„Młodźina hudźi“ w Choćebuzu
Zwučuja za zhromadny koncert
„Měr“ pokazali
Dźěći pisaja knihu w Budyskej knižnej dźěłarni
W Budyskej dźěćacej a młodźinskej bibliotece je so póndźelu projekt „Dźěći pisaja knihu“ zahajił. Šefina domu Kristin Lehmann praji, zo móžachu šěsć holcow a hólcow za to zdobyć.
Budyšin (SN/mwe). Hač do oktobra maja šulerjo 5. a 6. lětnika we wobłuku „Budyskeje knižneje dźěłarnje“ přiležnosć, swójsku knihu napisać. K tomu so hišće štyrnaće razow w Budyskej dźěćacej a młodźinskej bibliotece zetkaja, zo bychu wot fachowcow prawy nawod dóstali.
Kaž nawodnica knihownje Kristin Lehmann na naprašowanje Serbskich Nowin zdźěli, wona dotal hišće njewě, hač su na prěnim projekće tohole razu tež serbske abo dźěći swójbow ćěkancow pódla. Wšako su wobdźělnicy tuchwilu hišće w přihotowanskim procesu. „By pak rjenje było, bychu-li dźěći swoje basnje a powědančka nimo němskeje tež w druhich rěčach napisali.
Zo by so projekt zwoprawdźił, dźěłaja hromadźe ze Zhorjelskej dźěćacej knižnej dźěłarnju, kotruž nawjeduje wjelelětny a nazhonity kubłar Sebastian Hänel po přikładźe knižnych dźěći w Lipsku.
Nowe křidło w srjedźišću stało
Swoje nowe křidło z łužiskeje dźěłarnje Augusta Förstera w Lubiju předstajichu wuměłcy Serbskeho ludoweho ansambla minjeny pjatk zjawnosći. Wša přičina potajkim, njewšědny podawk z wosebitym koncertom woswjećić.
Budyšin (CRM/SN). Dramaturgiju hudźbneho wječora połneho temperamenta a šibałosće běše pianistka Liana Bertók zdźěłała. A k wuraznemu přesadźenju swojich předstawow měješe tež dobrych partnerow poboku. Běštaj to w prěnim rjedźe Tasso Schille z NSLDź kaž tež Jochen Hentschel z SLA. Wonaj z njej hromadźe pokazaštaj, kak wjelestronsce hodźi so na tymle instrumenće tež štyriručnje hrać.
Ewangelska drasta je magnet
W Njeswačanskim muzeju maja dalšu pokazku serbskosće wsy
Njeswačidło (ML/SN). Nowozhotowjena njedźelska drasta Njeswačanskich Serbowkow, w kotrejž wone hač do kónca 19. lětstotka chodźachu, steješe w srjedźišću wčerawšeho wotewrjenja sezony w tamnišim domizniskim muzeju. Worklečanska šwalča Petra Kupcyna bě drastu za trajnu wustajeńcu muzeja zhotowiła, za čož trjebaše tydźeń. Nawoda muzeja Arnd Lehmann dźakowaše so Załožbje za serbski lud, kotraž bě ze sobudźěłaćerku Wóršu Pašcynej zastupjena, za spěchowanje nastaća historiskeje narodneje drasty.
Mjez dobyćerjemi je Serb z Radworja
Kónc tydźenja kaž tež hišće přichodnu sobotu a njedźelu wotměwa so w Budyskich šulach wokoło Schillerowych zelenišćow a w Kamjentnym domje 26. krajne wubědźowanje „Młodźina hudźi“. 500 młodych hudźbnych talentow z cyłeje Sakskeje staji so na krajnej runinje k posudźowanju swojich wukonow přez něhdźe połsta jurorow.
Budyšin (CRM/SN). Hižo sobotu móžeše so tež zajimowany publikum wo tym přeswědčić, na kak wysokim niwowje so krajne wubědźowanje, kotrež druhi raz w Budyšinje, wotměwa. Mjeztym zo běše we wokrjesnej hudźbnej šuli solowe spěwanje a hraće na klawěrje na rjedźe a předstajichu so w Melanchthonowym gymnaziju smyčkarjo, hrajachu w Schillerowym gymnaziju we wšelakich skupinskich zestawach instrumentalisća na trompeće, róžku, pozawnje a tubje. Tež za publikum běše wulke wjeselo, jim připosłuchać. Rozdźěle mjez wukonami njeběchu přewulke, byrnjež starobny rozdźěl tola rólu hrał. Tu pak dźe wo to, z dobrych a jara dobrych tych najlěpšicho wubrać.
Karel Macků
Wjetša trawersa za Olsenowu cwólbu
Předpředań za lětuše Budyske lětnje dźiwadło „Olsenowa cwólba wupućuje“ zahaji so 8. apryla w 11 hodź. w Budyskim NSLDź. Za šěsć tydźenjow trajacy spektakl pod hołym njebjom na Hrodźe stara so dźiwadło tónraz wo wjace městnow za přihladowarjow.
Budyšin (SN/CoR). Hišće so předpředań za 22. Budyske lětnje dźiwadło započała njeje, naprašowanjow pak je Němsko-Serbske ludowe dźiwadło hižo tójšto měło. „Hačrunjež bychmy hižo móhli, žane zastupne lisćiki do oficialneho starta předpředanje 8. apryla njepředawamy“, rozłoži medijowa rěčnica NSLDź Gabriele Suschke na wutornej nowinarskej konferency.
Łužiski jutrowny swět wobšěrnje předstajeny
Choćebuz (HA/SN). Serbski muzej w Choćebuzu je dale prezentny, hačrunjež je za publikum hižo cyłe lěto wobšěrnych twarskich a wobnowjenskich dźěłow dla zawrjeny. Hromadźe z tamnišim měšćanskim muzejom pak su móžnosće namakali, zo bychu so wopytowarjo dale ze serbskimi stawiznami a kulturu zeznajomjeli. Wot lońšeje nazymy pokazuja pod hesłom „Zachowane drohoćinki“ na druhim poschodźe měšćanskeho muzeja mjeńšu přehladku wo Serbach w Delnjej Łužicy.
Minjenu srjedu su nětko w samsnym domje lětušu jutrownu wustajeńcu „Osterfreuden – Po jeja“ wotewrěli. Kaž rjekny muzejowy nawoda Steffen Krestin na wotewrjenju, běchu sobudźěłaćerki a sobudźěłaćerjo wobeju domow tule wosebitu wustajeńcu zestajeli. Za to wužiwachu fundus wobeju zarjadnišćow. Přehladka je hač do 7. meje spřistupna.
