ST Łobjowy kraj Coswig-Mišno –

ST Viktoria Worklecy 3:1

(25:23, 18:25, 25:22, 25:20)

Viktorianojo podachu so sebjewědomje do połobskeho kraja k hrajnemu zjednoćenstwu Coswig-Mišno. Kontrahent bě sej dotal w dźewjeć volleyballowych hrach jenož snadne šěsć dypkow wudobył. Nimo toho přěhra hižo prěnju partiju hrajneho dnja přećiwo Freitalej jasnje 0:3. Worklecy běchu potajkim na papjerje jasny faworit.

Hosćo tuž hru zahajichu a po někotrych kedźby hódnych nadběhach spěšnje 6:2 nawjedowachu. Tola domjacy wužichu někotre njekoncentrowanosće Worklečanow při přiwzaću a při pólnym wotwobaranju, a při stawje 12:12 zaso wurunachu. Tež w druhej połojcy sadźby mějachu hosćo zwjetša snadnu lěpšinu, njemóžachu pak přehusto dypkować. Zaso­ wužichu Łobjenjo dźěry w bloku a móžachu prěnju sadźbu snadnje 25:23 za sebje rozsudźić.

Po změnje stronow agěrowachu Viktorianojo přewšo motiwowani a wutwarichu sej předskok sydom dypkow. Domjacy pak samo při stawje 22:11 dale wojowachu a móžachu zastatk hišće wo něšto skrótšić. Na kóncu pak skónčichu hosćo sadźbu 25:18.

Łužiske lodohokejowe liški –

Krefeldske pinguiny 5:2 (2:0, 1:1, 2:1)

Prěnju hońtwu, za požadanymi třomi dypkami noweje sezony su Łužiske liški suwerenje dobyli. Přećiwo druhemu tabulki přesadźichu so jasnje 5:2.

Hra započa so za Pinguiny ze stróželemi. Hižo w třećej mjeńšinje zadźěwa najprjedy žerdź wrotam prjedy hač Felix Bick z wažnej paradu zažnemu zastatkej zadźěwa. Tola Łužiske liški běchu wot spočatka eficientne. W 11. min. wuži Matej­ Leden překwapjacu třělwu direktnje po bullyju k 1:0. Hišće do přestawki zwyši Roope Mäkitalo po sylnje wuhratym konteru na 2:0.

Tež w druhej třećinje wostachu Liški eficientne. Lewis Zerter-Gossage trjechi w 21. min. kedźby hódnje do krótkeho róžka na 3:0. Hakle w 27. min. přińdźechu Pinguiny lěpje do hry. Lucas Lessio wuži druhi pospyt před wrotami liškow a skrótši na 3:1. Tola najebać wjacorych situacijow z jednym hrajerjom wjac na lodźe, mjez nimi tež dwójce z nadličbu, zwrěšći cyłk Thomasa Popiescha přeco zaso na wrotarju liškow Anthony Morronje, kiž měješe wusahowacy wječor.

Krasne zymske wjedro we Łužicy, ale tež w susodnej Čěskej je tójšto Serbow minjene dny k sportowanju wužiwało. Wuměnjenja za zymski sport, wosebje za sněhakowanje na dołhich čarach, su w čěskim Bedřichovje tuchwilu jara dobre. Loipowe pasmo rozpřestrěwa so tam přez wjac hač 100 kilometrow a je jara wotměnjace. Jako startowy dypk poskića so mjez druhim Smědava (Wittighaus). Markantnej městnje z krasnym wuhladom do Łužicy stej mjez druhim hora Paličnik a Pytlácké kameny. W přichodnych dnjach wěšća meteorologojo samo dalši sněh, tak zo wostanu wuměnjenja stabilne. Foto: Tadej Cyž

Awtor dźensa

André Strelow

Bul kula so zaso w zwjazkowej lize, a skónčnje dźe zaso wo dypki. Prěni hrajny dźeń w nowym lěće skićeše hižo dosć zapala za horce diskusije, na hrajnišću kaž tež w socialnych syćach. Kedźbyhódny wokomik sta so při partiji mjez Hoffenheimom a Wolfsburgom (0:1). Tu bu sudnik zwjazkoweje ligi Christian Dingert přez telewizijne mikrofony zapopadnjeny. „Sy ty klepnjeny?!“, zawoła wón do směra Hoffenheimskeho hrajerja Antona Stacha, po tym zo bě tutón diskusiju wo postajenym róžku nastorčił. Při tym činješe Dingert markantnu „woknotrějakowu“ gestu. Skóržby Hoffenheimerow přez tute wuprajenje njebě za čas hry žadyn indic za to, zo drje njeje Stach komentar nadhódnoćił. By hrajer z tutymi słowami na sudnika wotešoł, by to najskerje konsekwency měło. Po zasadźe dwanaće koparskich prawidłow by w tajkim padźe znajmjeńša žołta, hdyž nic samo čerwjena kartka, sćěh był.