Program spěšnje wučerpany był
Berlin (dpa/SN). Kónc spěchowanskeho programa bórze po starće: Po wulkim nawalu na nowy spěchowanski program za nabiwanje elektroawtow ze solarnej milinu su srědki rozdawane. „Cyłkownje 33 000 próstwam smy přizwolili, najebać techniske problemy“, zdźěla statna spěchowanska banka KfW minjenu nóc. Wot zwjazkoweho ministerstwa za digitalne a wobchad přewostajene etatowe srědki 300 milionow eurow za lěto 2023 su z tym wučerpane. Ručež su dalše pjenjezy k dispoziciji, chcyła banka zjawnosć wo tym informować.
Hižo wčera, prěni dźeń programa, běchu hač do 18 hodź. něhdźe 23 000 próstwam z cyłkownym wobjimom nimale 200 milionow eurow přizwolili, banka zdźěla. Wulki nawal bě sčasami portal banki přežadał a techniske problemy zawinował. Za program mějachu cyłkownje 500 milionow eurow k dispoziciji. Z nim spěchuja nakup a zatwar stacije za nabiwanje elektroawta z pomocu fotowoltaikoweje připrawy a solarneje baterije. Stat přewostaja najwjace 10 200 eurow wobsedźerjam twarjenjow ze swójskim abo hižo skazanym elektroawtom.
To a tamne (27.09.23)
Tójšto nowych skazankow wunjesł je wopyt britiskeho krala Charlesa III. młodej francoskej winicarce. „Kak mamy tole zdokonjeć“, rjekny Noèmie Tanneau francoskim rozhłosownikam. Minjeny pjatk bě Charles na swojim wopyće w Bordeauxskej kónčinje na namjet zwjazka winicarjow młodu winicarku wopytał. Po tym zo bě telewizija wo tym rozprawjała, dožiwi winicarka njewočakowany nawal skazankow jeje wina.
Kuna w lěkarskej praksy je w Krefeldźe zasadźenje wohnjoweje wobory zawinowała. Sobudźěłaćerjo praksy běchu so na smjerć stróžili, jako zwěrjo wuhladachu a ćeknychu do susodneje stwy. Jako wohnjowa wobora dojědźe, bě zwěrjo preč. Potom pak „w röntgenowym nastroju klepotaše“. Wohnjowi wobornicy móžachu mordarja z kijom do transportneje tyzy tyknyć a pozdźišo w lěsu pušćić.
Pašowarjow Syričanow zajeli
Frankfurt n. M. (dpa/SN). Při raciji w pjeć zwjazkowych krajach je policija dźensa rano wjacorych Syričanow našła, kotřiž běchu pašowarjo ilegalnje do Němskeje přiwjezli. Při tym su pjec wukazow zajeća přesadźili. Wšitcy pjećo su Syričenjo, rěčnik policije zdźěli. Wjace hač 350 zastojnikow bě na akciji w sydom komunach zasadźenych. Podhladnym wumjetuja, zo su swojich syriskich krajanow ilegalnje do Němskeje wozyli a za to wot kóždeho mjez 3 000 a 7 000 eurow brali.
Pistorius na zepěranišću
Ämari (dpa/SN). Zakitowanski minister Boris Pistorius je dźensa estiske wojerske lětarske zepěranišćo Ämari wopytał. Politikar SPD je dopołdnja na zepěranišćo dojěł, kotrež tež Zwjazkowa wobora za misiju NATO k stražowanju powětroweho ruma nad baltiskimi statami wužiwa. W běhu dnja chcyše so Pistorius dale do stolicy Tallinna podać. Tam wuradźuje hač do jutřišeho kóždolětna baltiska wěstotna konferenca wo aktualnym połoženju.
Mortwi při rozbuchnjenju
Wjace kontrolow při mjezy
Kredit z USA za pólske wójsko
Washington (dpa/SN). K modernizowanju pólskeho wójska su so USA a Pólska na nowy miliardowy kredit dojednali. Wonkowne ministerstwo USA zdźěla, zo dóstanje Pólska direktny kredit dweju miliardow dolarow (1,89 miliardow eurow). Tajki direktny kredit je wosebity instrument, kiž přizwola USA jenož swojim najwažnišim wěstotnym partneram. „Pólska je swěrny zwjazkar zjednoćenych statow. Wěstota Pólskeje ma za kolektiwne zakitowanje wuchodneje flanki NATO rozsudny wuznam“, k tomu rěkaše.
Knježerstwo USA přewostaja za nastawace kóšty w zwisku z kreditom 60 milionow dolarow. Tole k tomu přinošuje, modernizowanje pólskeho zakitowanja pospěšić, z tym zo z pjenjezami brónje a dalši wojerski material w USA kupuja.
Pólska hladajo na wójnu w susodnej Ukrainje a wohroženja ze stron Ruskeje dla z wotmachom na tym dźěła, swoje wójsko masiwnje wutwarić. Lětsa chce čłonski stat NATO štyri procenty swojeho hospodarskeho wukona za zakitowanje wudać, zaměr NATO stej dwaj procentaj.
