Merzma wolóženje za njedosahace
Berlin (dpa/SN). Předsyda CDU Friedrich Merz je třeći paket z wolóženjemi amploweje koalicije jako njedosahacy kritizował. Prawje je, zo rentnarjo a studowacy energijowu pawšalu dóstanu, Merz wčera w lětnim interviewje ARD zwurazni. Ale hač woprawdźe ludźom dosaha, kotrychž dochody leža runje tak nad hranicu bydlenskeho pjenjeza abo sadźbow socialneje pomocy, budźe so pokazać. „Woni dyrbjeli za potrjechenych wjace činić“, Merz wuzběhny. Dale wón měni, zo budu so zamołwići hospodarstwa hóršić, dokelž njeje so na nje mysliło. „A hospodarstwo, to njejsu wulkokoncerny, to su statysacy małych a srjedźnych předewzaćow. Wone koalicija zanjecha.“
Nord Stream 1 dale bjez płuna
Berlin (dpa/SN) Ruski statny koncern Gazprom je pjatk njewočakowano zdźělił, zo njebudźe najprjedy raz žadyn płun přez Nord Stream 1 dodawać. Přičina toho je zmylk w staciji Portowaja, zdźěli Gazprom. Dołhož njeje problem rozrisany, njemóže płun po pipeline běžeć.
Zwjazkowa agentura za syće na tym dwěluje. „Wot ruskeje strony potwjerdźene njedostatki njejsu po hódnoćenju zwjazkoweje syćoweje agentury technisce přičina, dodawanja płuna haćić“, zarjad zawčerawšim zdźěli. Podobnje wupraji so tež předewzaće Siemens Energy jako zhotowjer pječa potrjecheneje turbiny, z kotrejež po wšěm zdaću wolij wuběži.
Jenički zwisk, po kotrymž móže Ruska płun do Němskeje dodawać, skići pipeline Waidhaus. Wodźenski system, kotryž wjedźe po Ukrainje, přez Słowaksku do Awstriskeje a Němskeje. Po tymle systemje pak je dotal jenož mało płuna abo scyła žadyn płun do Němskeje dóšoł. Předewšěm z Norwegskeje, Belgiskeje a Nižozemskeje płun do Němskeje běži štož bě naposledk samo wjace hač z Ruskeje.
To a tamne (05.09.22)
Wěcynjewustojneho kurjenja kołća dla je pčołar w Porynsko-Pfalcowskej něhdźe 400 kwadratnych metrow lěsa zapalił. Při tym je 42lětny pjatk popołdnju přewjele kura zadychał, čehoždla dyrbjachu jeho na městnje lěkować. Nětko přepytuje policija pad njekedźbliweho zadźerženja dla. Cyłkownje 55 wohnjowych wobornikow z jědnaće jězdźidłami je płomjenja hašało.
Dźakowano dokładnemu hladanju je w Šwicarskej nopawa z dwěmaj hłowomaj starobu 25 lět docpěła. Na swojich narodninach zawčerawšim w Genfskim přirodnym historiskim muzeju su hladarjo tam bydlace zwěrjo z mjenom Janus ze zubnej šćětku wumyli. Nopawu wšědnje kupaja, prawidłownje masěruja, ze specielnej dietu zapleńča a wobstajnje na staw derjeměća kontroluja. Amfibija bu po Janusu, romskim Bohu z dwěmaj wobličomaj, pomjenowana.
Kijew žada sej bojowe tanki
Kijew (dpa/SN). Do swojeho wopyta w Němskej je sej ukrainski ministerski prezident Denys Šmyhal wot zwjazkoweho knježerstwa bojowe tanki k wotwobaranju ruskich nadpadnikow žadał. „Trjebamy přewrót w filozofiji dodawanja bróni. Z tym měnju: Trjebamy tež moderne bojowe tanki“, rjekny Šmyhal w rozmołwje z powěsćernju dpa. „Wočakujemy wot USA, zo nam tanki typa Abrams přewostaja a Němska Leopard 2. To su moderne tanki, kotrež trjebamy.“ Šmyhala wočakuja njedźelu w Berlinje.
Biden warnuje před Trumpom
Philadelphia (dpa/SN). Prezident USA Joe Biden je z doraznymi słowami před zwrěšćenjom demokratije w swojim kraju warnował. Na wólbnobojowym zarjadowanju w Philadelphiji wón swojeho předchadnika Donalda Trumpa direktnje nadběhowaše. Toho přiwisnicy su zwólniwi, kraj „do zašłosće wjesć“, Biden rjekny. Demokratiju zakitować, je nadawk kóždeho jednotliwca, tak Biden.
Dźesać lět jastwo za namóc
Demonstranća su dźensa rano před terenom brónjoweho koncerna ...
