Folklorny ansambl wo dorost wabi

Freitag, 21. September 2018 geschrieben von:

Chrósćicy (SN). Zo by rejowanska skupina Serbskeho folklorneho ansambla Wu­dwor dale wobstała, pytaja tež lětsa zaso dorost. Jutře, 22. septembra, přewjedu w Chróšćanskej wjacezaměrowej hali „Jednota“ w 15 hodź. mału dźěłarničku. Wsitcy zajimcy w starobje 5. do 7. lětnika su wutrobnje přeprošeni.

Kaž Lucija Smolic z wjednistwa tradiciskeho kulturneho ćělesa zdźěli, chcedźa zajimcam towarstwo předstajić. Po tym budźe proba ze sćoplenjom a wšelakimi rejemi z choreografom. Přizamknje so zhromadny wječor z małym přikuskom a rozmołwu. Njech sej kóždy sportowu drastu sobu přinjese.

Rejwanska skupina Smjerdźaca na wukrajnej wuprawje była

Do južnoameriskeho kraja Peru podachu so srjedź awgusta čłonki a čłonojo Serbskeje rejwanskeje skupiny Smjerdźaca zhromadnje z muzikantami wokoło Budyšana Tomasza Nawki. Cyłkownje 29 sobustawow kulturneho ćělesa wobdźěli so na tamnišim mjezynarodnym rejwanskim festiwalu „Festidanza Arequipa“.

Prěnja stacija Smjerdźečanow bě Lima, hłowne město Peruwa. W stolicy přebywachu woni dwaj dnjej a tworjachu sej prěnje zaćišće wo cuzym a njeznatym kraju. Tak njewobhladachu sej jenož najrjeńše a jara zajimawe kućiki města, ale mějachu tohorunja składnosć, sej noze w Pacifiskim oceanje wochłódnić. Dalokož móžno spytachu tež z domoródnymi wo tamnišim kraju a kulturje so rozmołwjeć, štož pak wukopa so bórze jako chětro komplikowane. Wšako nańdźechu lědma ludźi, kotřiž jendźelšćinu wob- knježachu.

Pawk z dźěłom spokojom

Mittwoch, 19. September 2018 geschrieben von:

Budyšin (ap/SN). Serbske młodźinske towarstwo Pawk je minjenu sobotu w Budyskim Serbskim domje swoju lětušu hłownu zhromadźiznu přewjedło. Na dnjowym porjedźe steješe nimo rozprawy dźěławosće tež přiwzaće nowych čłonow. „Wjeselimy so nad kóždym, kiž Pawkej přistupi a ma lóšt, za serbsku młodźinu skutkować“, witaše předsydka Franciska Grajcarekec pjeć nowych sobustawow.

Slědowachu rozprawy wo projektach. Hižo na lońšej zhromadźiznje běchu so na to dojednali, so lětsa hłownje na to koncentrować, čłonow wabić a zhromadnosć towarstwa skrućić. Tak běchu ćežišća – nimo kóždolětnych wjerškow, kaž stej to „Nócny wolejbul“ a kooperacija ze Serbskim gymnazijom Budyšin „Studenća pomhaja šulerjam“ – interne kwartalne zetkanja. Wuzběhnyli su dale projekt „Z Pawkom na Roskilde-festiwal“, wu­měnu młodych Serbow z młodostnymi narodneje mjeńšiny Danow w Němskej na hudźbnym festiwalu w Danskej. Pozitiwneho wothłosa dla je termin tež klětu zaso zaplanowany.

Muzejownicy pola designerki w Błótach

Donnerstag, 13. September 2018 geschrieben von:

Łužiscy muzejownicy zajimowachu so ­we wobłuku swojeho tradicionalneho nazymskeho zetkanja lětsa za nowy serbski łužiski design.

Wólbny porjad rozjimali

Donnerstag, 13. September 2018 geschrieben von:

Wojerecy (SN). Z přihotami 19. hłowneje zhromadźizny Domowiny, wotměwaceje so 30. měrca 2019 w Chrósćicach, zaběraše so prezidij Domowiny na swojim zetkanju wčera we Wojerecach. Rozestajał je so tež ze stejišćom třěšneho zwjazka k pjatej rozprawje Němskeje wo zwoprawdźenju ramikoweho dojednanja wo škiće narodnych mjeńšin. Tele rjadowanje je jedne z dweju centralneju europskeho razu nastupajo politiske a wobsahowe połoženje serbskeho ludu, kaž předsyda Domowiny Dawid Statnik informuje.

Jako dalše rozjimachu čłonojo prezidija naćisk porjada za wólby sakskich serbskich zastupjerjow do rady Załožby za serbski lud na dobu 2019–2023 a powołanje wólbneho wuběrka. Zwjazkowe předsydstwo Domowiny rozsudźi wo tym na swojim přichodnym posedźenju. Wólby přewjedu 14. decembra.

Zdobom přeprosy prezidij wšitkich zajimcow na jutřiše dźěłarnički konferency wo strukturnym wuwiću we Łužicy na Braniborskej techniskej uniwersiće (BTU) w Złym Komorowje. Wone su zjawne a zastup darmotny. Cyłkowny program je pod www.domowina.de wozjewjeny.

