Berlin (dpa/SN). Z 49 eurami na měsac po cyłej Němskej z ćahami a busami jězdźić je bórze móžno. Dźensa tomu Zwjazkowa rada přihłosowaše. Wuběrk Zwjazkoweje rady je tole hižo do toho doporučił. Poskitk měł wot 1. meje płaćić. Kak dołho budu zajimcy poskitk wužiwać móc hišće jasne njeje, dokelž je financowanje wužadanje. Tuž je móžno, zo tiket po času podróša. Zastupjerjo přetrjebarjow sej samo garantiju pła­ćizny hač do kónca lěta 2025 žadachu. Tomu pak politikarjo wotpowědowali njejsu. Wjele wobchadnych zwjazkow su minjene tydźenje hišće předskazanki za tiket přijimali. Hižo wot póndźele móhli sej zajimcy tiket oficialnje kupić.

Berlin/Hamburg (dpa/SN). Britiski kral Charles III. je dźensa zhromadnje ze swojej mandźelskej Camillu třeći a posledni dźeń statneho wopyta w Němskej za­hajił. Dopołdnja dojědźe kralowski por zhromadnje ze zwjazkowym prezidentom Frankom-Walterom Steinmeierom a jeho mandźelskej Elku Büdenbender ze spěšnikom ICE z Berlina do Hamburga. Tam witaše hosći Hamburgski měšćanosta Peter Tschentscher. Zhromadnje wopytachu wopomnišćo „Transport dźěći – poslednje božemje“. Bronzowa plastika dopomina na přewažnje židowske dźěći, kiž běchu za čas nacionalsocializma do Wulkeje Britaniskej pósłali a kiž swojich přiwuznych w Němskej nihdy wjace njewidźachu. Slědowaše zhromadne połoženje wěncow při wopomnišću cyrkwje swj. Mikławša. Cyrkej běchu při nalětach britiskich a ameriskich bombowcow na Hamburg 1943 zničili. Před radnicu, w kotrejž so Charles a Camilla do złoteje knihi zapisaštaj, čakachu wobydlerjo města.

Braniborska přewostaja taflam pomoc – młodźinske kluby wohrožene

Podstupim (dpa/SN). Braniborske krajne knježerstwo podpěruje dale dźěło taflow w kraju a přewostaji jim lětsa poł miliona eurow. Tak chcedźa rozdźělernje žiwidłow w časach energijoweje krizy a přiběraceho nawala pomocy potrěbnych podpěrować, rjekny socialna ministerka Ursula Nonnemacher (Zeleni) wčera nowinarjam. Nimo toho maja potrěbni składnosć, wo hnydomnu statnu pomoc prosyć, zo njebychu jim měšćanske zawody njepłaćenych zličbowankow dla milinu a płun zawjertnyli. „W tutych wosebje ćežkich časach wjacorych krizow dla je dźěło taflow nimo statneje socialneje pomocy nimoměry wažne“, ministerka rozłoži. „Jako poskićowarjo dobrowólneje pomocy w ciwilnej towaršnosći nimaja tafle bjez institucionelneje pomocy žanu móžnosć, w tutym napjatym połoženju pomhać, bjez toho zo bychu poskitk na dobro potrěbnych wosobow a swójbow redukowali.“ Tohodla chce krajne knježerstwo kóždej z 43 taflow a druhim pomocnym organizacijam z podobnym poskitkom hnydomnu pomoc hač do 10 000 eurow přewostajić.

Najebać to, zo njeměješe žona w Čěskej kwalifikaciju za powołanje, je wosom lět jako nawodnica zakładneje šule dźěłała. Při požadanju bě wona wopačne certifikaty předpołožiła, zdźěli wčera rěčnica policije. Starši šulerjow kubłanišća w Libcice na Vltavou mějachu podhlad, zo žona kmanosće za nawjedowacu funkciju nima a so na zarjady wobroćichu. Po přepruwowanju bě jasne, zo njeje žona nihdy na Karlowej uniwersiće w Praze studowała. Nětko hroža jej wosom lět jastwa, dokelž je wona wopisma sfalšowała.

Po oficialnym ličenju je w Słowakskej něhdźe 1 200 mjedwjedźow zadomjenych. Stajnje zaso ludźo w přirodźe mjedwjedźa zetkaja, štož móže fatalny wukónc měć. Hakle wčera policija zdźěli, zo je 180 kilogramow ćežke zwěrjo lěsneho dźěłaćerja w gmejnje Nedožery-Brezany nadpadnyło.