Fachowcy IAEA chcedźa wostać
Enerhodar (dpa/SN). Mjezynarodny atomowy energijowy zarjad chce dołhodobnu misiju we wot Ruskeje wobsadźenej atomowej milinarni Saporiššja na juhu Ukrainy zarjadować. Tole zdźěli nawoda IAEA Rafael Grossi wčera w internetnym poselstwje. Do toho běchu fachowcy zarjada swoje dźěło w milinarni zahajili. Ruska je dołhodobnej misiji IAEA w milinarni pječa přihłosowała. Ukraina porno tomu na tym wobstawa, zo ruske jednotki milinarnju wopušća a zo tež wokolinu milinarnje demilitarizuja.
Ukrainski prezident Wolodymyr Zelenskyj je Ruskej wumjetował, zo njeje mjezynarodnym zastupnikam medijow dowoliła, wo wopyće fachowcow w Saporiššji rozprawjeć. To by była składnosć, zo „njewotwisni žurnalisća wo wěrnosći“ pisaja. „Bohužel njejsu okupanća tomu přizwolili“, Zelenskyj w swojim wšědnym widejowym poselstwje zdźěli.
Žada sej wjeršk pola kanclera
Wočakuja zamołwjenje prezidenta
Berlin (dpa/SN). Społnomócnjeny zwjazkoweho knježerstwa za bój přećiwo antisemitizmej wočakuje zamołwjenje ze stron zwjazkoweho prezidenta Franka-Waltera Steinmeiera na wopomnjenskim zarjadowanju k 50. róčnicy olympiskeho atentata 1972. „Myslu, zo je na času za zamołwjenje a sym sej wěsty, zo zwjazkowy prezident na zarjadowanju prawe słowa namaka, rjekny Felix Klein nowinarjam. Tajke zamołwjenje žadaja sej tež přiwuzni woporow. 5. septembra 1972 běchu palestinscy terorisća na olympiskich hrach w Mnichowje israelske mustwo nadpadnyli. Jědnaće čłonow mustwa a policist buchu při misnjenym pospyće wuswobodźenja na lětarskim zepěranišću Fürstenfeldbruck morjeni. Wěstotne naprawy běchu njedosahace. Lětdźesatki běchu wo přiměrjene wotškódnjenje wojowali a su so nětko dojednali, rěčnik knježerstwa zdźěli.
Přichodnu póndźelu chcedźa atentat na zepěranišću wopominać. Na zarjadowanju wočakuja tež israelskeho prezidenta Jitzchaka Herzoga.
To a tamne (02.09.22)
16 žnjowych pomocnikow zajała je nižozemska policija, jako tući na ležownosći bywšeho zawoda konop předźěłachu. Po pokiwje swědka běchu zastojnicy hižo před twarjenjom w Oirsbeeku njedaloko němskeje mjezy pola Aachena sylnu wóń konopje registrowali. W hali nańdźechu potom 16 wosobow, kotřiž runje rostliny rozkuskowachu. Mjez zajatymi bě dwanaće wosobow bjez kruteje adresy, policija zdźěli.
Zhubjeny šěsćlětny hólc je w Badensko-Württembergskej na swojim kolesu dźesać kilometrow daloko k hotelej jěł a zasadźenje policije zawinił. Staršej běštaj jeho jako zhubjeneho přizjewiłoj, dokelž njebě so z hrajkanišća wróćił. Na to policisća z helikopterom za nim pytachu. Wječor přizjewi so sobudźěłaćer hotela, rěčo wo „jara młodym hosću“. Što je hólc w hotelu chcył, njewědźa.
Wumjetuja Chinje złóstnistwa
Genf (dpa/SN). Běrow UNO za čłowjeske prawa ma pokiwy na złóstnistwa přećiwo čłowjeskosći w chinskej prowincy Xinjian. Tole wuchadźa z chětro brizantneje rozprawy wyšeje komisarki UNO za čłowjeske prawa Michelle Bachelet, a to dźesać mjeńšin do skónčenja jeje zastojnstwa krótko do połnocy. W rozprawje rěka, zo China čłonow Uigurow a druhich mjeńšin do lěhwow tyka, zo by jich namócnje překubłała. China bě spytała, wozjewjenju rozprawy zadźěwać.
Ludźo namołwjeni ćeknyć
Kijew (dpa/SN). Ukrainske knježerstwo radźi ludźom kónčiny, w kotrychž so wojuje, do zahajenja zymskeho počasa wopušćić. „Žadam sej nuznje ewakuowanje Donjecka, Chersona, Saporiššje a dźělow Charkowskeje kónčiny, prjedy hač so zyma započnje“, rjekny zastupowaca ministerska prezidentka Iryna Wereščuk w ukrainskej telewiziji. Wójnskich škodow na infrastrukturje dla njeje zastaranje z ćopłotu, milinu a wodu w dźělach kraja w zymje zaručene, wona rjekny.
Chowanje Gorbačowa sobotu
