Jens Buliš na diakona wuswjećeny
To a tamne (09.05.17)
Kabrio staršeju zešrotował je 14lětny młodostny, po tym zo bě z nim hodźiny dołho na awtodróze po puću był. Hólčec bě skradźu ze Sewjerorynsko-Westfalskeje do srjedźneje Frankskeje jěł, dobre 450 kilometrow. Tam pak je so wčera rano na twarskim wotrězku awtodróhi A 7 pola Feuchtwangena nakładneho awta šmórnył. Wón zhubi kontrolu nad wodźidłom a so přećisny. Młodostneho z Duisburgskeje kónčiny dowjezechu do chorownje. Kabrio je jenož hišće šrot.
Jałojca je so wčera po Zwickauwje woměrje wuchodźowała. Ćeknywši burej bě wona popołdnju na sewjeru města po puću a přeprěči tam mjez druhim zwjazkowu dróhu B 93. Po něhdźe třoch hodźinach hakle so wobsedźerjej poradźi, ju w měšćanskim dźělu Crossen zaso popadnyć. Kak bě jemu jałojca ćeknyć móhła, ratar njewě.
Wšo zaso w rjedźe
Jerusalem (dpa/K/SN). Dwě njedźeli po diplomatiskej rozkorje mjez Němskej a Israelom bywataj zwjazkowy prezident Frank-Walter Steinmeier a israelski premier Benjamim Netanjahu wujednanaj. Tón hosća wutrobnje wita, prajo, „mamy wurjadne partnerstwo a swojorazne zwjazkarstwo“. Zakład su wosebite stawizny. Před tydźenjomaj bě Netanjahu wonkownemu ministrej Sigmarej Gabrielej (SPD) chribjet pokazał, dokelž bě so z „njepřećelemi“ Israela zetkał.
Nawoda IS morjeny
Kabul (dpa/K/SN). Specialne mocy afghaniskeho wójska su po oficialnych informacijach nawodu teroristiskeje milicy Islamski stat (IS) w Afganistanje Abdula Hasiba morili. Operacija přećiwo njemu bě so hižo tydźenja započała, dźeń po tym zo běštaj ameriskaj wojakaj zahinyłoj. Nimo Hasiba buchu dalši nawodnicy IS morjeni. Hasib je zamołwity za nadpad na wojersku chorownju w Kabulu w měrcu, žadacy sej 49 woporow.
Njewěstosć USA dla
Emmanuel Macron wólby dobył
Paris (dpa/K/SN). Z wurisanskich wólbow wo prezidentstwo w Francoskej je jako wulki dobyćer wušoł socialno-liberalny kandidat Emmanuel Macron. Njewočakowano nažnja 39lětny Europje přichileny njestronjan dobrych 66 procentow, mjeztym zo je so za prawicowu populistku Marine le Pen 34 procentow wuprajiło. Wjace hač 10,6 milionow Francozow hłosowaše tuž za 48lětnu njepřećelku EU, štož je za prawicowo-ekstremistisku Front National najlěpši wuslědk w jeje stawiznach. Wólbne wobdźělenje wučinješe 75 procentow. Štyri miliony Francozow wotedachu njepłaćiwe wólbne lisćiki.
SSW dale z třomi zapósłancami w parlamenće
Kiel/Flensburg (SN/at). Wolerjo w Schleswigsko-Holsteinskej su dotalnu „pobrjóžnu koaliciju“ SPD, Zelenych a Južnoschleswigskeho wolerskeho zwjazka (SSW) wotwolili. Na wčerawšich wólbach 19. krajneho sejma wopokaza so CDU po lěće 2012 znowa jako najsylniša strona. Po nachwilnym wólbnym wuslědku docpěchu CDU 32,0 procentow (+1,2%), SPD 27,2 procentaj (-3,2%), Zeleni 12,9 procentow (-0,3%), FDP 11,5 proc. (+3,3%), AfD 5,9 proc. a SSW 3,3 procenty (-1,3%). Wólbne wobdźělenje polěpši so na 64,2 procentaj (2012: 60,2%). Lěwicy njeje so z 3,3 procentami znowa poradźiło w krajnym sejmje zastupjena być. Najwjetšu stratu poćerpjechu Piraća z 1,2 procentomaj (-7,0%), w krajnym parlamenće w Kielu woni hižo njejsu.
