Awtor dźensa

Ludwig Zahrodnik

Hody so bliža. Sportowcy, kotřiž su w minjenych měsacach ze stajnym treningom a hrami wužadani byli, wjesela so na zymsku přestawku. Zymscy sportowcy pak njemóža dočakać, zo móhli skónčnje na narodnych a mje­zynarodnych wubědźowanjach mo­cy měrić.

Takle bě to před 60 lětami: Sportowcy přihotowachu so na VII. olympiske hry, kotrež so w februaru 1956 w italskim Cortina d'Ampezzo wotměchu. Sportowcy NDR, kotřiž w cyłoněmskim mustwje startowachu, mějachu mało składnosćow, so do toho na mjezynarodnych wubědźowanjach wobdźělić. Tuž bě bronzowa medalja Harryja Glaßa w specialnym skakanju jenička za NDR.

W běhu lět je so to změniło. 1984 na Olympiskich zymskich hrach w Sarajewje wobsadźi mustwo NDR w hódnoćenju krajow samo prěnje městno. Dźensa wěmy, zo běchu wuspěchi sportowcow NDR tež nastupajo njedowolene substancy wažnu rólu hrali. A fenomen doping njeje přeco hišće přewinjeny.

Wokrjesna koparska liga, stafla I

ST Budyšin – ST 1922 Radwor2:1 (0:1)

1. ST Budyšin 14 48  :  19 38

2. Załom 14 41  :  18 27

3. HZ Budestecy 13 44  :  26 27

4. Kubšicy 14 27  :  19 26

5. Malešecy 13 39  :  22 25

6. Radwor 13 29  :  15 24

7. Wóspork 13 22  :  25 23

8. Póst Budyšin II  14 33  :  34 18

9. Wjazońca  14 27  :  37 18

10. Wjernarjecy 12 24  :  22 14

11. Porchow 13 32  :  44 13

12. Wulka Dubrawa  14 25  :  28 12

13. Hodźij 14 17  :  33 11

14. Mały Wjelkow 14 23  :  59 9

15. Hnašecy II 13 17  :  47 7

Nócny volleyball w Pančicach

Pod hesłom „Bjez špatneho swědomja sej hodownu husycu zesłodźeć dać“ steji lětuši nócny volleyballowy turněr Serbskeho młodźinskeho towarstwa Pawk. Hry budu w Pančičansko-Kukowskej sportowni, a to wutoru, 22. decembra, wot 19 hodź. Wšitke startowe městna su wobsadźene, a to přez tele mustwa: Dwójna nula, Bratrowstwo Róžant, CTP-Crew, Škit Budyšin, Eskimowcy, Marijine hwězdźički, Dźiwje micki, Tysacdwěsćěatřinaće, Sorabija Lipsk, Swobodne piwo, Wuchodny blok, Granit Hórki, Bazinga, SC Knack, Radworscy a Konjecy-Šunow. Dalši steja na čakanskej lisćinje.

Hodownu husycu sej wotběhać

Natwar Němske Pazlicy zarjaduje tež lětsa zaso, a to 15. raz „wotběhanje hodowneje husycy“. Loni běchu w Němskich Pazlicach 270 sportowcow zličili. Start na distancy 5 km wokoło wulkeho hata budźe sobotu, 26. decembra, w 10 hodź. při Sportowym a wólnočasnym centrumje Němske Pazlicy.

Koparske dypkowe hry

Do hód kaž tež w januarje 2016 maja so na teritoriju Zapadołužiskeho koparskeho zwjazka WFV hišće někotre dypkowe hry nachwatać.

19.12. 13:00 Njeswačidło – Rakecy II

19.12. 13:30 Glauchau – Jednota Kamjenc

Na posledni hrajny dźeń wobwodneje volleyballoweje ligi žonow witachu Marijine hwězdźički doma ST Chróstawu a MSV Budyšin 04. By-li so něchtó na prognozu zwažił, tak by zawěsće jasnu poražku přećiwo druhemu tabulki z Chróstawy wěšćił a so w duelu přećiwo Budyšankam dobyća nadźijał. Teorija pak z praksu wjele zhromadneho měła njeje.

ST Marijina hwězda – ST Chróstawa 2:3 (25:15, 25:11, 18:25, 20:25, 14:16)

Za domjace hrajerki bě wot započatka Anne Fünfstück jako přistajerka zasadźena, štož so wudani. Mjeztym zo so přećiwnik jenož ćežko do hry namaka, Marijine hwězdźički wot zazběha ze stoadźesać procentami nawjedowachu. Pokiwy trenarja Ralfa Wachsmanna wone přeswědčiwje zwoprawdźichu. Johanna Fiegler so w bloku a nadběhu wuznamjeni. Jasna plista Chróstawje w prěnjej sadźbje njeje jenož hosći překwapiła.

W druhej sadźbje domjace ze samsnym elanom pokročowachu. W bohatej ličbje přichwatani přihladowarjo mytowachu poradźene akcije z přikleskom. Marijinym hwězdźičkam dosahaše pjatnaće mjeńšin, zo bychu hosćom dalšu a hišće jasnišu poražku wobradźili.