Zwjazkowy prezident Joachim Gauck je dźensa w Berlinskim Virchowym ...
Pytaja zhromadnje za pozadnikami
Ankara/Moskwa (dpa/SN). Po smjertnym atentaće na ruskeho wulkopósłanca pytaja ruscy a turkowscy zastojnicy zhromadnje za pozadnikami njeskutka. Ruska je za to 18 fachowcow tajneje słužby, policije a wonkowneho ministerstwa do turkowskeje stolicy pósłała. Zhromadnje z turkowskimi kolegami maja woni morjenje diplomata přepytować a nadawkidawarjow namakać, rěčnik Krjemla Dmitrij Pjeskow zdźěli. Ruskeho wulkopósłanca Andreja Karlowa bě turkowski policist póndźelu wječor zatřělił. Specialna jednotka policije je jeho na to moriła.
Turkowske knježerstwo je sej wěste, zo je hibanje prědarja Gülena za njeskutk zamołwite, informuje statna powěsćernja Anadolu. Pječa je to turkowski wonkowny minister Mevlüt Çavuşoğlu swojemu koleze w USA Johnej Kerryjej telefonisce zdźělił. Gülena, kiž bydli w USA, maja w Ankarje za hłowneho pozadnika nastupajo pospytany wojerski puč srjedź julija w Turkowskej. Wot toho časa sej Turkowska žada, zo měli USA Gülena přepodać. Toho hibanje su w Turkowskej mjeztym zakazali a jako teroristisku organizaciju zastopnjowali.
Krućiše zakonje nuznje trěbne
Düsseldorf (dpa/K/SN). Dźiwajo na terorowy atentat na jedne z Berlinskich dohodownych wikow žada sej šef konferency nutřkownych ministrow Klaus Bouillon krućiše zakonje. „Po cyłej zwjazkowej republice je tójšto ćěkancow, wo kotrychž njewěmy, zwotkel su a kak rěkaja, tak zo mamy nahladny potencial njewěstoty“, rjekny posaarski šef ressorta. „Štóž chcył azyl, k swojej identifikaciji pak njepřinošuje, dyrbi narok na azyl zhubić“, sej wón doraznje žadaše.
Zwjazk němskich kriminalistow widźi dobre wuhlady, zo skućićela póndźelneho atentata bórze změja. „Sym dobreje nadźije, zo móžemy hižo jutře abo w najblišim přichodźe noweho podhladneho prezentować“, rjekny předsyda André Schulz. Nimo wuwoprašowanja swědkow wuhódnoćeja přepytowarjo z rjadow Berlinskeje policije zawostajene slědy DNA kaž tež wotćišće porstow. Z pomocu GPS pytaja za mobilnym telefonom skućićela.
Kozel: Zajimy Serbow zapřijeć
Zhorjelski wokrjesny sejmik wo nowej towaršnosći za region debatował
Zhorjelc (UM/SN). Runja Budyskim kolegam su tež Zhorjelscy wokrjesni radźićeljo wobzamknyli, zo chcedźa planowanej nowej towaršnosći Hospodarski region Łužica přistupić. Wo tym pak tydźenja wo tójšto naležnišo hač w Budyšinje wo lěpšinach a njelěpšinach tuteje kročele debatowachu. Hospodarski region Łužica ma z wokrjesomaj Budyšin a Zhorjelc, z Braniborskej a Sakskej z dotalneho energijoweho regiona Łužica-Błóta nastać. Jemu přisłušeja dotal pjeć braniborskich wokrjesow a město Choćebuz.
Nimo krajneho rady Bernda Langi (CDU) je tež wokrjesny radźićel Swobodnych wolerjow Torsten Pötzsch, zdobom Běłowodźanski wyši měšćanosta, za přistup k towaršnosći wabił. „W Běłej Wodźe so ze strukturnymi změnami wuznawamy. Smy škleńcowu industriju a na juhu wokrjesa tež tekstilnu industriju zhubili. Chcemy, zo nas kónc wudobywanja brunicy hišće jónu tak bolostnje njetrjechi.“
Socialnu strukturu Strowotneje studnje polěpšić
Budyšin (SN). Sakski minister za nutřkowne naležnosće Markus Ulbig (CDU) je tele dny Budyskemu wyšemu měšćanosće Alexanderej Ahrensej (njestronjan) spěchowanske srědki 896 074 eurow přewostajił. Srědki pochadźeja z noweho spěchowanskeho programa Europskeje unije „Dołhodobne socialne měšćanske wuwiće do lěta 2020“. Z pjenjezami móža socialne předewzaća w Budyskej měšćanskej štwórći Strowotna studnja podpěrać. Dobropis přepodachu w rumnosćach towarstwa Swětłownja-Majak. Markus Ulbig wuzběhny: „Budyšin móže ze spěchowanskimi srědkami tójšto inowatiwnych projektow zwoprawdźić. Wone skruća socialnu infrastrukturu a zwyša kubłanske a dźěłowe šansy na městnje. Inwesticije su w prěnim rjedźe na dobro dźěći a młodostnych.“
Město Budyšin chce předewšěm socialne połoženje w Strowotnej studni polěpšić. K planowanym předewzaćam słuša mjez druhim projekt towarstwa Majak „Cyłe žiwjenje wuknyć“. Z nim chcedźa w prašenju kubłanja, komunikacije a při rozrisanju konfliktow pomhać. Za to poskića swójbam dźěłarnički.
