Kołowokoło Radworskeje sportownje „Slavia“ steješe minjenu njedźelu hižo rano po wosmich mnoho awtow. Sakske towarstwo za mjetańcu z. t. bě 48 młodych sportowčow na wubědźowanje přeprosyło, w běhu kotrehož chcychu dwaceći holcow lětnika 2013 za saksku dorostowu wubranku w mjetańcy namakać.

Mustwa z Lipska a Drježdźan, z juhozapada kaž tež wuchoda Sakskeje běchu sej do Radworja dojěli. Z „Witajće k nam“ jich Radworska wjesnjanostka Madelaine Rynčowa na spočatku zarjadowanja postrowi. Kerstin Herzer, wiceprezidentka za dorost w Sakskim zwjazku mjetańcy z. t. na to nawjaza prajo, zo wotměwa so wurisanje w dwurěčnej kónčinje našeho kraja. Jakob Dietrich, krajny trenar za mjetańcu w Sakskej, so zamołwitym dźakowaše, zo běchu Radwor jako městnosć wubědźowanja wuzwolili. Wšitcy běchu sej přezjedni, zo ma tamniša gmejna ze swojej sportownju woprawdźitu parličku, kotraž zarjadowanja na tajkim niwowje zmóžnja.

Kamjenc (SN/MiR). Sportkristall je jedne z najwuznamnišich wuznamjenjenjow Budyskeho wokrjesa, kotrež wěnuje so wosebje wusahowacym wukonom kaž tež młodemu angažementej w sporće. Swjatočne počesćenje budźe 29. meje we Wět­nicy.

W cyłku mytuje wokrjes w kategorijach młody sportowc, młoda sportowča a towarstwo lěta kaž tež čestnohamtski angažement stajnje třoch. Dwě wosobje je jury hižo wuzwoliła. Nětko ma publikum hač do 3. meje składnosć, online wothłosować. Kóždy ma jedyn hłós. Mjez kandidatami staj młodaj Serbaj. 16lětny Jurij Bobka z Worklec je čłon sportoweho towarstwa Viktoria Worklecy. Tam hraje wón jako libero w 1. muskim mustwje wolejbul. Zdobom je Jurij aktiwny jěchar a čłon sakskeho kadra juniorow. We woběmaj sportowymaj družinomaj je wón jara wuspěšny. To je tež 13lětna Tereza Maćijec z Hrubjelčic. Wona wěnuje so jako čłonka Wuchodosakskeho towarstwa za lochkoatletiku Budyšin wysokoskokej. Serbska gymnaziastka je dobyćerka sakskeho mišterstwa a sakskich krajnych hrow we wysokoskoku.

Stara koparska garda Sokoła Ralbicy/Hórki je pjatk wječor we wólnočasnej koparskej lize doma najebać spěšne nawjedowanje 1:0 (3.) přez Roberta Statnika winowatostnu dypkowu hru přećiwo hosćom z Horow 1:2 přěhrała.

Koparki Dynama Drježdźany z Radworčanku Johanu Wjeselic wjeselachu so nad dobyćom 6:1 přećiwo Rychbachej.

We wyšej lize hrajachu Biskopicy – Glauchau 1:3 a Budyšin – Freital 3:1. Wot 10. min. bě Budissa w zastatku a třěli w poslednich pjeć mjeńšinach wšitke tři wrota. Za Budissu trjechištaj Jannik Käpp­ler (86., 89.) a Maximilian Noack (90.+3).

We wokrjesnej wyšej lize su worjoły z Kulowa pola poslednjeho we Wachauwje po njerozsudnym 3:3 dwaj dypkaj misnyli. Wrota Marca Bulanka (2.), Niklasa Čórlicha (13.) a Johannesa Wehlana (25.) wuruna stajnje Theo Langwald (7., 20., 39.). Ralbičanscy Sokoljo podležachu cyłkej z Hlinowca 0:2 a prěnje koparske mustwo SJ Chrósćicy doby 4:1 přećiwo hosćom z Großnaundorfa.