Berlin (dpa/SN). Ličba jara starych a hladanja potrěbnych ludźi móhła w Němskeje přichodne 25 do 30 lět raznje wo wjacore miliony přiběrać. Tole wuchadźa z mjeztym dźewjateje starobneje rozprawy zwjazkoweho knježerstwa, wo kotrejž je kabinet dźensa dopołdnja wuradźował.

Po tym ličba ludźi nad 80 lětami wot dźensa šěsć na wosom do dźesać milionow w lěće 2025 rozrosće. Dokelž je podźěl hladanja potrěbnych w tutej starobnej skupinje wyši, dyrbi so z tym ličić, zo budźe ćišć na system hladanja wo wjele wjetši hač dźensa.

Rozprawa přepytuje na 250 stronach tež žiwjenske wobstejnosće staršich ludźi, mjez druhim dochody, zamóženje, móžnu hrožacu chudobu, bydlensku situaciju, strowotniske zastaranje a towaršnostne zakorjenjenje. Rozprawa zwěsća, zo je so pjenježne połoženje rentnarjow pozitiwnje wuwiło. Najebać to zastopnjuja nimale 20 procentow ludźi nad 65 lětami jako wot chudoby ­wohroženych. Podźěl tuteje skupiny je minjene lěta zaso rozrostł, po tym zo bě mjez 2000 a 2010 widźomnje woteběrał.

Berlin (dpa/SN). Ludźo w Němskej njejsu loni hižo tak často do kina šli kaž w lěće 2023. Cyłkownje su filmowe dźiwadła Němskeje lěta 2024 po dotalnych informacijach 80,9 milionow zastupnych lisćikow předali, rozprawja hłowny zwjazk kinow Němskeje. Přirunujo z lětom 2023 je ličba wopytowarjow kinow wo 7,3 procenty woteběrała.

Podźěl němskich filmow wučinja při tym po ličbje předatych lisćikow dobre 19 procentow a wostanje na niwowje lěta 2023. Hladajo na stawk filmowcow w Hollywoodźe w lěću 2023, kiž bě dypkownu produkciju wjacorych filmow haćił a na powšitkownje napjate hospodarske połoženje, wostanje kinowe lěto 2024 cył­kownje widźane stabilne, zwjazk zdźěla. Wosebje wuspěšny bě hodowny čas z dwěmaj milionomaj wopytowarjow.

„Kinowe lěto 2024 je pokazało, zo wostanje branša tež w ćežkich časach spušćomna a zo móže so z přeswědčacymi poskitkami přesadźić“, rjekny nawodnica předsydstwa zwjazka Christine Berg. Filmowe dźiwadła pak trjebaja planowansku wěstotu a politisku podpěru. Za dalewobstaće su inwesticije rozsudne.

Čilanje při nadróžnej latarni měješe za psa w Schwarzenbachu nad Solawu smjertny wukónc. Psyk poćerpi dyr miliny. Policija tuka na techniski defekt latarnje, kotryž je krótkospjeće zawinił. Wěstoty dla su w měsće 400 lampow samsneho typa najprjedy raz hasnyli. Po techniskim přepruwowanju chcedźa je zaso zapinyć. Psej wšak tole hižo njepomha.

Nimale dwaj tydźenjej je 23lěny student po lěsach a horach w juhozapadźe Awstralskeje błudźił. Pućowarjo su jeho připadnje zetkali, po tym zo bě 300 pomocnikow wjacore dny podarmo za nim pytało. Žiwił je so student z wody rěčkow a wot šokolody, kotruž je we wopušćenej chaće namakał. Narodny park Kosciuszko w awstralskim staće New South Wales je 6 700 kwadratnych kilometrow wulki a přiwabja ze swojoraznej klimu a horami pućowarjow a sněhakowarjow.