Porjedźenka
Spěchowanje za wutwar centruma
To a tamne (20.08.25)
Spěšne wubědźowanske awto je na čěskej awtodróze ludźi wulce zadźiwało. Jězdźidło njebě ani za nadróžny wobchad zawěsćene, ani za wužiwanje dowolene, zdźěli čěska policija. Wideja wulěta z awtom tuchwilu w socialnych syćach kursěruja. Wuhladali běchu čerwjene awto na awtodróze D4 blisko města Příbram, něhdźe 50 kilometrow juhozapadnje Prahi. Samo při tankowni bě awto pozastało, rozprawja nowina „MF dnes“.
W Crimmitschau je muž z kolesom, kotrež je na moped přetwarił, padnył a so při tym njemało zranił. Po njezbožu su muža do chorownje dowjezli. Tam tež přepruwowachu, hač je drogi konsumował. A zwěsćichu w jeho kreji amfetaminy kaž tež konop. Za motorizowane jězdźidło njeměješe muž ani zawěsćenje, ani oficialne přizjewjenje. Wón so nětko z wjacorymi wobskorženjemi bědźi.
Unija jenož procent před AfD
Berlin (dpa/SN). Unija zhubi w aktualnym woprašowanju instituta Insa lochce přihłós ludnosće a leži jenož hišće snadnje nad AfD. We woprašowanju w nadawku nowiny Bild je CDU/CSU cyłkownje 26 procentow hłosow docpěło, jenož jedyn wjace hač AfD. Tuta strona zakituje swoje 25 procentow. SPD ma dale 14,5 procentow. Zeleni (11 proc.), Lěwica (10 proc.), BSW (5 proc.) a FDP (4 proc.) su stajnje poł procenta přidobyli.
Móst chcedźa bórze twarić
Drježdźany (dpa/SN). Nowy Caroliny móst chcedźa hač do lěta 2031 dotwarić. Měšćanski zarjad je zdźělił, zo móža prawdźepodobnje w druhej połojcy lěta 2028 twar noweho mosta zahajić. Měšćanska rada bě so lětsa w lěću za to rozsudźiła, zo móst ze štyrjomi čarami natwari, hdźež bě so stary móst zdźěla do Łobja sypnył. Wupisać chcedźa projekt spočatk septembra. Kónc meje 2026 chcedźa naćiski za móst potom zjawnosći prezentować.
Wadephul wumjetuje Chinje
W Španiskej a Portugalskej ćerpja ludźo lěsnych wohenjow dla. Tute ...
Mjenje pjenjez
Přepytuja miljej
Kooperacija přećiwo wohenjam
Mišno (dpa/SN). Po wjacorych wulkich lěsnych wohenjach chcetej krajny zwjazk wohnjoweje wobory a statny zawod Sachsenforst zaměrnišo hromadźe dźěłać. Wědu a nazhonjenja chcedźa sej wuměnjeć a tak škit před lěsnymi wohenjemi polěpšić, rěka w kooperaciskim dojednanju. W tutym nimo toho steji, zo maja wosebje zjawnosć na strachi před lěsnymi wohenjemi sensibilizować. Tole chcedźa z informacijemi a wujasnjowanjemi zmóžnić, zdźěli Sachsenforst. Nimo toho su so na to dojednali, zo zhromadnje wučbny material a kubłanske programy za dźěło z dźěćimi a młodostnymi dale wuwiwaja.
Hakle spočatk julija bě so po dołhej suchoće Gohrišowa hola při braniborskej mjezy paliła. Lěsnistwowy zarjad zastopnjowaše woheń jako najwjetši w zašłych lětdźesatkach w Sakskej. Woheń su poměrnje dołho hašeli, wšako běchu wobstejnosće dosć komplikowane. Wulkim škodam, kaž je woheń w holi zawinował, chcedźa w přichodźe zhromadnje zadźěwać.
Detaile hišće jasne njejsu
Trump planuje zetkanje ze Zelenskim a Putinom
Washington (dpa/SN). Po wjeršku wo Ukrainje wčera w Běłym domje we Washingtonje prócuje so prezident USA Donald Trump nětko wo zetkanje prezidentow Ukrainy a Ruskeje Wolodomyra Zelenskeho a Wladimira Putina. Na swojej platformje Truth Social piše Trump, zo chce so tež wón na zetkanju wobdźělić. Do toho bě wón Zelenskeho a wjacore hłowy statow Europy kaž tež nawjednikow Nato a komisije EU we Washingtonje powitał.
Němski zwjazkowy kancler Friedrich Merz, kotryž bě so na zetkanju wobdźělił, rjekny, zo planuja zetkanje Zelenskeho a Putina w přichodnymaj tydźenjomaj. „Tajki wjeršk je jenož předstajomny, mjelča-li brónje“, wón zdobom podšmórny. Zelensky na druhim boku so k tomu zwólniwy wupraji, zo Putina tež bjeze wšěch wuměnjenjow zetka.
