Hač je turistiske zwičnjenje kultury, wosebje kultury mjeńšiny, za jeje dalšu eksistencu spomóžne abo nic, wo tym je rozdźělnych měnjenjow – wšako hrozy strach, zo sprostnu nałožki a tradicije k hołemu marketingowemu eventej bjez woprawdźiteho zakótwjenja we wšědnym žiwjenju domoródnych, kaž to w Błótach dožiwjamy. Gmejny Slepo, Trjebin a Dźěwin chcedźa z projektom „SerbIT“ po nowym kulturno-turistiskim puću kročić. Mjez druhim nastanu w tutym zwisku štyri projektne městna za fachowcow, kotrychž nadawk je, wobstejace kulturne a rěčne poskitki dale wuwić, je nowym wužadanjam a zwučenosćam našeho časa přiměrić a na tute wašnje zajim za serbsku kulturu w šěršim publikumje zbudźić. Pod hesłom „SorbIT“ tute městna na stronje dźěłoweje agentury hižo wupisane namakaš. W kwalifikaciskim profilu je mjez druhim podate: Znajomosće serbskeje rěče a kultury su wužitne. To widźu hinak: Wone su trěbne! Potajkim Serbja, požadajće so! Milan Pawlik

Choćebuska adwentne wiki wopytowarjow kóždy wječor z tysac hwězdami wob­kuzłuja: Wšědnje wiki mjez Starymi wikami, Gródkowskej a měšćanskej promenadu k kupowanju a woptawanju přeprošuja. Wosebita atrakcija je tež lětsa zaso 32 metrow wysoke hoberske koło na Starych wikach. Adwentne wiki su hač do 23. decembra wšědnje wot 11 do 19 hodź. wotewrjene. Mjeztym zo wostanu wiki 24. decembra zawrjene, wikowarjo 25. a 26. decembra swoje předawanišća mjez 12 a 18 hodź. hišće raz wotewru. Po dobrych nazhonjenjach minjenych lět chcedźa wiki tež 27. a 28. decembra popołdnju hosćom hišće raz spřistupnić. Foto: Michael Helbig

Chrobły sobudźěłaćer tankownje je w Berlinje-Marienfelde rubježny nadpad wotwobarał. Po dotalnych dopóznaćach staj zakuklenaj mužej do tankownje přišłoj a sej z pistolu a popjerjowym sprayjom w ruce wot 29lětneho pjenjezy ­ža­dałoj. Přistajeny pak so spjećowaše a wšelake wěcy do rubježnikow mjetaše, doniž su wobaj njezminyštaj. Do toho pryska­štaj hišće spray do tankownje.

Pospyt wudrěwanja swójby bywšeho jězdźerja Formule 1 Michaela Schumachera wot dźensnišeho na Wuppertalskim sudnistwje wobjednawaja. Wobskorženi su třo mužojo. Hłownje wobskorženy, kiž sedźi w přepytowanskej jatbje, bě sej wot swójby 15 milionow eurow žadał a hrozył, zo priwatne fota swójby w interneće wozjewi. 53lětny bě jako sobudźěłaćer wěstotneje firmy pola Schumacherec ­dźěłał a tam tajnje fota zhotowił.

Berlin (dpa/SN). AfD je z Alice Weidel prěni króć kanclersku kandidatku k wólbam zwjazkoweho sejma nastajiła. Zwjazkowe předsydstwo AfD a krajni předsydźa su wčera w Berlinje jednohłósnje wobzamknyli, 45lětnu na přichodnym zjězdźe strony w januaru w Riesy k wólbam namjetować. Weidel rěčeše wo „wažnym dnju za stronu a za Němsku“, pokazawši na dobre wuslědki woprašowanjow, z kotrychž strona nadawk ke knježenju wotwodźuje.

Woclowy wjeršk pola Scholza

Berlin (dpa/SN). Zwjazkowy kancler Olaf Scholz (SPD) je so dźensa z wodźacymi zastupnikami wocloweje branše zetkał, zo by z nimi wo wupućach z mizery diskutował. Tež zawodne rady a dźěłarnistwa su na wjeršk do kanclerskeho zarjada prošeni. Zawody žadaja sej zniženje płaćiznow miliny, spěchowanje inwesticijow a škit před tunimi importami. ­Najwjetši woclowy koncern Němskeje Thyssenkrupp je připowědźił, zo chce 11 000 dźěłowych městnow šmórnyć.

Trump: Wyše płaćizny móžne