiło, jako mandźelski a nan 1991 zemrě.
Trudla Kuringowa bě hižo z časa swojeje młodosće aktiwna čłonka Domowiny. Nimale 50 lět skutkowaše w předsydstwje Domowinskeje skupiny w Kanecach, wjacore lěta z toho jako předsydka.
Znowa nadźija na přiměr
Tel Aviv (dpa/SN). Po dlěje hač lěto trajacej wójnje w Libanonje maja pokazki na bližacy so přiměr mjez Israelom a pro iranskej milicu Hisbollah. Israelski ministerski prezident Benjamin Netanjahu je za dźensa wječor wěstotny kabinet zwołał, zo by 60 dnjow trajacy přiměr z Hisbolluh potwjerdźił. To zdźěli rěčnik knježerstwa israelskim nowinarjam. Powěsćernje rozprawjeja, zo chce kabinet dojednanju, kotrež běchu USA sposrědkowali, přihłosować.
Pytaja za přičinami zražki
Vilnius (dpa/SN). Po zražce nakładneho lětadła w Litawskej pytaja dale za přičinami njezboža. Za konkretne wotmołwy je po informacijach zamołwitych hišće přezahe. Dotal nimaja žanych pokiwow na sabotažu abo teroristiski nadpad na mašinu předewzaća Swift-Air, kotraž bě w nadawku DHL po puću z Lipska do Vilniusa. Zwjazkowy kancler Olaf Scholz (SPD) wčera rjekny, zo je to móžny teroristiski nadpad Ruskeje.
Tež Němcy mjez zhubjenymi
Tradicionalny 45 metrow wysoki štom Dortmundskich dohodownych wikow ...
Planuja koncept škitnych bunkrow
Trump chłosta susodow
Wuradźuja wo wupućach z krizy
Berlin (dpa/SN). Hospodarski minister Robert Habeck (Zeleni) je dźensa na industrijnej konferency ze zastupnikami hospodarskich zwjazkow a dźěłarnistwow wo wupućach z krizy wuradźował. Při tym wuradźowachu wo tym, kak móhła Němska kmanosć mjezynarodneho wubědźowanja zesylnić. Hospodarstwo žada sej spěšne rozsudy politiki a wosebje skutkownu pomoc hladajo na płaćizny miliny.
Habeck bě so runje tak kaž zwjazkowy kancler Olaf Scholz (SPD) za to wuprajił, ze statnymi srědkami milinu potuńšić. Tuchwilne knježerstwo SPD a Zelenych nima po zwrěšćenju amploweje koalicije w Němskej wjace žanu wjetšinu.
Industrijna konferenca wotměwa so we wobłuku zwjazka „Přichod na dobro industrije“. Temy rozmołwow su mjez druhim sćěhi dobyća Donalda Trumpa w prezidentskich wólbach w USA. Trump bě wyše cła na importy europskich tworow do USA připowědźił. Olaf Scholz bě hakle srjedź nowembra w kanclerskim zarjedźe industrijny wjeršk přewjedł – tola bjez Habecka.
Hižo žadyn regionalny konflikt
Zakitowanski minister Boris Pistorius chcył Ukrainu dale podpěrować
Berlin/Brüssel (dpa/SN). Po najnowšej eskalaciji we wójnje mjez Ruskej a Ukrainu chcedźa Němska a druhe čłonske kraje NATO produkciju brónjow w Ukrainje dale zesylnić. Financować chcedźa tole najprjedy raz z danjemi blokowaneho ruskeho zamóženja. To je zakitowanski minister Boris Pistorius (SPD) po zetkanju ze swojimi kolegami z Francoskeje, Wulkeje Britaniskeje, Pólskeje a Italskeje připowědźił. Ukraina běše dźensa tež hłowna tema wuradźowanjow wurjadneho posedźenja rady NATO a Ukrainy w Brüsselu kaž tež na zetkanju wonkownych ministrow sydom demokratiskich industrijnych krajow (G7) w Italskej.
Mjezsobne nadpady trajachu runočasnje dale. Ruska je minjenu nóc ukrainsku stolicu Kijew znowa z trutami nadběhowała, měšćanosta Witalij Kličko zdźěli. Do toho bě ukrainske wójsko ruske wojerske lětanišćo njedaloko Kurska z daloko sahacymi ameriskimi raketami typa ATACMS nadběhowało.
