Wójsko poskića pomoc
Berlin (dpa/SN). Dołho wočakowany serum přećiwo koronawirusej chcedźa zdźěla w kasernach Zwjazkoweje wobory składować. Wotpowědna próstwa wo pomoc mjeztym předleži, zdźěli zakitowanska ministerka Annegret Kramp-Karrenbauer (CDU) nowinarjam. Kaserny chcedźa pak jenož wužiwać, hdyž maja to za zmysłapołne. Nimo toho je wójsko dalšu pomoc při šćěpjenju poskićiło. W boju přećiwo pandemiji je tuchwilu 9 000 wojakow zasadźenych.
Trump poražku poćerpjeł
Washington (dpa/SN). Prawiznicy Donalda Trumpa su w juristiskim boju přećiwo přěhratym prezidentskim wólbam dalšu poražku poćerpjeli, tónkróć před najwyšim sudnistwom. Supreme Court we Washingtonje je próstwu wotpokazał, wuslědk wólbow w zwjazkowym staće Pennsylvania zběhnyć. Tež tam bě republikan swojemu demokratiskemu kontrahentej Joewej Bidenej podležał. Wot 3. nowembra Trump twjerdźi, zo su jemu wólbne dobyće přez masiwne falšowanje wzali. Dopokazy wón žane nima.
Pytataj za rozrisanjom
Demonstracija zakazana
Merkel nowy wulki dołh zakituje
Berlin (dpa/SN). Zwjazkowa kanclerka Angela Merkel (CDU) je wulke znowazadołženje w etaće 2021 zakitowała, skedźbnjejo na wužadanja koronapandemije. „Smy žiwi we wuwzaćnym połoženju“, rjekny wona w generalnej debaće w Němskim zwjazkowym sejmje. „Dyrbimy tuž na wurjadne wašnje jednać, štož so w etaće wotbłyšćuje.“ Wuraznje so Angela Merkel za to zasadźa, kontaktne wobmjezowanja po hodźoch hišće raz raznje přiwótřić. „Tu je zamołwitosć kóždeho jednotliwca prašana.“
Do toho bě frakciska předsydka AfD Alice Weidel dotalne wobmjezowanja korony dla kritizowała: „Tež po dźewjeć měsacach sće přeco hišće bjezradni a zepěraće so na njekmany srědk lockdowna, kotryž wjace škody hač wužitka napara.“ Předsyda FDP Christian Lindner šwikaše, zo njejsu naprawy knježerstwa wobličomne a ludźom zrozumliwe.
Debatuja wo naprawach
Sakska dalše wobmjezowanja přećiwo koronawirusej připowědźiła
Drježdźany (dpa/SN). Sakska prezentuje so tež w koronakrizy hłuboko pačena. Na jednym boku pokazuje tójšto ludźi zrozumjenje za přiwótřene naprawy přećiwo koronawirusej. Z někotrych politiskich stron a wot wjacorych potrjechenych pak jewi so kritika.
„Předołho stej so Zwjazk a Sakska na druhu žołmu koronawirusa přihotowałoj. A jako wona tu bě, stej wopačne naprawy wukazałoj“, komentuje zapósłanc FDP w zwjazkowym sejmje Torsten Herbst nowe naprawy a rěči wo „črjopjencu“. Sakscy liberalni kritizuja „salamijowu taktiku“ a shutdown a žadaja sej dołhodobnu strategiju přećiwo pandemiji.
Tež Armin Laschet za lockdown
To a tamne (09.12.20)
Namakawši wjacore mysteriozne stołpy po cyłym swěće su nětko tež w hessenskej gmejnje Sulzbach tajki kamjentny stołp namakali, a to na kromje pola. Štó bě tam wjace hač tři metry wulki monolit nastajił a z kotreje přičiny, nichtó njewě. Wuchodźowarjo su stelu wuhladali. Ratar, kiž pola wobdźěłuje, twjerdźi, zo nima ze stołpom ničo činić. Monolity běchu tež hižo w USA, Nižozemskej a Španiskej našli.
Z chětro njewšědnym pasažěrom dyrbješe so zwjazkowa policija w Kölnje zaběrać. Do tamnišeje měšćanskeje železnicy je so kraba zabłudźiła. Kak bě so dźesać centimetrow wulki rak do ćaha dóstał, wosta zastojnikam wulke hódančko. Policija přepoda jeho wohnjowym wobornikam, kotřiž tež zwěrjata wuchowuja. Wo kotru družinu krabow so jednaše, to njejsu zdźělili.
Bywši prezidenća warnuja
Waršawa (dpa/SN). Třo bywši prezidenća Pólskeje su w zjawnym lisće na narodnokonserwatiwne knježerstwo a na statneho šefa Andrzeja Dudu apelowali, haćacu poziciju nastupajo etat EU zaso zběhnyć. Weto by rozumny był, by-li etat Pólskej njelěpšiny wunjesł, pisaja Lech Wałęsa, Aleksander Kwaśniewski a Bronisław Komorowski. Tomu pak tak njeje. Waršawa njesměła EU dlěje wudrěwać. Pólska a Madźarska etat blokujetej. Tuž změje EU wot januara jenož nuzowy etat.
Tesla njesmě lěs dale trjebić
Podstupim (dpa/SN). Twarc elektroawtow z USA Tesla njesmě lěs na płoninje swojeje noweje twornje w Grünheidźe pola Berlina dale trjebić. Zarjadniske sudnistwo w Frankfurće nad Wódru je wčera z chwatnym rozsudom dalše pušćenje štomow najprjedy raz zakazało. Wobswětoškitnej zwjazkaj Nabu a Zelena liga běštej chwatnu próstwu zapodałoj. Tesla chce na płoninje hišće raz 82,9 hektarow lěsa trjebić.
Fachowc: Jednanja podlěšić
