Drježdźany (dpa/SN). Sakska so planowanym cyłoněmskim rjadowanjam přećiwo rozšěrjenju koronawirusa přizamknje a swoje wobmjezowanja na krajnej runinje přiwótřa. Tak dyrbja wot jutřišeho w swobodnym staće tež frizerske salony zawrjene wostać, kaž hospodarske ministerstwo w Drježdźanach zdźěli. Dotal běchu salony wot zawrjenjow wuwzate byli. „Wěmy, zo sej hižo płaćiwe a planowane wobmjezowanja wot rjemjesła, wikowanja a kóždeho jednotliweho wobydlerja wjele mocy a sćerpnosće žadaja“, pisa hospodarski minister Martin Dulig (SPD) w zdźělence. „Najwažniše pak nětko je, žiwjenje wuchować a dźěłakmanosć strowotniskeho systema zaručić. To je w dźělach Sakskeje mjeztym jara wobćežne.“ Tak su wot 16. decembra hač do 10. januara 2021 „njetrjebawše ćěłu bliske posłužby zakazane“.

Tež hodowne rjadowanja w Sakskej dale přiwótřa, statna kenclija informuje. Dotal bě předwidźane, zo smě so přez hodowne swjate dny dźesać wosobow zetkać. Nětko smědźa so jenož hišće štyri wosoby z najwušeho swójbneho kruha swójskej domjacnosći přidružić.

Dyrdomdejskeje jězby z jetskijom na britisku kupu Isle of Man dla dyrbi muž wjacore tydźenje do jastwa. 28lětneho su zajeli, dokelž njeje koronaprawidła zańč měł. Muž jědźeše kónc tydźenja ze Šotiskeje ze swojim motorizowanym nastrojom na kupu, zo by tam swoju přećelku wopytał. Za něhdźe 40 kilometrow dołhu čaru přez morjo trjebaše wón dobre štyri hodźiny. Jeho próstwa, legalnje ze Šotiskeje přijěć směć, bu do toho wotpokazana.

Pjany 14lětny je w Słowakskej z awtom jěł a znjezbožił. Při wotbočenju na křižowanišću we wuchodosłowakskim měsće Dobšiná zrazy wón do domu a wobškodźi fasadu, a to z 1,5 promilemi alkohola w kreji. Hólcej hrozy nětko sudniske jednanje jězdźenja bjez jězbneje dowolnosće a wodźenja awta pod wliwom alkohola dla. Kak je k awtowemu klučikej přišoł, nochcyše wón policiji přeradźić.

Rom (B/SN). Prěni króć w stawiznach je bamž­ Franciskus dweju duchowneju přez internet za kardinalow powołał. Dokelž njemóžeštaj biskopaj Cornelius Sim z Bruneija a Jose Fuerte Advincula z Filipinow koronapandemije dla do Roma přijěć, wobdźělištaj so wobaj přez widejo na Božej mši. Biret, kardinalski pjeršćeń a pomjenowanske wuswědčenje na kardinala přepodaštaj jimaj wotpowědnaj zastupjerjej Vatikana. Nimo mjenowaneju je Franciskus w Pětrowej cyrkwi jědnaće dalšich muži na kardinalow powyšił. Cyłkownje pomjenowa wón z dotal 95 najwjace kardinalow, Jan Pawoł II. porno tomu w 26 lětach skutkowanja jako pontifeks jenož 65 a Benedikt XVI. štyrjoch wjace. Z tuchwilnych 229 kardinalow ma jeno 128 prawo, bamža wolić.

Kritizuja znjewužiwanje křiža

Čłonojo Serbskeho sejma su napjateho połoženja koronapandemije dla swoje poslednje zetkanje lěta 2020 minjenu sobotu jako widejokonferencu wotměli.

Budyšin/Njebjelčicy (SN/at). Ćežišćowa tema wuradźowanja bě znowa naćisk statneho zrěčenja mjez Zwjazkowej republiku Němskej, Swobodnym statom Sakskej a krajom Braniborskej ze serbskim ludom. Do toho zaběrachu so z rozprawami wo rozmołwach z biosferowym rezerwatom Hornjołužiska hola a haty, wo postupje, serbske zajimy w sakskim koaliciskim zrěčenju zeskutkownić, a wo zapodatej próstwje Załožbje za serbski lud, zo by jednaćelnju sejma financowała. Wo tym Serbski sejm informuje.

Sejmar Hajko Kozel staji naćisk statneho zrěčenja do zwiska ze swojim bywšim skutkowanjom jako zapósłanc: „Naše prócowanja, sakski serbski zakoń wobnowić, buchu dotal blokowane.“ Kozel zwěsći, zo su so město toho „wo wjele wjetše durje wočinili“. Tohodla wón statnemu zrěčenju přicpěwa, zo wone „móžnosće na jedyn zwjazkowy kraj wobmjezowaneho serbskeho zakonja daloko přesahuje“.