Teheran (dpa/SN). W Iranje je wčera k dalšim protestam přećiwo knježerstwu a přećiwo duchownym nawodam dóšło. W socialnych medijach pokazachu aktiwisća a žurnalisća minjenu nóc nahrawanja tajkich protestnych zarjadowanjow. W jednym z filmow wołachu demonstranća parole přećiwo najwyšemu duchownemu nawodźe kraja Ajatollih Ali Chameneijej. Po informacijach aktiwistow je policija we wjacorych městach demonstrantow zajała.

Samsny čas su po wšěm kraju tež přiwisnicy knježerstwa na dróhu šli, zasudźejo USA, Israel a Sawdi-Arabsku. Tele kraje běchu po jich měnjenju njeměry naškarali.

Mjeztym su USA swoje žadanje za hnydomnym posedźenjom Bjezstrašnost­neje rady UNO potwjerdźili. Wulkopósłanča USA pola Zjednoćenych narodow Nikki Haley sej žadaše, zo dyrbja wone hladajo na „zmužitych demonstrantow“ hłós na jich dobro pozběhnyć.

Zapósłancy zwjazkoweho sejma namołwjeni na zajimy ludźi dźiwać

Drježdźany/Budyšin (SN/BŠe). 111 000 přistajenych Budyskeho wokrjesa ma wulke wočakowanja na nowe knježerstwo w Berlinje. Wot koaliciskich partnerow dźě wotwisuje, kelko mzdy přistajeni přichodnje změja. Dale ma so rozrisać, što přichodnje ze zasłuženej rentu budźe. Hladajo na móžnu nowu wulku koaliciju CDU/CSU a SPD žada sej dźěłarnistwo za zežiwjenje­ a hosćency (NGG) nětko dźěłowu a socialnu agendu a namołwja zapósłancow zwjazkoweho sejma z domizny, zo měli na zajimy ludźi dźiwać. Wosebje dźěłowy čas je dźěłarnistwu wažna naležnosć. 32 400 ludźi Budy­skeho wokrjesa tuchwilu dźělnje dźěła, a to najebać dobru konjukturu. Jich je 22 procentow wjac hač před pjeć lětami. Něhdźe 83 procentow dźělneho dźěła wukonjeja žony. Jednaćel NGG w re­gionje Drježdźany-Kamjenica Volkmar Heinrich ma tuž nadawk za nowe zwjazkowe knježerstwo: Přistajeni dyrbjeli prawo na połne dźěłowe městno měć.

Jako słyšach tele dny powěsć, zo USA demonstrantow w Iranje pohonjeja, w boju přećiwo knježacemu systemej njepopušćić a krajej skónčnje demokratiju přinjesć, dyrbjach na podawki kónc lěta 2013 na Ukrainje myslić. Tehdy bě samo senator USA John McCain do Kijewa přijěł, zo by demonstrantow na tamnišim Majdanje namołwjał dale wojować, doniž njeje demokratija wuwojowana. Mjeztym su USA přiznali, zo běchu „rewoluciju“ na Ukrainje sobu organizowali a financowali, zo móhli Ukrainu zapadej přizamknyć a swój wliw dale na wuchod rozšěrić, zo bychu Rusku zesłabili. Wumjetowanje iranskeho prezidenta Ruhanija, zo su protesty w kraju wot wukraja organizowane, nimam tuž ani za njewoprawnjene. Powalenje iranskeho statneho porjada by USA jara lube było: Tak bychu stareho njepřećela wot­byli a móhli skónčnje za iranskim zemskim wolijom hrabać. Marko Wjeńka

Njesćerpny pasažěr w lětadle Ryanair je na lětanišću juhošpaniskeho města Malaga swojowólnje nuzowe durje wočinił a na křidło mašiny zalězł: 57lětny Polak bě prawdźepodobnje paniku dóstał, po tym zo njesmědźachu ludźo poł hodźiny po přizemjenju přeco hišće z mašiny. Personal móžeše muža skónčnje pře­rěčeć, zo so zaso do lětadła wróći. Poli­cija pak Polaka na to nachwilnje sobu wza.

W kurioznej zwadźe wokoło kusateho wosoła a droheho sportoweho awta rěka wusud: Wobsedźer skoćeća dyrbi mějićelej sportoweho awta škodu 5 800 eurow zarunać, po tym zo bě wosoł před lětomaj w hessenskim Schli­tzu do oranžoweho jězdźidła kusnył a lak wobškodźił. Na to su so wobdźěleni před Gießenskim krajnym sudnistwom dojednali. Kaž policija tehdy rozprawješe, bě drje wosoł awto za wulku­ morchej měł.