Wadephul žněje kritiku opozicije
Berlin (dpa/SN). W rjadach opozicije žněje žadanje wonkowneho ministra Johanna Wadephula (CDU) za zwyšenjom wojerskich wudawkow na pjeć procentow hospodarskeho wukona raznu kritiku. Zeleni před tym warnuja, so prezidentej USA Donaldej Trumpej přilišćić a žadaja sej solidne planowanje na zakładźe toho, štož běchu na wjeršku NATO loni w juniju wobzamknyli. Podobnje běštaj so ze stron koaliciskeho partnera SPD hižo předsyda Lars Klingbeil a zakitowanski minister Boris Pistorius wuprajiłoj.
„Skutkuje trochu naiwnje, hdyž sej wonkowny minister Wadephul mysli, zo móže prezidentej Trumpej pjaty lizać, hdyž njeserioznje a zwonka koaliciskeho zrěčenja z wulkimi ličbami wokoło so mjeta“, rjekny zastupowaca předsydka Zelenych Agnieszka Brugger Stuttgartskim nowinarjam. Wadephul bě so wčera žadanju Trumpa přizamknył, pjeć procentow hospodarskeho wukona za brónjenje nałožować.
FDP woli nowe nawodnistwo
Mjenje dochodow z dawkow
Berlin (dpa/SN). Zwjazkowe knježerstwo CDU/CSU a SPD dyrbi při zwoprawdźenju swojeho koaliciskeho zrěčenja hač do 2029 z jasnje mjenje dawkowymi dochodami ličić hač běchu hišće loni nazymu powobličili. Fachowcy za dawki wočakuja, zo změje Němska w tymle času 33,3 miliardy eurow mjenje k dispoziciji hač běchu w oktobru trochowali. Nastupajo cyłkowny etat Zwjazka, krajow a komunow su trochowarjo tohorunja pesimistiscy. Tule wočakuja 81,2 miliardźe eurow mjenje hač w oktobru wuličene.
Wažny zakład trochowanja dawkow běchu konjunkturne wuhlady zwjazkoweho knježerstwa. Te wšak pokazuja, zo hospodarstwo tuchwilu stagněruje, mjeztym třeće lěto pospochi. Předsyda SPD Lars Klingbeil je sej wěsty, zo móže jenož sylny rozrost hospodarstwa aktualne wuwiće změnić. Tak bychu dochody zaso přiběrali a nowe inwesticije zmóžnili.
Předsydka AfD Alice Weidel ma ličby za signal hospodarskeho rozpada. „Je to sćěh puća zahubneje energijoweje politiki, kotryž nowa koalicija dale kroči.“
Dixieland bliži so wjerškej
Lěćo budźe horce
Jasne wuznaće k dwurěčnosći
To a tamne (16.05.25)
Dźěći a młodostni wopruja dale a wjace časa za wobrazowku – hač za tiktok, internetne hry abo wuknjenje. Němscy młodostni při tym wosebje wusahuja. 15lětni w Němskej hladaja 48 hodźin wob tydźeń na wobrazowku, to je nimale sydom hodźin wšědnje. Depresije, strowotniske škody a wosamoćenosć móža sćěhi toho być, warnuje nowe přepytowanje OECD. W Francoskej nałožuja sydom- do dźesaćlětni wšědnje dwě hodźinje za internet.
1 446 ludźom žiwjenje wuchowali su čłonojo towaršnosće wuchowarjow žiwjenja Němskeje DLRG loni po wšej Němskej. Lěta 2023 bě jich hišće 1 120 padow. Při tym liča tež tych, kotřiž mějachu při brjoze wodźiznow infarkt abo problemy z wobtokom kreje. 699 ludźi wuchowachu loni před zatepjenjom, towaršnosć zdźěla. 2023 zličichu 870 wuchowanjow. DLRG dyrbi dale za dorostom pytać.
Jurkowa: Narok šule njespušćić!
Wotstronjenje 2plus za jednu rjadownju 1. lětnika Radworskeje šule a redukowanje serbšćiny na hodźinu předsydka Serbskeho šulskeho towarstwa (SŠT) Katharina Jurkowa wotpokazuje: „Njesměmy narok serbskeje šule spušćić!“
Radwor/Drježdźany/Budyšin (SN/mb). Hižo na posedźenju Rady za serbske naležnosće (SN rozprawjachu) zašłu wutoru je so wjele wobmyslenjow jewiło. Parlamentariska poradźowarka SPD chcyše wědźeć, hač tči za listami staršich, kotřiž so přewjele serbšćiny za swoje dźěći dla boja, antiserbske nastajenje. To Kerstin Wittig, referentka kultusoweho ministerstwa, wuzamkny, wšako běchu listy wěcownje sformulowane.
Podpěruje dalše brónjenje
Antalya (dpa/SN). Wonkowny minister Johann Wadephul je zjawnje žadanje prezidenta USA Donalda Trumpa za masiwnym zwyšenjom wudawkow za brónje w čłonskich statach NATO na pjeć procentow hospodarskeho wukona podpěrował. Kraje slěduja posudkej Trumpa, zo je to trěbne, rjekny politikar CDU na zetkanju wonkownych ministrow NATO w Turkowskej. Tuchwilny zaměr NATO stej dwaj procentaj. Jedyn procent wučinja w Němskej něhdźe 45 miliardow eurow.
Předstaji trochowanje dawkow
Berlin (dpa/SN). Kelko dawkowych dochodow móže němski stat přichodne lěta wočakować a što rěka to za etat kraja? Tute prašenje chcyše nowy financny minister a wicekancler Lars Klingbeil (SPD) dźensa wotmołwić. Zakład posudka je wuslědk dawkoweho trochowanja. Gremij fachowcow wot wutory wuradźuje a liči. Prognoza je wažny zakład planowanja zwjazkoweho etata. Z nim rozsudźa, hač dyrbja lutować abo hač maja přidatne móžnosće za inwesticije.
Margot Friedländer pochowana