„Dołho wjace njewudźeržimy“
Zwjazk wokrjesow warnuje před přežadanjom komunow ćěkancow dla
Zły Komorow (dpa/SN). Wokrjesy Braniborskeje maja mjezu poćežowanja při zaměstnjenju ćěkancow za docpětu a žadaja sej raznišu azylowu politiku. „Jeli so ničo njezměni, njejsmy bórze wjace kmani, ćěkancow přiwzać“, rjekny předsyda zwjazka wokrjesow, krajny rada Siegurd Heinze powěsćerni dpa. „Potom twarimy zaso stanowe lěhwa a kontejnerowe sydlišća abo wužiwamy sportowe hale.“ Wón rěči wo jara napjatym połoženju a wo woteběracej akceptancy mjez wobydlerjemi. „Dołho to wjace njewudźeržimy.“
Bjezstronski krajny rada wokrjesa Hornja Sprjewja-Łužica nima jenož zaměstnjenje za wulki problem. „Naše najwjetše problemy su nimo toho kapacity w dźěćacych přebywanišćach, šulach a lěkarske zastaranje“, Heinze rjekny. Nic naposledk je dale a wjace njepřewodźanych dźěći a młodostnych mjez ćěkancami. Městna za nich su tak derje kaž wučerpane. „Ze stron Zwjazka so za tutón problem scyła njezajimuja.“
Za přezjednosć w kraju spěwać
Tekstar znatych spěwow zemrěł
Berlin (dpa/SN). Je wažnych a wulkotnych wuměłcow, kotřiž su mjez ludźimi jenož ze swojimi twórbami znaći, nic pak z mjenom. Zemrěł je tež wot mnohich Serbow jara waženy spěwny tekstar Dieter Schneider. Wón zemrě 86lětny na pózdnje sćěhi polio-schorjenja w Berlinskej chorowni. W běhu swojeje karjery je wjace hač 3 000 spěwnych tekstow spisał, mjez nimi tak wuspěšne spěwy kaž „Looky, Looky“ (za Franka Schöbela), „Spielverderber“ (za Inku Bause), „Aber Doktor“ (za Karela Svobodu a Karela Gotta), „Annamaria“ (za Čerwjene gitary) a za bołharsku wuměłču Lili Ivanovu „Bunte Wagen“. Mjez twórcami šlagrow je z wašnjom, pod pseudonymami pisać. Tak pisaše Dieter Schneider pod mjenami Joachim Hertz, Fred Kerstien, Thomas Kluth, Hein Sollinger, Michael Reißland a Fürchtegott Unverzagt.
Dieter Schneider bě mjez druhim redaktor Telewizije NDR za zabawne wusyłanje „Kotoł pisaneho“. Wjace hač šěsćdźesat lět dołho je so ze zabawnej hudźbu w telewiziji a radiju zaběrał. Zasadźowaše so za wuměłski dorost a bě přeco zajimowany, što nastawa noweho.
To a tamne (26.09.23)
Hejateho kołpja přeswědčił je fachowc za kołpje Olaf Nieß w Hamburgu a je za to wjele připóznaća žnjał. Zwěrjo bě na dwórnišću měšćanskeje podzemskeje železnicy U 1 pod wagon zalězło a so spjećowaše, so zaso zminyć. Na to dyrbjachu železnisku čaru zawrěć a busy a taksije zasadźić. Přiwołanemu fachowcej so skónčnje poradźi, „kołpja přeswědčić“. Železnicarjo dźakuja so tež zwěrjeću za kooperaciju na dobro jěducych.
Rjedźenje Braniborskich wrotow po nadpadźe z barbu ze stron škitarjow klimy drje dołho traje a budźe dróše hač myslene. Na wjacorych městnach, kotrež běchu aktiwisća tydźenja z barbu popryskali, su minjene dny wšelake techniki rjedźenja wuspytali. Wuslědki chcychu sej fachowcy dźensa wobhladać. Najwjetši problem je struktura pěskowca, do kotrehož je so barba zadobyła. Horca woda abo wysoki ćišć wody móhli škody načinić. Dotal planowane kóšty 35 000 eurow za rjedźenje drje njedosahaja.
Přećiwo wumjezowanju
Köln (B/SN) Katolski Augsburgski biskop Bertram Meier je na swjatočnosći składnostnje 50lětneho wobstaća Zwjazka islamistiskich kulturnych centrumow (VIKZ) wumjezowanje muslimow kritizował. „Štóž ludźi po pochadźe a wěrywuznaću ponižuje, tón zrani čłowjeske prawo.“ Zwjazkowy prezident Frank-Walter Steinmeier měni: „Dźensa słuša mnohotnosć islama z wjace hač pjeć milionami muslimow w 300 wosadach k našemu krajej.“
Wopory namocy
Mnichow (B/SN). Při pospyće zawlečenja wosadneho fararja w nigeriskej wsy Fadan Kamantan su jeho dom zapalili. 25lětny student měšnistwa tam w płomjenjach zahiny. Hačrunjež je njedaloko farskeho domu wojerska jednotka zaměstnjena, njeje nichtó pomhał. W lěće 2022 su w Nigeriji štyrjoch měšnikow morili a 28 zawlekli.
Měrowe myto biskopej