Hotuja so na 175. róčnicu załoženja

Mittwoch, 12. September 2018 geschrieben von:

Budyšin (mkc/SN). Předsydstwo Maćicy Serbskeje je na swojim wuradźowanju wčera w Budyskim Serbskim domje – zhromadnje z nawodami sekcijow – so zaběrało z prěnimi přihotami 175. róčnicy załoženja serbskeho wědomostneho towarstwa, kotruž chcedźa w lěće 2022 woswjećić. To je zdobom lěto, w kotrymž wopominamy 150. posmjertniny Handrija Zejlerja a 200. narodniny Korle ­Awgusta Kocora. Wuznamnaj wótčincaj běštaj sobuzałožićelej Maćicy Serbskeje.

Dale sej wčera dorěčachu, kak zaručić mjez sobustawstwom wobdźělenje na „Naprašowanju čłonow wšitkich serbskich towarstwow a zwjazkow“, kotrež Domowina w swojich čłonskich, ale tež w nječłonskich serbskich towarstwach a zwjazkach­ wot kónca septembra hač do 14. oktobra 2018 přewjedźe. Z naprašowanja wočakuja informacije wo tym, kak wobydlerjo na dobro mjezsobnosće w dwurěčnej Łužicy skutkuja, kajki maja podźěl na serbskim kulturnym žiwjenju a w kotrej měrje so z třěšnym zwjazkom identifikuja. 6. nowembra zetka so předsydstwo Maćicy Serbskeje w 750lětnych Wojerecach z čłonami serbskeje přirady.

Za čo je demokratija!

Montag, 10. September 2018 geschrieben von:
Cyłki pod třěchu Domowiny wołaja wo pomoc, dokelž njewědźa sej pječa žaneje rady, kak z wabjenjom iniciatiwneje skupiny za wólby Serbskeho sejma wobchadźeć. Wězo je to legitimne, za radu so prašeć. Problem njezdawaja so mi być wone wólby, ale njewužiwany čas, ze zaměrami tajkeho Serbskeho parlamenta so rozestajeć. Na poskićeny „narodny“ dialog, móžeš to lózysce tež prowokowany dialog mjenować, njejsmy ze serbskich towarstwow dotal kedźbyhódny wothłós słyšeli. Wuprajenje někotrych župow, zo wólby Serbskeho sejma njepodpěraja, běchmy na wědomje brali. Njesměć hižo dlěje mjelčeć je pak chětro pózdnje dopó­znaće. Tež, hdyž wołanje za argumentami Domowinje přisłušacych towarstwow a župow zdźěla rozumju: W demokratiji smě a dyrbi sej runje tež w narodnych naležnosćach kóždy cyłk swójske měnjenje tworić a je wótře wuprajić. Za to mamy a trjebamy demokratiju. Axel Arlt

Z kolesom sej zhromadnje wulećeli

Freitag, 07. September 2018 geschrieben von:
Wjesne towarstwo Noweje Wjeski je minjenu njedźelu swojich čłonow na kolesowanski wulět přeprosyło. Prěni puć 25 wulětnikarjow wjedźeše k Miłočanskej žabje (na wobrazu), hdźež so dźěći přeswědčichu, zo so žaba woprawdźe njehiba. Na to wopytachu mjezynarodnu rězbarsku dźěłarničku w Miłočanskej skale, hdźež móžachu sej nowe twórby wuměłcow wobhladać a rozjasnić dać. Poslednja přestawka bě piknik w Lipju w Pančicach-Kukowje, hdźež šofer dypkownje ze słódnej jědźu a napojemi čakaše. Foto: Jana Hiccyna

Analyzu nachwatać?

Mittwoch, 05. September 2018 geschrieben von:
Ze swojim wot kónca septembra wotměwacym so naprašowanjom spyta Domowina analyzu nachwatać, na kotruž serbska zjawnosć znajmjeńša dźesać lět čaka. Hižo do rozsuda pod třěchu Załožby za serbski lud, hdźež běštej dźěłowej skupinje wo najkmańšim puću za zastupowanje serbskich zajimow rozmyslowałoj, by tajke naprašowanje přewšo wunošne było. Tehdy přesadźi so mysl Domowinu skrućić. Ideja korporacije zjawneho prawa njebu zwoprawdźena. Nětko předležace naprašowanje wěnuje so hłownje nutřkownemu žiwjenju towarstwa. Nimo čłonow třěšnemu zwjazkej přisłušacych cyłkow pak móža so tež Njedomowinjenjo wobdźělić. Hač pak budu woni poskitk wužiwać? Tajkej łoskosćiwej temje, hač a kak čuja so Serbja – ći jedni kaž ći tamni – wot Domowiny scyła politisce zastupowani, so naprašnik bohužel njewěnuje. Runje tak wobšěrniše móžnosće sobupostajowanja za politiske gremije žanu rólu njehraja. Škoda. Axel Arlt

Zhonić, što je Serbam wažne

Mittwoch, 05. September 2018 geschrieben von:

Domowina chce naprašowanje towarstwow a zwjazkow přewjesć

Narć (SN/JaW). Wuběrk Zwjazkoweho předsydstwa Domowiny za zjawnostne a lobbyjowe dźěło chce so hač do 14. oktobra čłonow wšitkich serbskich towarstwow a zwjazkow wo serbskim žiwjenju a skutkowanju Domowiny naprašować. To je gremij na posedźenju minjeny pjatk w Narćanskim woby­dlerskim domje wobzamknył. „Chcemy zhonić, što je Serbam wažne, a přede­wšěm nas zajimuje, kak woni skutkowanje třěšneho zwjazka posudźuja“, rjekny předsyda Domowiny Dawid Statnik.

Anzeige