Ma ćeže partnera namakać
Čěska skóržbu njewuzamknje
Praha (dpa/SN). Čěska chcyła sej móžnosć wobchować, wot Awstriskeje připowědźenej skóržbje přećiwo němskemu awtodróhowemu popłatkej za wosobowe awta so přizamknyć. Wokomiknje chcedźa najprjedy raz wočaknyć, kak so komisija EU w tymle prašenju zadźerži, rěkaše po posedźenju knježerstwa z kruha wobdźělnikow. Ministerski prezident Bohuslav Sobotka je planowane wolóženje za němskich šoferow wospjet kritizował. „To njeje po mojim měnjenju cyle fairne a njeje cyle w porjadku“, rjekny socialdemokrat powěsćerni ČTK.
W čěskich ministerstwach so boja, zo móhli po skóržbje wšelake němsko-čěske wobchadne projekty ćerpjeć. Tole pišu Hospodářské noviny. Tohodla srjedźo-lěwicarske knježerstwo w prašenju skóržby přećiwo Němskej wokomiknje hišće waha. Čěska dźě so noweje spěšnoželezniskeje čary mjez stolicu a Drježdźanami kaž tež modernizowanja železniskeho zwiska do Mnichowa nadźija.
Tójšto problemow rozrisali
25. wuradźowanje wo azylu, migraciji a wěstoće w Budyšinje
Budyšin (CS/SN). Mjeztym 25. króć je so zapósłanc CDU w Sakskim krajnym sejmje Marko Šiman z ludźimi zetkał, kotřiž so w Budyšinje z temu azyl a integracija zaběraja. Wčera schadźowachu so w zetkanišću Dźěłaćerskeho dobroćelskeho skutka w Budyskej Strowotnej studni. Facit zastupnikow šulow, pěstowarnjow, cyrkwjow a přenajerjow bydlenjow: Derje, zo so měsačnje zetkawamy a ze sobu rěčimy. Tójšto problemow su tam přez mjezsobnu wuměnu spěšnje rozrisać móhli. W lěće 2014 njemějachu za 90 procentow hišće scyła žane rozrisanje.
Dobry to přikład
To a tamne (16.05.17)
Tobołu ze 7 000 eurami je dowolnik w Baden-Badenje zhubił – a wróćo dóstał. 61lětny Běłorus bě město kónc tydźenja na jězbje z awtom po Europje wopytał. Tam wón tobołu z pjenjezami a dokumentami na třěchu awta staji. Jako wotjědźe, zaby na tobołu, kotraž so z třěchi suny. W swojej nuzy wobroći so šofer na policiju. Krótko na to namakar tobołu woteda. Přepodachu ju dowolnikej a namakarjej 220 eurow.
Smudźacej so dźěćacej comakaj stej w Kaiserslauternje zasadźenje wohnjoweje wobory a policije zawiniłoj. Młodaj staršej běštaj na hornc zabyłoj, w kotrymž chcyštaj comakaj wuwarić. Jako bě woda wuparjena, so alarmowy system zapiny. Wobornicy comakaj zhašachu. Swójba, kotraž bě při alarmje z bydlenja ćeknyła, so njezranjena nawróći.
Njesmědźa wojakow wopytać
Berlin (dpa/SN). Turkowska je wjacorym zapósłancam Zwjazkoweho sejma Němskeje zakazała, němskich wojakow na lětarskim zepěranišću Incirlik wopytać. Wo tym je wonkowne ministerstwo dźensa čłonow zakitowanskeho wuběrka informowało, kaž powěsćernja dpa rozprawja. Zwjazkowe knježerstwo nětko pruwuje, hač njeměło němskich wojakow do druheho kraja přepołožić. Hłowna přičina zakaza je pječa spožčenje azyla turkowskim oficěram w Němskej.
Dalšu raketu wupruwowali
Seoul (dpa/K/SN). Dalšu raketu testujo je Sewjerna Koreja USA na to pokazać chcyła, kak daloko jeje brónje sahaja. Mócnar Kim Jong Un praji, USA njeměli woči před realitu zawěrać. Jich teritorij a operaciski areal w Pacifiku stej na dosah Sewjerneje Koreje. Ta wobsedźi wšitke srědki za rewanšny dyr. Zaměr wčerawšeho testa je po sewjerokorejskej agenturje KCNA był, pokazać, zo wobsedźi kraj rakety, kotrež dokonjeja transportować atomowe rozbuchadła.
Zhromadnje so zakitować
Přećiwnicy brónjenja su dźensa w delnjosakskim Unterlüßu zachod ...
Wólby z hrimotom
Düsseldorf (dpa/K/SN). Wěšćił bě so po woprašowanjach wuslědk wólbow krajneho sejma Sewjerorynsko-Westfalskeje, po kotrymž smědźeše SPD nadźiju na zdźerženje mocy měć. Wukulił je so wčera rezultat, kotryž njemóže za socialdemokratow hórši być. Zhubiwši cyłych wosom dypkow spadnje SPD z historisce najšpatnišim wuslědkom 31,2 procentow na njedźakowne druhe městno. Wyskaca dobyćerka je CDU. Wona nažnja 33,0 procentow, a jeje načolny kandidat Armin Laschet chce jako ministerski prezident najwjetši zwjazkowy kraj zaso „na čoło němskich krajow“ dowjesć. Njenadźicy derje wobsta FDP, za kotruž hłosowaše 12,6 procentow wolerjow. Dotal sobu knježacy Zeleni buchu tohorunja poskubani, a dyrbja so ze 6,4 procentami spokojić. Za to dósta populististiska AfD zrazom 7,4 procenty a zaćehnje do sejma. Lěwicy so to njeporadźi, byrnjež so z 2,5 na 4,9 procentow polěpšiła.
Iniciatiwu Sintow a Romow podpěrać
Choćebuz (SN/at). Wobsahowe dypki nastupajo awtochtone mjeńšiny w Němskej słušeja do wólbneho programa strony Lěwicy za wólby zwjazkoweho sejma 24. septembra. Čłonojo dźěłoweho zjednoćenstwa Lěwicy etniske mjeńšiny schwalichu na swojim wuradźowanju sobotu w Choćebuzu rjad namjetow, kotrež běštaj jeho rěčnikaj dr. Renate Harcke a Hajko Kozel jako diskusijny zakład zdźěłałoj. Cyłk ma za trěbne přiwzać wuprajenja kaž „Chcemy njewotwisnu wobkedźbowarnju ekstremna prawica, rasizm, antisemitizm, nadpady přećiwo připóznatym awtochtonym mjeńšinam a njepřećelskosć přećiwo islamej wutworić“ abo „Podpěrujemy iniciatiwu Centralneje rady němskich Sintow a Romow a zasadźamy so za to, wutworić njewotwisny wuběrk ekspertow, kotryž so z aktualnymi zjawami předsudkow napřećo tej mjeńšinje rozestaja, prawidłownje stejišćo napřećo zwjazkowemu sejmej k tomu zabjerje a napřećiwne strategije wuwije“ do wólbneho programa Lěwicy.