To a tamne (21.12.16)
Z nowym internetnym portalom za žiwidła chce młode Berlinske předewzaće něšto přećiwo gigantiskemu brojenju žiwidłow w Němskej činić. Konkretnje posrědkuje wosebita app informacije wo nadbytku žiwidłow w gastrononiji. Tak wužiwar widźi, hač w bliskich hosćencach tajki maja. Za 1,50 hač do 4,50 eurow móže tam potom jěsć hić. 160 hosćencow w Berlinje so dotal na akciji „MealSaver“ wobdźěla. W Němskej mjetaja kóžde lěto jědnaće milionow tonow žiwidłow do wotpadkow.
Před wjele lětami pokradnjenu drastu a črije je policija na łuce pola Kaiserslauterna namakała. Drasta měješe samo hišće etikety wjacorych Kaiserslauternskich wobchodow, w kotrychž bu w lětomaj 2009 a 2010 pokradnjena. Policisća su po łuce rozbrojene rubjenstwo zezběrali a jako dar socialnym zarjadnišćam přewostajili.
Gauck: Hrózbny dźeń za kraj
Po wčerawšim krawnym nadpadźe na Berlinske dohodowne wiki
Berlin (dpa/SN/MkWj). Muž, kiž bě wčera wječor při terorowym nadpadźe na dohodowne wiki na Berlinskim Breitscheidowym naměsće z nakładnym awtom wotpohladnje dwanaće ludźi morił a 48 zdźěla ćežko zranił, je wobrónjeny a dale ćěka. Tole je Berlinska policija dźensa zdźěliła. Wčera wječor zajaty 23lětny Pakistanjan njebě za wodźidłom nakładneho awta sedźał. Policija je wuprajenja podhladneho přepruwowała a zwěsćiła, zo su wěrne, kaž dźensa informowaše. „Smy wopačneho zajeli“, rěkaše připołdnju ze stron policije. Do toho běchu zdźělili, zo je zajaty Pakistanjan njeskutka nuznje podhladny. Swědk bě jeho po krawnym nadpadźe přesćěhał a policiji přepodał. Muž bě loni přez Passau jako ćěkanc do Němskeje přišoł a bydleše wot toho časa w domje za požadarjow azyla na něhdyšim lětanišću Tempelhof Berlin. Policiji bě wón wšelakich „snadnych deliktow“ dla znaty. Njeskutk wón prěje.
Trump za prezidenta woleny
Washington (dpa/K/SN). Gremij wólbnikow je wčera Donalda Trumpa oficialnje za prezidenta Zjednoćenych statow Ameriki wuzwolił. Za 70lětneho wikowarja z imobilijemi hłosowaše z přitomnych 538 wólbnikow z 50 zwjazkowych statow 304 a tak tójšto wjac hač trěbnych 270. Přećiwnicy běchu so hač do poslednjeho wokomika nadźijeli, zo móhli mjez republikanskimi wólbnikami někotři być, kotřiž Trumpa jeho njespušćomnosće dla wotpokazaja.
Psychiatriski posudk přednjesł
München (dpa/K/SN). W procesu wo NSU je eksperta Henning Saß dźensa psychiatriski posudk wo hłownej wobskorženej Beaće Zschäpe přednjesł. Z njeho wuchadźa, zo ma Saß wobskorženu za dospołnje winykmanu. Zschäpe bě wšak kóždu rozmołwu z ekspertu zapowědźiła. Zhotowił je wón posudk tuž hłownje na zakładźe zaćišćow na sudniskim procesu. Hdyž tónle posudk nětko předleži, móhł proces skónčnje do swojeje finalneje fazy hić.
VW płaći Kanadźe miliardy
Wulkopósłanc Ruskeje morjeny
Ankara (dpa/SN). Ruskeho wulkopósłanca w Turkowskej je policist při atentaće w Ankarje morił. Kaž turkowski nutřkowny minister Süleman Soylu zdźěli, bě atentatnik 22lětny turkowski policist, dlěje hač dwě lěće w stolicy zasadźeny. Wulkopósłanc Andrej Karlow je na sćěhi swojich ćežkich zranjenjow wudychał, po tym zo bě nadpadnik při wotewrjenju wustajeńcy w galeriji na njeho třělał. Na wideju je widźeć a słyšeć, kak atentatnik stajnje zaso wołaše: „Allahu Akbar – Bóh je wulki“, po tym zo bě so Karlow zwjezł. Třělc wołaše: „Njezabudźće Aleppo, njezabudźće Syrisku“, jako wokoło na zemi ležaceho wulkopósłanca běhaše. Woblek zdrasćeny bě wón wotzady na diplomata třělał, jako tón wotewrjensku narěč k wustajeńcy dźeržeše. Bjezposrědnje po wutřělach nadpadnik wołaše: „My smy ći, kotřiž su profetej Mohammedej a dźihadej swěrni.“ Tule sadu tež syriscy islamisća wołaja, hdyž do boja ćahnu. Atentatnik bu po informacijach turkowskeje policije „neutralizowany“. Dotal njeje jasne, hač bu morjeny abo zajaty.