Lars Harms, Jette Waldinger-Thiering a Flemming Meyer dansku mjeńšinu z mandatom SSW dale w krajnym sejmje zastupuja. Runja tamnymaj stronomaj dotalneje koalicije njemóžeše SSW tomu zadźěwać, zo bě jeho wčerawši wólbny wuslědk špatniši hač před pjeć lětami.
Projekt spěšnje zwoprawdźić
Marko Šiman prócuje so dale wo nowu serbsku rěčnu šulu
Budyšin (SN/MkWj). Zapósłanc CDU w Sakskim krajnym sejmje Marko Šiman dale na tym wobstawa, zo so nowa serbska rěčna šula załoži. Tole měło so w zamołwitosći swobodneho stata zwoprawdźić, zo by so profesionalne wukubłanje zajimcow po přikładźe Zwjazkoweho zarjada za rěče (Bundessprachenamt) zaručiło. Na dźensnišej nowinarskej rozmołwje Šiman zdobom na to skedźbni, zo so wón mjeztym štyri lěta z tematiku zaběra a zo njebě jeho njedawne žadanje za tajkim kubłanišćom spontane. Na žadyn pad njesměła so rěčna šula, hdźež chcyli wukubłanych wučerjow w serbšćinje wukmanić, jako konkurenca k wobstejacemu Institutej za sorabistiku Lipšćanskeje uniwersity wobhladować. Wuwiće minjenych lět a wočakowany wotchad wulkeje ličby wučerjow na wuměnk pak su serbskemu politikarjej dopokaz, zo „njeje tuchwilny staw optimalny“. Projekt rěčneje šule dyrbjał so tuž spěšnje zwoprawdźić, sej zapósłanc žada.
To a tamne (08.05.17)
Historisku zběrku rostlin z Francoskeje su sobudźěłaćerjo cła w Awstralskej mylnje spalili. Přičina su krute zakonje, z kotrymiž chcedźa rozpřestrěću nowych chorosćow rostlin a zwěrjatow zadźěwać. Zběrka z 19. lětstotka bě požčonka Pariskeho přirodostawizniskeho muzeja za muzej awstralskeho města Brisbane. Pječa njebě na pakćiku naspomnjene, zo jedna so wo drohotnu zběrku.
Muž na motorowej hawbje njeje tomu zadźěwać móhł, zo jeho žona pjana z awtom jědźe. W bayerskim Nördlingenje bě so muž swojej žonje do puća stupił, dokelž chcyše wopita z awtom wotjěć. Wona pak jědźeše pomału dale, na čož so muž na motorowu hawbu sydny. Po 50 metrach njemóžeše so hižo dźeržeć a padny do přirowa. Test alkohola wunjese pola žony 2,5 promilow. Jězbnu dowolnosć hižo dawno žanu njeměješe.
Wojowarja IS zajeli
Karlsruhe (dpa/SN). Zwjazkowe statne rěčnistwo je dźensa w Sakskej pozdatneho čłona teroristiskeje milicy Islamski stat (IS) zajeć dało. 29lětny Syričan Ahmed A. je we wobydlerskej wójnje w swojej domiznje bojowu jednotku teroristiskeho zjednoćenstwa Jabhat al-Nusra nawjedował a bě na zdobyću wjacorych městow wobdźěleny, kaž zamołwići zdźěleja. Lěta 2013 so wón IS přizamkny. Sakscy policisća su muža pola Lipska zajeli.
UNO wita škitne pasma
New York (dpa/SN). Planowane wutworjenje škitnych pasmow za syriske ciwilne wobydlerstwo UNO w New Yorku wita. Tole by zmužita kročel była, žiwjenje ludźi w Syriskej woprawdźe polěpšić. Nětko dyrbjeli so transporty pomocnych srědkow spěšnje organizować. Ruska, Turkowska a Iran běchu so wčera w kazachskej stolicy Astanje dojednali tajke škitne pasma zarjadować, do kotrychž móhła sej ciwilna ludnosć wućeknyć. USA reagowachu ze skepsu.
Chce koaliciju dale wjesć
